5
Mumin oḳolor shadinota
1 O mumin oḳol, al-Mosie amrare shadin ḳorsoin, shadin halote roar lagi. Erdae tumrar shadinotare doria raḳo, gulamir lagam ar findio na.
2 Huno, ami Pauluse tumrare ḳoiram, tumra zudi oḳono mosolmani ḳam ḳorao, te al-Mosir kunu damu to tumrar gese nai.
3 Ami hoḳolor gese hirbar oḳan ḳoiram, ze zonre mosolmani ḳorail oe, tar ufre forz oizae shoriotor tamam hukum-ahkam mana.
4 Tumra zara shoriot amol ḳoria dindar bontae sairae, tumra to al-Mosir ges tone alog oigeso, Allar rohomot tone horigeso.
5 Oile amrare dindar ḳoia ḳobul ḳora oibo, imane ou nichoeota faia Pak Ruhur bole amra bar sairam.
6 Isa al-Mosir ummot bonia harle mosolmani ḳam ḳoraileo zeta, na ḳoraileo ota. Borong mohobbotor mazdi ze iman zair oe, ou imanu oilo ashol.
7 Tumra to bala fote solat aslae; te ou hok fote solte tumrare ḳegie bada dilo?
8 Huno, tumra oḳon ze motobad manrae, ze Allae tumrare fosond ḳori anchoin, i motobad to tan batail fot nae.
9 Zano ni, eḳ fuṭa senae eḳ balti dudre borbad ḳorilae.
10 Te tumrar befare ami malikor dorbaro ou borosha ḳori, tumra dusra kunu motobado zaitae nae. Oile zegie tumrare satar, he ze-u oe na ḳene, tar faona shaza he faibo.
11 O bai oḳol, ami zudi oḳono oḳan ḳoi, manshe mosolmani ḳam ḳorani zorur, te amar ufre ḳene oḳono zulum or? Te duk-koshṭor solibor ufre al-Mosir moutor ḳota hunle zetae muk lukain, tarar muk lukani to bond oigelo one.
12 Erdae ami sairam, tumrar dilo zetae gonḍogul lagaisoin, oguinte tarar asta nofs ḳaṭia falai deuk.
Gunar gulami saṛo, Pak Ruhe ḳaṭi o
13 O bai oḳol, Allae tumrare fosond ḳoria anchoin azad oar lagi. Oile azad bonia tumrar dilor gunar ḳaish furanit lagio na, borong dilor mohobbote eḳe-oinnor ḳezmot ḳoro.
14 Ḳaron asta shoriotreu eḳano ḳoria ḳoa oise, “Tumar ari-forire nizor laḳan maea ḳorio.”
15 Oile tumra zudi eḳe-oinne ḳaijja-fosad ar resha-reshi ḳoro, te hushiar oizao! Ita ḳorle to tumra eḳe-oinnore binash ḳorilibae.
16 Huno, ami tumrare ḳoiram, Pak Ruhur bole zindegi ḳaṭao, teu dilor ou ḳaish miṭanir kial oito nae.
17 Ou ḳaishe zeta ḳoe, ita to Pak Ruhur bifokke, ar Pak Ruhe zeta ḳoin ita bod ḳaishor bifokke. Bod ḳaish ar Pak Ruh era eḳe-oinnor birudi, erdae nek kamor niot ḳoriao tumra ita fura ḳoro na.
18 Ar tumra zudi Pak Ruhur bole zindegi ḳaṭao, te tumra shoriotor gulam nae.
19 Dilor bod ḳaishor ḳam-ḳaz to kula-melau sina zae, ita oilogi zina, nafaki, bodmaishi,
20 devta fuza, zadu-ṭuna, dushmoni, ḳaijja-fosad, lub-lalos, gusa, niz-motlobi, omil, doladoli,
21 ingsha, matlami, hoi-hulla ḳori bojjati ḳora, ar ou nomunar aro bout ḳam. Te ami age zela hushiar ḳorslam, oḳon hirbar oula ḳoiram, dilor ou bod ḳaishor gulami zera ḳore, Allar bashshait tarar kunu ṭai nai.
22 Oile Pak Ruhe sola zindegir fol oilo mohobbot, kushi-bashi, shanti, sobor ḳora, doyalu bab, bala-manshi ḳora, hok-halali roa,
23 norom oa ar nizore shamlaia raḳa. Ou nek kamor birudi kunuzat ain nai.
24 Ar Isa al-Mosir afon ummote to, zarzir rifure, dilor hoḳol bod ḳaish shudda Isa al-Mosir solibo ḳoebor dilaise.
25 Oḳon amra zudi ekin ḳori Pak Ruhur zoriae noea zindegi faisi, te ao, amra Pak Ruhur zimmae zindegi ḳaṭai.
26 Amra behuda boṛai-beṭagiri bad dei, eḳe-oinnore satani ar ingsha-ingshi ekkere saṛi dei.