ꠀꠟ-ꠎꠛꠥꠞ ১১
ꠄꠛꠣꠖꠔ-ꠛꠘ꠆ꠖꠦꠉꠤ ꠙꠞꠤꠌꠣꠟꠇꠞ ꠟꠣꠉꠤ: ꠢꠎꠞꠔ ꠖꠣꠃꠖꠞ ꠝꠤꠎꠝꠞ।
1 ꠀꠝꠤ ꠔ ꠝꠣꠛꠥꠖꠞ ꠉꠦꠍꠦꠃ ꠀꠡꠞꠄ ꠟꠁꠍꠤ,
ꠔꠦ ꠔꠥꠝꠞꠣ ꠇꠦꠘꠦ ꠀꠝꠣꠞꠦ ꠇꠁꠞꠣꠄ,
“ꠅ ꠙꠣꠈꠤ, ꠔꠥꠝꠣꠞ ꠀꠡꠞꠄ ꠙꠣꠠꠦꠖꠤ ꠜꠣꠉꠤꠀ ꠎꠣꠅ।
2 ꠛꠎ꠆ꠎꠣꠔꠞ ꠖꠟꠦ ꠗꠘꠥꠇꠞꠦ ꠙꠥꠞꠣꠙꠥꠞ ꠎꠥꠁꠔ ꠇꠞꠤ ꠗꠞꠍꠦ,
ꠡꠞꠟ ꠝꠣꠘꠡꠞꠦ ꠀꠘ꠆ꠖꠣꠞꠤꠔ ꠝꠣꠞꠔ ꠇꠞꠤ ꠔꠤꠞ ꠟꠣꠉꠣꠁꠍꠦ।
3 ꠜꠣꠋꠉꠤꠀ ꠙꠠꠤ ꠎꠣꠄ ꠎꠥꠖꠤ ꠡꠝꠣꠎꠞ ꠝꠥꠟ ꠙꠤꠟꠣꠞ,
ꠁꠟꠣ ꠅꠁꠟꠦ ꠇꠤꠔꠣ ꠇꠞꠛ ꠎꠣꠞꠣ ꠙꠞꠦꠎꠉꠣꠞ?”
4 ꠝꠣꠛꠥꠖ ꠔ ꠞꠂꠘ ꠔꠣꠘ ꠙꠛꠤꠔ꠆ꠞ ꠝꠥꠇꠣꠝꠅ,
ꠔꠣꠘ ꠀꠞꠡ-ꠇꠥꠞꠍꠤ ꠛꠅꠀꠁꠟ ꠀꠍꠦ ꠀꠍꠝꠣꠘꠅ,
ꠀꠖꠝ ꠎꠣꠔꠤꠞꠦ ꠞꠣꠈꠂꠘ ꠔꠣꠘ ꠌꠈꠥꠞ ꠘꠎꠞꠅ।
5 ꠜꠣꠟꠣ-ꠛꠥꠞꠣ ꠢꠇꠟꠞꠦ ꠎꠣꠌꠣꠁ ꠇꠞꠂꠘ ꠝꠣꠛꠥꠖꠦ,
ꠎꠣꠟꠤꠝ ꠅꠇꠟ ꠔꠣꠘ ꠖꠥꠡꠝꠘ, ꠊꠤꠘ ꠇꠞꠂꠘ ꠔꠣꠞꠣꠞꠦ।
6 ꠛꠎ꠆ꠎꠣꠔꠞ ꠃꠙꠞꠦ ꠓꠣꠟꠤꠛꠣ ꠔꠣꠁꠘ ꠎꠣꠟꠣꠁꠟ ꠉꠘ꠆ꠖꠇ ꠀꠞ ꠀꠋꠞꠣ,
ꠉꠞꠝ ꠀꠉꠥꠘꠤꠞ ꠉꠥꠟ꠆ꠟꠣꠃ ꠅꠁꠛ ꠔꠣꠞꠣꠞ ꠈꠣꠘꠤ-ꠙꠣꠘꠤ ꠢꠣꠝꠦꠡꠣ।
7 ꠝꠣꠛꠥꠖ ꠘꠤꠎꠦ ꠙꠞꠦꠎꠉꠣꠞ, ꠙꠍꠘ꠆ꠖ ꠇꠞꠂꠘ ꠙꠞꠦꠎꠉꠣꠞꠞꠦ,
ꠢꠇ-ꠘꠤꠈꠥꠔ ꠛꠘ꠆ꠖꠣꠄ ꠙꠣꠁꠛꠣ ꠔꠣꠘ ꠝꠥꠈꠞ ꠖꠤꠖꠣꠞꠞꠦ॥