Fobitro Injil Shorif 9 nombor sifara
al-Galatia
Forisiti
Alla Pakor hukume Hozrot Isa al-Mosir sahabi Hozrot Pauluse (ra:) siṭir aḳare ou sifara leḳsoin. Hozrot Isae behesto toshrif neoar onuman 16 bosor bade ikan leḳa oise. Hozrot Paulus bortoman Turoshko deshor Galatia elaḳat gia toblig korla, ḳali Hozrot Isar ufre iman anleu nazat mile. Oile tain hon taki zaoar bade ḳoezon Ihudi moulana aia ḳoila, ḳali iman anleu nazat mile na, erloge Ihudi dormo mafik Musa nobir shorioto mante oibo. Tarar ou bonḍami talim taki basanir lagi tain ou foegam leḳla.
Tain buzaira, Allar oada ḳora al-Mosir ufre iman anleu nazat faoa zae, nazator lagi Musar shoriot amol ḳorar zorur nae. Oile nazator fol oilo shoriotor hukum-ahkam mafik sola.
Ou zomanar Ihudi ar oinno zatir maze kunu boni-bona asil na. Ihudi oḳole mone ḳorta ḳali tarau Allar maear zati, tara saṛa bad-baki hoḳol manushu be-din ar naforman. Oile Hozrot Pauluse ḳoira, na, Ihudi ba oinno zati era hoḳolu naforman, kunu manshoru takkot nai shullo-ana shoriot amol ḳora, erlagi hoḳolu lannoti bonigese. Te Isa al-Mosi saṛa basar kunu fot nai.
Ermaze ase,
(1) Allai kush-ḳobri ḳali eḳṭau 1:1–10 aeat
(2) Hozrot Paulus kila sahabi oila 1:11–2:21
(3) Shoriot na rohomot? 3–4 ruku
(4) Mumin oḳolor shadinota 5 ruku
(5) Eḳe-oinnor asan ḳoro 6 ruku
1
Allai kush-ḳobri ḳali eḳṭau
Ami Paulus, Isa al-Mosir eḳzon sahabi. Ami kunu manshor hukum-foramishe ba kunu manshor usillae sahabi oisi na. Ḳali Isa al-Mosi ar amrar gaibi baf Alla, zein al-Mosire murda taki zinda ḳori tulchoin, erar ges takiu ḳelafoti faisi. Ami ar amar logor hoḳol mumin baiainte milia, Galatia deshor Isaei zomat oḳolor gese ou sohifaḳan leḳram.
Amrar gaibi baf Alla Pake ar Isa al-Mosie tumrare rohomot ar shanti dan ḳoroukka. Amrar gaibi baf Alla Pakor munshae, hou Isae amrar gunar mafir lagi nizor fobitro zan kurbani disoin, zate ou ḳaraf zomanar at taki amrare basaita faroin. Alla Pakor tarif hor-hamesha zari rouk. Amin.
 
Ami boṛo taijjub oigesi, al-Mosir rohome zein ḍakia ania tumrare nizor bonda banaisoin, tane saṛia tumra kila oto zoldi aroḳ nomunar kush-ḳobrir bae firigelae. Ashole to ita kunu kush-ḳobriu nae. Oile ḳoezon manush ase, zetae tumrar iman loia ḳeiṛ ḳelaira, tara al-Mosir kush-ḳobrire ulṭa-falṭa ḳorilta saira. Huno, amra ze kush-ḳobri tumrar gese toblig korsi, ou kush-ḳobri saṛa dusra kunu kush-ḳobri zudi tumrar gese toblig kora oe, ita zudi amra nizeu ḳori, ba asmani kunu firistae aia ḳoroin, te ogur ufre lannot foṛouk. Ami age zemone ḳoisi, oḳon hirbar oula ḳoiram, agor ze kush-ḳobri tumra mancho, ita saṛa dusra kunu kush-ḳobri ḳeu tumrar gese toblig korle, ogur ufre lannot foṛouk.
10 Ita ḳoria ami ḳar ges taki tarif faitam saiar, kunu manshor ges taki na Allar ges taki? Ami kunu manshore kush ḳorar sesṭa ḳoriar ni? Ami zudi oḳono manshore kush ḳorar sesṭa ḳortam, te ami al-Mosir ḳadim oilam na one.
Hozrot Paulus kila sahabi oila
11 O baisab oḳol, afnara zania raḳoukka, ami ze kush-ḳobri toblig korsi, ita to kunu manshor banail motobad nae. 12 Ami ita kunu manshor ges taki faisi na, ḳeu amare ita hikaiseo na. Ḳali Isa al-Mosie nize amar gese ita zair ḳorsoin.
13 Ami age zebla Ihudi dormo mantam, hou shomoe amar sal-cholon kila asil ita to tumra huncho. Ami Allar zomat oḳolre ḳoto beshi zulum ḳortam, ar itare binash ḳorar sesṭat aslam, eota tumra zano. 14 Amar baf-dadar ges taki faoa shora-rosumot manato ami kub kiali aslam. Erdae amar boeoshi Ihudi oḳolor maze alla-billa ḳorat ami bout aguail aslam. 15 Oile Allae to amar maʼr feṭo taḳteu amare fosond ḳorsoin, tainu nizor rohomote amare daot disoin. Tan munsha asil, 16 ami tan ḳas maear zonor didar faia, oinnainno zatir gese kush-ḳobri toblig kori. Te ou didar faiao ami kunu Adom zator loge foramish ḳorsi na. 17 Ar amar agor kunu sahabir loge mulaḳat ḳorar lagi ami Zeruzalem ṭaun ḳano-o gesi na. Borong ami Arob desho geslamgi, gia guri-firi hirbar Damesk ṭauno aisi.
18 Er tin boros bade sahabi Fitoror loge mulaḳat ḳorar niote Zeruzalem geslam, gia tan ono fonro din aslam. 19 Ou shomoe Hozrot Isar bai sahabi Iakub saṛa, dusra kunu sahabir loge amar deḳa oise na. 20 Eḳ Alla shakki asoin, ami ou zeta leḳlam, er eḳṭa horofo misa nae. Mono raḳba, ou kush-ḳobri to kunu manshor ges taki faisi na, ḳali Isa al-Mosie nize amar gese zair ḳorsoin.
21 Bade ami Shiria ar Kilikia deshor bout zagat geslam. 22 Ou shomoe Ehudia zilar Isaei zomat oḳoleo amare sinta na. 23 Tara ḳali ou ḳobor hunchila, “Age ze beṭae amrar ufre zulum ḳorto, ar Isar namre dunia taki tuṛilito saisil, oḳon hou beṭae al-Mosir imanor kush-ḳobri toblig korer.” 24 Ami iman ania bodoli zaoae, tara Allar shukur-tarif ḳorta.