6
Eḳe-oinnor asan ḳoro
1 O bai oḳol, zomator ḳeu zudi aḳta kunu gunar fando foṛizae, te tumra zera Pak Ruhe zindegi ḳaṭairae, tumra tare tulia anio. Ar kub norom dile i ḳam ḳorio, nizor befareo hushiar roio, zate nizeo fando na foṛo.
2 Tumra eḳe-oinnor bar bo, teu al-Mosir niom furafur mana oibo.
3 Kunta na boniao ze manshe nizor boṛai-bahaduri deḳae, he to nizeu nizore ṭogae.
4 Te forteḳ manshe zarzir amol-ḳaislot forikka ḳorouk. Teu oinnor loge nizor tulona na ḳoria, tar nizor ḳamor lagi boṛai ḳorto farbo.
5 Forteḳ zoneu nizor gaiṭ nize bo.
6 Huno, ze zonre Allar kalam hikail oe, he tar ustador balair lagi ḳezmot ḳorouk.
7 Bai oḳol, tumra be-foti bonio na, Allar loge to ṭaṭṭa-moshkora sole na. Zein zela ḳet ḳorbae, ein ola foshol faibae.
8 Dilor ou bod ḳaishre kush ḳorar lagi ḳet ḳorle, i ḳet taki gozob milbo. Oile Pak Ruhre kush raḳar lagi ḳet ḳorle, i Pak Ruh taki aḳeri zindegi milbo.
9 Nek kam ḳorat lagia amra zanu nirash na oi. Hamesha lagia roile ṭik shomoye er foshol faimu.
10 Shuzug faileu amra zanu hoḳol manshor, ḳas ḳori Allar foribaror manshor asan ḳori.
Aḳeri nosiot
11 Deḳrae ni, ḳoto muṭa muṭa horofe ami nizor ate tumrar gese leḳsi!
12 Zeguinte tarar nizor bala-manshi zair ḳorto sae, otae tumrare mosolmani ḳam ḳoranir lagi tagid der. Al-Mosir solibor lagi zate tarar ufre kunu zulum na oe, zulum taki basar lagi tara ita ḳorer.
13 Huno, mosolmani ḳam zetae ḳoraisoin, otaeo to shoriotor borkelaf ḳoroin. Oile erbadeo tara tumrare mosolmani ḳoraito sae, zate tara boṛai ḳoria ḳoito fare tumrao tarar dolo aso.
14 Oile ami ḳoiram, ḳali Isa al-Mosir solib saṛa dusra kunu befareu ami boṛai ḳori na. Ou solibor mazdiu i dunia amar gese morigese, ar amio duniar sokut morigesi.
15 Erdae mosolmani ḳam ḳoraileo zeta, na ḳoraileo ota. Al-Mosir zoriae hirbar noea foeda oau oilo ashol befar.
16 Ar ou imane zera zindegi ḳaṭae, mani ḳaṭi Allar bondare, tain rohom ar shanti dan ḳoroukka.
17 Hesh-mesh ḳoiram, Hozrot Isar lagi mair ḳaia ḳoto nomunar zoḳom amar nizor shorilo loia sokkor diar. Te amare ḳeu duk dio na.
18 Bai oḳol, amrar munib Isa al-Mosir rohomot tumrar dilo ḳaim rouk. Amin.