27
Hakim Filator samne Hozrot Isa
1 Biane uṭia boṛo imam ar murobbi oḳole Hozrot Isare ḳatol ḳorar foramish ḳorla.
2 Tara tanre bandia Ruman hakim Filator gese loia gela.
Ihudar moron
3 Ze zone Hozrot Isare dushmonor ato dorai disil, hou Ihudae zebla deḳlo bisaro tanre dushi shaibosto ḳora oise, ou tar bitre kub duk hamailo. He boṛo imam ar murobbi oḳolor gese hou rufar tish ṭeḳa loia aia ḳoilo,
4 “Ami to eḳzon ni-oforadi manshore ḳatol ḳorar lagi dorai dia guna ḳorsi.” Ikan hunia tara ḳoila, “Teu amrar kita oilo? Ita to tumar befar.”
5 Ou shomoe Ihudae hou tish ṭeḳa Baetul-Mukaddoso iṭa mari falaia gelogi, gia nize nizeu fash lagia morigelo.
6 Boṛo imam oḳole i ṭeḳa ato loia ḳoila, “Iguin to Baetul-Mukaddosor tohbilo raḳa ṭik nae, ḳaron ita oilo lour dam.”
7 Bade tara foramish ḳoria ou ṭeḳadi musafir manshor ḳobrostanor lagi ek kumaror ges taki zaga loila.
8 Erlagi ou zagare oḳono ‘lour zaga’ ḳoa oe.
9 Ita oae, Iaromia nobir mazdi zeta batail oisil, ota foligelo. Tain ḳoisla, “Tara ze tish ṭeḳa nilo, ikṭa oilo tan dam. Boni Israile tan ou dam shaibosto ḳorsil.
10 Allae amare zela hukum disoin, olau tara kumaror zaga loar lagi ṭeḳaguin dilo.”
Hakim Filator adaloto Hozrot Isa
11 Hozrot Isare Ruman fordan hakim Filator adaloto azir ḳora oilo. Hakime tanre zikaila, “Kita ba, tumi Ihudi oḳolor bashsha ni?” Tain ḳoila, “Ji-oe, afne ṭiku ḳoira.”
12 Boṛo imam ar murobbi oḳole tan name bout nalish dila. Oile Isae kunu zuaf dila na.
13 Ou shomoe Filate zikaila, “Tumi kunu zuaf ditae na ni? Deḳrae ni, tara tumar birudde ḳoto nalish dira.”
14 Oile Isae itar eḳano zuaf na deoae Filat kub taijjub oigela.
15 Deshor fordan hakimor niom asil, Azadi Idor shomoe manshor fosond mafik eḳzon azotire ḳalas dita.
16 Ou shomoe Isa-Barabba namor eḳ namḳora azoti zelo asil.
17 Hoḳol manush eḳano dola oar bade hakim Filate tarare zikaila, “Tumra kita ḳo? Ami ḳare saṛtam, Isa-Barabbare, na hou Isare, zare al-Mosi ḳoa oe?”
18 Filate zanta, boṛo imam oḳole ingsha ḳoria Hozrot Isare nia tan ato disoin.
19 Filat zebla hakimor ashono boat, ou shomoe tan bibie ḳobor faṭaia zanaila, “Ou ni-oforad manshore tumi kunta ḳorio na, tan befare ami aiz eḳṭa kuab dekia boṛo duk lagse.”
20 Oile boṛo imam ar murobbi oḳole manshore uskaia dila, tara zanu Barabbar mukti sain ar Isare ḳatol ḳorar ḳota ḳoin.
21 Bade fordan hakim Filate onor manshore zikaila, “Ou duio zonor maze ami ḳare saṛtam?” Tara ḳoila, “Barabbare.”
22 Teu Filate tarare zikaila, “Te tumra zare al-Mosi ḳo, hou Isare kita ḳortam?” Tara hoḳole sillani lagailo, “Tare solibo gatia maro.”
23 Tain ḳoila, “Ḳene, he kita dush ḳorse?” Oile manshe aro zure zure misil lagailo, “Solibo deo, solibo deo.”
24 Filate zebla deḳla, tain kunumonteu Isare basaita farra na, borong gonḍogul aro baṛer, ou tain fani dia hoḳolor samne tan at doia ḳoila, “I manshor lour daei ami nae, tumrau er zuaf dibae.”
25 Teu hoḳol manshe ḳoila, “Ṭik ase, amra ar amrar aolad oḳol i lour daei oimu.”
26 Teu Filate tarare kushi ḳorta ḳori Barabbare ḳalas dilaila. Ar Isare besh ḳori sabuk maria, solibo deoar hukum dila. (Solib oilo laḳṛidi banail manshore loṭḳaia marar eḳ zinish.)
Sifai oḳolor ṭaṭṭa-moshkora
27 Bade Filator sifai oḳole Isare doria tarar kempor bitre loia gelo. Hono asta sifai dol dia tanre ber ḳori raḳlo.
28 Tara tan finnor ḳafoṛ-sufoṛ kulia, lal-baingoni rongor bashshai lebas findailo.
29 Ar gosa-ḳaṭa dia raz-mukuṭ banaia tan matat dilo. Tan ḍain ato dilo eḳṭa raz-laṭi. Tane ijjot deḳanir ban ḳoria tan samne aṭu gaṛia boia ḳoilo, “Ihudir bashsha, marhaba.”
30 Ou shomoe tara tan ufre sef dilo ar ou laṭi dia bare bare tan matat marlo.
31 Ou laḳan ṭaṭṭa-moshkora ar bettomizi ḳorar bade tan finnor baingoni lebas kulia, tan nizor ḳafoṛ findailo. Tanre solibo nia ḳatol ḳorar lagi roana dilo.
Solibor ufre Hozrot Isa
32 Sifai dole Isare loia zaira, ou shomoe tara Kurini elaḳar Saimon namor eḳzon manshore deḳlo. Sifai oḳole zur ḳoria enedi hou solib boaia neoailo.
33 Tara Isare loia Golgata, mani ‘ḳollar saṛ’ namor zagat gelo.
34 Hono nia hari mura namor oshud furail anguror shorbot tan muko dilo, oile tain ita ḳaila na.
35 Bade tara Isare nia ou solibo gatilo. Sifai oḳole tan ḳafoṛ-sufoṛ baṭia neoar lagi loṭari maria baiggo forikka ḳorlo.
36 Ar tara ono boia tanre fara dilo.
37 Solibo tan matar ufre oforad-namar maze leḳlo, “En nam Isa, Ihudir bashsha.”
38 Duizon ḍaḳaitreo tan loge loṭḳail oilo, eḳzon ḍain galat, oinnozon bau galat.
39 Fotedi zera zaoat asil tara mata laṛaia Isare siṛaia ḳoilo,
40 “Oi mia, tumi bule Baetul-Mukaddos kaba gor bangia tin dinor maze hirbar banailibae! Te oḳon nizor zan basao na. Tumi bule Allar ḳas maear zon Ibnulla, te solib taki lamia ao na.”
41 Boṛo imam, moulana ar murobbi oḳoleo tanre siṛaia ḳoila,
42 “He bule manshor zan basaito, oḳon to nizor zanu basaito farer na. Hirbar Boni Israilor bashshao bule he! Te oḳon farle solib taki lamia auk, teu amra-o ota dekia tar ufre iman anmu.
43 He to Allar ufre borosha ḳore. Oḳon Alla zudi tar ufre kushi taḳoin, te tare basaukka. He to dabi ḳorto, he Ibnulla, Alla Pakor ḳas maear zon.”
44 Tan ḍaine-baue ze dui ḍaḳaitre solibo loṭḳail oisil, tarao tanre ota ḳoia siṛailo.
Hozrot Isa al-Mosir ufat
45 Ou din duifor taki zuhoror bad forzonto tin gonṭa asta desh andair oigelo.
46 Ar Isae kub zure zure ḳoila, “Eloi, eloi, lama sabaktani?” Mani, “O amar Alla, amar Moula, tumi ḳene amar log saṛi dilae?”
47 Ou shomoe tan daro zara uba asil, tara ikan hunia ḳoila, “Huno, huno, he Hozrot Iliasre ḍaḳer.”
48 Tara eḳzone douṛaia gia eḳan tena ania ṭenga anguror shorbotor maze bizaia, eḳ laṭir matat bandia usa ḳori tanre ḳaite dilo.
49 Baki hoḳole ḳoilo, “Aichcha, deki na, Ilias nobi tare basanit ain ni.”
50 Heshe Isae hirbar zure aoaz ḳoria aḳeri dom falaia inteḳal ḳorla.
51 Loge loge Baetul-Mukaddos mani kaba goror herem shorifor fordaḳan, ufre taki tol forzonto siṛia dui ṭukra oigelo. Ar boisalor loge boṛo boṛo fattor oḳol faṭigelo.
52 Bout ḳoeboror muk kuligelo, ar Allar maear ze bonda oḳol mara gesla, era bout zon zinda oia uṭla.
53 Tara ḳoebor taki baroia aila. Isa murda taki zinda oia harle, tara fobitro ṭauno gia hamaila, ar bout zonre deḳa dila.
54 Fordan sifair loge aro zeta sifai oḳole Isare fara deoat asla, tara ou boisal ar hoḳol halot dekia kub ḍoraia ḳoila, “Nichchoe, einu asla Allar ḳas maear zon, Ibnulla.”
55 Galil zila taki zeta beṭinte Isar ḳezmot ḳorar lagi tan loge oia aisla, tarao duroi ubaia ita deḳla.
56 Erar maze asla Mogdilini Moriom, Iusi ar Iakubor ma Moriom, ar Zibudiar bou.
Hozrot Isar rouza mubarok
57 Ou din hainjabala Arimatia gaur Iusuf namor eḳzon doni manush hono aila. Tain Isar eḳ shagrid asla.
58 Tain hakim Filator gese aia, Hozrot Isar lash nita saila. Teu Filate tanre lash neoar izazot dila.
59 Iusufe Isar lash solib taki lamaia ḳafon findaila.
60 Tain faṛ ḳaṭia nizor lagi ze ḳoebor kudisla, ou ḳoeboror maze Isare dafon ḳorla. Bade boṛo eḳ fattor ṭelia ania ḳoeboror muko dia gelagi.
61 Oile Mogdilini Moriom ar aroḳ Moriom ou ḳoeboror daro boi roila.
62 Bador din Zummabare boṛo imam ar Forishi oḳol aia hakim Filator gese ḳoila,
63 “Huzur, amrar mono ase, ou ṭoge zinda taḳte ḳoisil, he bule morar tin din bade hirbar zinda oia uṭbo.
64 Erlagi afne hukum deukka, ḳoeborṭa zanu tin din forzonto ḳoṛa fara dia raḳa oe. Arnae tar ummot oḳole tar lash suri ḳori nia manshore ḳoito fare, tain to zinda oigesoin. Taile age zeta ḳoia duka dise, oḳon aro beshi duka dibo.”
65 Filate ḳoila, “Tumra faradar oḳolre neo, nia zela faro, ola fara deoar bebosta ḳoro.”
66 Ou tara gia ḳoeboror muko ze fattor asil, ou fattoror ufre sil-sappoṛ mari toila ar ḳoṛaḳoṛi fara deoar bebosta ḳorla.