28
Hozrot Isa moutor bade zinda oila
1 Zummabar shesh oia haftar foela din fozor oḳto, Mogdilini Moriom ar oinno Moriome Hozrot Isar ḳoebor deḳat gela.
2 Ou shomoe aḳtau boṛo eḳ boisal oilo ar asman taki Allar eḳ firista lamia aila. Aia tain ḳoeboror mukor fattorṭa horaia, er ufre boila.
3 Tan surot asil kub nurani ar finnor ḳafoṛ asil dola soḳsoḳa.
4 Tanre dekia faradar oḳole ḍoraia ḳafa dorla ar tara beush oia foṛi roila.
5 Firistae ou beṭintore ḳoila, “Ḍoraio na go. Ami zani, solibo loṭḳaia zare ḳatol ḳora oise, tumra hou Isareu tukairae.
6 Oile tain to ino nae. Tain zela ḳoisla, olau zinda oia uṭi gesoin. Ao, tanre ze zagat hutaia raḳa oisil, oḳan aia deḳo.
7 Ar tumra zoldi zao, gia tan sahabi oḳolre ḳo, tain murda taki zinda oia tarar age oia Galilo zairagi. Honou tan loge tarar deḳa oibo. Huno, ami ageu tumrare ikan zanai dilam.”
8 Beṭinte zudio ḍoraisla, tebou tara kushir suṭe tan sahabi oḳolre i ḳobor zananir lagi douṛaia roana oila.
9 Ou shomoe aḳtau Hozrot Isa aia erare salam dila. Loge loge tara tan samne aia faot doria ḳodombusi ḳorla.
10 Isae tarare ḳoila, “Ḍoraio na go. Tumra gia amar baiainre ḳo, tara Galilo zaitagi. Hono tarar loge amar deḳa oibo.”
11 Isar logor batchit shesh ḳoria tara zebla zairagi, ou shomoe hou faradaror ḳoezone ṭauno gia boṛo imam oḳolre ita hokkolta zanaila.
12 Teu boṛo imam ar murobbi oḳol eḳano dola oia foramish ḳorla, ou faradar sifai oḳolre bout ṭeḳa dibar lagi.
13 Tara sifai oḳolre ḳoila, “Tumra ḳoio, ‘Amra zebla gumo aslam, ou shomoe shagrid oḳole aia tan lash suri ḳori nisoingi.’
14 Ikan zudi deshor fordan hakim sabe hunilain, te amra tanre buz dimu, tan at taki tumrare basaimu.”
15 Teu faradar oḳole ou ṭeḳa nila, ar tarare zela hikail oisil, ola ḳoila. Oḳon forzonto i misa ḳota Ihudi shomazo roṭail ase.
Hozrot Isa al-Mosir aḳeri hukum
16 Isae tan sahabi oḳolre Galilor ze faṛo zaoar ḳota ḳoisla, hou egaro zon sahabi ou faṛo aila.
17 Aia Isare dekia tara soizda ḳorla, ermaze ḳoezonor bitre shondoe asil.
18 Ou shomoe Isa tarar ḳandat aia ḳoila, “Behest ar duniar hokkol ḳemota amare deoa oise.
19 Erlagi tumra gia tamam zatir manshore amar ummot banao. Behesti baba Alla Pak, tan ḳas maear zon Ibnulla, ar Pak Ruhur name manshore torikar gusol ḳorao.
20 Ami tumrare zeta hukum disi, ota amol ḳorar lagi tarare talim deo. Mono rakio, kiamotor ag forzonto shob shomoe ami tumrar loge loge asi.” Amin.