ꠀꠟ-ꠎꠛꠥꠞ ২১
ꠄꠛꠣꠖꠔ-ꠛꠘ꠆ꠖꠦꠉꠤ ꠙꠞꠤꠌꠣꠟꠇꠞ ꠟꠣꠉꠤ: ꠢꠎꠞꠔ ꠖꠣꠃꠖꠞ ꠝꠤꠎꠝꠞ।
1 ꠅ ꠝꠣꠛꠥꠖ, ꠔꠥꠝꠣꠞ ꠛꠟ-ꠔꠣꠇ꠆ꠇꠔꠦ ꠛꠣꠖꠡꠣꠄ ꠈꠥꠡꠤ ꠇꠞꠞꠣ,
ꠔꠥꠝꠤ ꠎꠥꠖ꠆ꠖꠔ ꠎꠤꠔꠣꠘꠤꠄ ꠔꠣꠁꠘ ꠈꠥꠛ ꠈꠥꠡꠤ-ꠛꠣꠡꠤ ꠇꠞꠞꠣ।
2 ꠔꠣꠘ ꠝꠘꠞ ꠀꠡꠣ ꠔꠥꠝꠤ ꠙꠥꠞꠣꠁꠍ,
ꠔꠣꠘ ꠝꠥꠈꠞ ꠀꠛꠖꠣꠞꠞꠦ ꠔꠥꠝꠤ ꠚꠤꠞꠣꠁ ꠖꠤꠍ ꠘꠣ।
(ꠍꠦꠟꠣ)
3 ꠛꠃꠔ ꠞꠢꠝ-ꠛꠞꠇꠔ ꠟꠁꠀ ꠔꠥꠝꠤ ꠔꠣꠘ ꠉꠦꠍꠦ ꠀꠁꠍ,
ꠈꠣꠐꠤ ꠡꠥꠘꠣꠞ ꠝꠥꠇꠥꠐ-ꠔꠣꠎ ꠔꠣꠘ ꠝꠣꠕꠣꠔ ꠚꠤꠘ꠆ꠖꠣꠁꠍ।
4 ꠛꠣꠖꠡꠣꠄ ꠔꠥꠝꠣꠞ ꠖꠞꠛꠣꠞꠅ ꠌꠣꠁꠟꠣ ꠎꠤꠘ꠆ꠖꠦꠉꠤ,
ꠀꠞ ꠔꠣꠘꠞꠦ ꠖꠤꠟꠣꠄ ꠔꠥꠝꠤ ꠌꠤꠞꠇꠣꠟꠞ ꠢꠣꠄꠀꠔꠤ।
5 ꠔꠥꠝꠣꠞ ꠖꠦꠅꠀ ꠎꠄꠄ ꠛꠣꠠꠣꠁꠍꠦ ꠔꠣꠘ ꠁꠎ꠆ꠎꠔ,
ꠉꠃꠞꠛ-ꠝꠢꠤꠝꠣ ꠖꠤꠍ ꠔꠣꠘꠦ ꠔꠥꠝꠣꠞꠃ ꠞꠢꠝꠔ।
6 ꠔꠣꠘꠞꠦ ꠖꠤꠍ ꠔꠥꠝꠤ ꠌꠤꠞꠇꠣꠟꠤꠘ ꠛꠞꠇꠔ,
ꠔꠥꠝꠣꠞ ꠙꠣꠇ ꠖꠤꠖꠣꠞꠅ ꠖꠤꠍ ꠔꠣꠘꠞꠦ ꠈꠥꠡꠤꠞ ꠘꠤꠀꠝꠔ।
7 ꠛꠣꠖꠡꠣꠄ ꠔ ꠝꠣꠛꠥꠖꠞ ꠃꠙꠞꠦꠃ ꠜꠞꠡꠣ ꠇꠞꠂꠘ,
ꠀꠟ꠆ꠟꠣꠔꠣꠟꠣꠞ ꠖꠄꠀ-ꠝꠣꠄꠀꠄ ꠔꠣꠁꠘ ꠝꠎꠛꠥꠔ ꠞꠂꠘ।
8 ꠅ ꠛꠣꠖꠡꠣ, ꠔꠥꠝꠣꠞ ꠀꠔꠦ ꠖꠥꠡꠝꠘ ꠙꠣꠟꠞꠦ ꠗꠞꠛ,
ꠒꠣꠁꠘ ꠀꠔꠦ ꠔꠥꠝꠣꠞ ꠛꠤꠞꠥꠗꠤꠞꠦ ꠔꠣꠟ꠆ꠟꠣꠡ ꠇꠞꠤ ꠀꠘꠛ।
9 ꠔꠥꠝꠤ ꠀꠁꠛꠣꠞ ꠇꠣꠟꠅ ꠁꠔꠣꠞꠦ ꠀꠉꠥꠘꠤꠞ ꠇꠥꠘ꠆ꠒꠟꠤ ꠛꠣꠘꠣꠁꠛꠣꠄ,
ꠀꠉꠥꠁꠘꠦ ꠔꠣꠞꠣꠞꠦ ꠀ ꠇꠞꠤ ꠉꠤꠟꠛ ꠝꠣꠛꠥꠖꠞ ꠉꠥꠍꠣꠄ।
10 ꠖꠥꠘꠤꠀ ꠕꠣꠇꠤ ꠝꠤꠐꠣꠁꠟꠤꠛꠣꠄ ꠁꠔꠣꠞ ꠀꠅꠟꠣꠖ ꠅꠇꠟꠞ ꠘꠣꠝ,
ꠀꠖꠝ ꠎꠣꠔ ꠕꠣꠇꠤ ꠚꠥꠍꠤꠟꠤꠛꠣꠄ ꠔꠣꠞꠣꠞ ꠡꠛ ꠈꠣꠘ꠆ꠖꠣꠘ।
11 ꠔꠥꠝꠣꠞ ꠛꠤꠙꠇ꠆ꠇꠦ ꠇꠥ-ꠝꠔꠟꠛꠦ ꠚꠣꠘ꠆ꠖ ꠙꠣꠔꠤꠍꠦ ꠔꠣꠞꠣ,
ꠔꠣꠞꠣꠞ ꠁꠔꠣ ꠢꠇꠟꠔꠣꠃ ꠅꠁꠛ ꠛꠦꠇꠣꠝꠣ।
12 ꠔꠣꠞꠣꠞ ꠝꠥꠈꠞꠦ ꠘꠤꠡꠣꠘ ꠇꠞꠤꠀ ꠔꠥꠝꠣꠞ ꠗꠘꠥꠇꠅ ꠝꠣꠞꠟꠦ ꠐꠣꠘ,
ꠙꠤꠑ ꠊꠥꠞꠣꠁꠀ ꠜꠣꠉꠤꠀ ꠔꠣꠞꠣ ꠛꠣꠌꠣꠁꠔ ꠌꠣꠁꠛ ꠎꠣꠘ।
13 ꠔꠥꠝꠣꠞ ꠛꠟ-ꠡꠇ꠆ꠔꠤ ꠎꠣꠁꠞ ꠇꠞꠅ ꠅꠉ ꠀꠝꠣꠞ ꠀꠟ꠆ꠟꠣ,
ꠉꠣꠘ-ꠛꠣꠎꠘꠣꠄ ꠉꠣꠁꠝꠥ ꠀꠝꠞꠣ ꠔꠥꠝꠣꠞ ꠟꠤꠟꠣ-ꠈꠦꠟꠣ॥