13
Korint zomatre aḳeri hushiari
Baiainre, ami ou tin nombor bar tumrar gese airam. Zano to, Allar kalamo ase, “Dui ba tin zon manshe eḳoi laḳan shakki dile ou befar hasa forman oe.” Te ami zebla dusrabar tumrar gese geslam, hou soforor age zera guna-ḳosuri ḳorsil, ami tarare ar bad-baki hoḳolre hushiar ḳori dislam. Ar oḳon ami nize azir na oileo tarare ola hushiar ḳori diram, ami aroḳbar aile tara ḳeu rehai faita nae. Tumra bule forman sairae, amar muk dia al-Mosie matira ni. Ashole al-Mosi to tumrar befare kunumonteu ḳomzur nae, tan nizor bol-shokti tumrar maze azir ase. Zudio tanre ḳomzur halote solibor ufre loṭḳaia zane mara oisil, ta-o Allar kudroti bole tain oḳon zinda asoin. Ar amra-o ola tan laḳan ḳomzur asi, oile tan loge zinda roae Allai kudroti bole tumrar gese aia mukabila oimu.
Tumra nizore zasai ḳori deḳo, al-Mosir ufre hasaror iman ase ni? Tumra buzo na ni, Isa al-Mosi tumrar dilo asoin. Kial rakio, zasai ḳorat gia zanu tumrar maze bezal na mile. Ar ami asha ḳori tumra buzbae, amra to ḳaṭi hishabe forman oigesi. Amra Allar dorbaro munazat ḳorram, tumra hoḳol laḳan bod ḳam taki basia ro. Amra nizor forezgarir forman deḳanir lagi ikan ḳoiram na. Ar manshe amrare forezgar mono na ḳorleo, tumra hamesha nek kam ḳorat ro. Amrar ḳemota oilo hokor fokke, na-hokor fokke amrar kunu bol nai. Te amra zebla ḳomzur ar tumra boloban, ita deḳle amra kushi. Amra dua ḳoriar, tumra touba ḳoria hari furafur ḳaṭi o. 10 Erlagi ami tumrar ges taki duroi roia ita leḳram, zate tumrar samne aia harle malik Isar deoa ḳemota ḳaṭaia ḳoṭu bebohar ḳora na lage. Malike amare i ḳemota disoin tumrare goṛia tular lagi, ḳeti ḳorar lagi nae.
Bidaei salam ar dua
11 O bai oḳol, hesh-mesh ḳoiram, tumra kushi-bashi ḳoro, nizore kamil banao, eḳe-oinnore nosiot ḳoro, eḳoi monobabe ro, shantie boshot ḳoro. Teu shantir ar mohobbotor Allao tumrar loge loge roiba.
12 Tumra eḳe-oinne fobitro golagoli ḳorio. 13 Allar hoḳol pak bondae tumrare salam zanaira.
14 Malik Isa al-Mosir rohomot, Alla Pakor mohobbot, ar Pak Ruhur ḳatir-zoton tumra hoḳolor dilo rouk. Amin.