4
1 Ashole ami buzaitam sairam, bafor hoḳol don-samanat aolador eḳtiar taḳleo, he zotodin nabalik roe otodin aolad ar gulamor maze kunu tofat mile na.
2 Tar bafe ze shomoeor ḳota osiot ḳori zain, otodin he tar murobbi ba zimmadaror aotae roite oe.
3 Ou laḳan amra-o zebla nabalik aslam, hou shomoe duniar nanan sal-cholonor gulam aslam.
4 Oile shomoe fura oia harle, Allae tan ḳas maear zonre bezila. Tain eḳzon nek aorotor feṭo zonom loia, shoriotor hukum-ahkam mafik zindegi ḳaṭaila.
5 Zate shoriotor aotae taḳa manshore azad korta faroin, ar amrareo Allar aolad bonar eḳtiar dein.
6 Erdae tumra Allar aolad bonizaoae tumrar dilo boshot ḳorar lagi, Allae tan ḳas maear zonor ruhre bezisoin. Tumrar dilor ou ruhe to Alla Pakre abba ḳoia ḍaḳoin.
7 Gotikeu tumra gulam roiso na, aolad bonigeso; ar aoladre Allae zeta deoar oada ḳorsila, oḳon tumra eotar malikanao faiso.
Imane mozbut ar ḳaṭi o
8 Age tumra zebla Alla Pakre sintae na, hou shomoe tumra zetar gulami ḳortae, iguin to ashole kunu devtau nae.
9 Oile oḳon to Allare sincho; ashole Allaeu tan nizor forisoe disoin. Te tumra kila hirbar duniabi hou ḳomzur ar batil sal-cholonor bae firizirae? Aroḳbar otar gulam bontae sairae ni?
10 Tumra hirbar omuk ar tomuk din, mash, ritu ar bosorre manrae.
11 Erdae amar ḍor ḳorer, tumrar tole amar oto menot ni maṭi oizae.
12 O bai oḳol, ami tumrare minot ḳoriar, ami zela tumrar laḳan oigesi, tumrao ola amar laḳan o. Tumra to otodin amar kunu ḳeti ḳorso na.
13 Tumrar zana ase, amar shorilo bemar oae, ami tumrar gese foela bar kush-ḳobri tobligor shuzug faislam.
14 Amar bemaror dae tumrar ḳoshṭo oileo, tumra to gin ba ela ḳoria amare falaiso na. Borong Allar kunu firista ba Isa al-Mosire zelaḳan ḳobul ḳortae, ou laḳan amareo ḳobul ḳorso.
15 Oile oḳon tumrar dilor hi eshki gelo kuai? Ami to tumrar befare oḳanu ḳoitam fari, hou shomoe farle tumra nizor ḳoilja kulia amare dilailae one.
16 Te tumrar gese hok kota matae, ami oḳon dushmon oigelam ni?
17 Huno, ou zeguinte tumrar kuz-ḳobor loira, oguin to bod niote aira. Tara sain, tumrare amar bae tone firaia, tarar ashik banaita.
18 Bala niote ola ḳorle faeda oilo one. Oile ami zebla tumrar samne ai, ḳali ou shomoe nae, nek niote hor-hamesha kuz-ḳobor loa bala.
19 O amar fiara aolad oḳol, tumra zotodin al-Mosir laḳan na boncho, otodin ami hirbar tumrar lagi hurutta foedar bishor laḳan soṭfoṭ ḳorram.
20 Amar mone sar, ou foegam leḳa bad dia oḳonu ami nize tumrar gese aia, ṭanḍa matae batchit ḳortam. Te tumrare loia kita ḳortam kunta buzram na.
Bibi Saera ar bandi Hazera taki talim
21 Tumra zera Musar shoriotor gulami ḳortae sao, tumra ḳo sain, shoriote zeta ḳoe ita tumrar ḳano hamae na ni?
22 Allar kalame batae, Ibrahim nobir dui fua asla, foela fua bandi beṭi Hazerar torofa ar dusra fua ashol shadin Bibi Saerar torofa.
23 Bandi beṭir torofa fuar zonom oisil duniar niome, oile ashol shadin bibir fuar zonom oisil Alla Pakor oadae kudroti bole.
24 I mator mani oilo, ou dui beṭi oila duiṭa niom. Eḳ niom Tur Faṛ tone aise, itae tar ḳezmot ḳorra manshore gulamir fote ṭane; ein oila bandi Hazera.
25 Ou Hazera mani Arob deshor Tur Faṛ. Ar Hazera oila ou zogotor Zeruzalem ṭaunor eḳ nomuna, Zeruzalem ṭaune to tar fua-fuṛinre loia bandi bonche.
26 Oile asmani ze Zeruzalem, ein to shadin; einu amrar ma.
27 Asmani kitabe ḳoe, “O niaoladi beṭi, zar kunu hurutta oise na, tumi kushir gozol gao. Hurutta foedar bishe zare dorse na, tumi gola faṭaia zure zure gozol gao. Zamair goror bour saiteo, zar ḳeu nai tair bout beshi aolad oiba.”
28 Bai oḳol, erdaeu tumrar zonom oise Allar oadar Isʼhakor laḳan.
29 Oile hou shomoe duniar niome zar zonom oisil, he zulum ḳorto ou zonre, zein zonom loisoin Allar Pak Ruhur bole; ar oḳono oula zulum or.
30 Erdae deḳo, Allar kalame ḳoe, “Bandire ar tair fuare baṛi tone ḳedai deo; bandir torofa fuae kunumonteu ashol bibir fuar loge, don-samanar baṭ faito nae.”
31 Te O bai oḳol, ou aeate buza zae, amra bandir aolad nae, amra to ashol shadin bibir goror aolad.