ꠀꠟ-ꠎꠛꠥꠞ ২২
ꠄꠛꠣꠖꠔ-ꠛꠘ꠆ꠖꠦꠉꠤ ꠙꠞꠤꠌꠣꠟꠇꠞ ꠟꠣꠉꠤ: ‘ꠛꠤꠀꠘꠇꠥꠞ ꠢꠞꠤꠘꠤ’ ꠡꠥꠞꠦ।
ꠢꠎꠞꠔ ꠖꠣꠃꠖꠞ ꠝꠤꠎꠝꠞ।
1 ꠅ ꠀꠝꠣꠞ ꠀꠟ꠆ꠟꠣ, ꠀꠝꠣꠞ ꠝꠃꠟꠣ, ꠔꠥꠝꠤ ꠇꠦꠘꠦ ꠀꠝꠣꠞ ꠟꠉ ꠍꠣꠠꠤ ꠖꠤꠟꠣꠄ?
ꠀꠝꠣꠞꠦ ꠘꠣ ꠛꠣꠌꠣꠁꠀ ꠀꠝꠣꠞ ꠇꠣꠘ꠆ꠖꠘ ꠘꠣ ꠢꠥꠘꠤꠀ ꠇꠦꠘꠦ ꠖꠥꠞꠁ ꠢꠞꠤꠀ ꠞꠁꠟꠣꠄ?
2 ꠅ ꠀꠝꠣꠞ ꠀꠟ꠆ꠟꠣ, ꠀꠝꠤ ꠖꠤꠘꠞ ꠛꠣꠟꠣ ꠒꠣꠇꠤꠟꠣꠝ ꠔꠥꠝꠤ ꠇꠥꠘꠥ ꠎꠥꠀꠙ ꠘꠣ ꠖꠤꠟꠣꠄ,
ꠞꠣꠁꠔꠞ ꠛꠣꠟꠣꠅ ꠘꠣ ꠒꠣꠇꠤꠀ ꠀꠝꠤ ꠞꠁ ꠘꠣ ꠘꠤꠞꠣꠁ।
3 ꠅꠁꠟꠦ ꠔꠥꠝꠤꠃ ꠔ ꠙꠣꠇ-ꠙꠛꠤꠔ꠆ꠞ,
ꠛꠘꠤ ꠁꠍꠞꠣꠁꠟꠞ ꠉꠣꠅꠀ ꠙ꠆ꠞꠡꠋꠡꠣ-ꠔꠣꠞꠤꠚꠃ ꠔꠥꠝꠣꠞ ꠞꠣꠎ-ꠉꠖꠤ।
4 ꠀꠝꠞꠣꠞ ꠝꠄ-ꠝꠥꠞꠛ꠆ꠛꠤꠄ ꠔꠥꠝꠣꠞ ꠃꠙꠞꠦ ꠄꠇꠤꠘ ꠞꠣꠈꠍꠂꠘ,
ꠔꠣꠞꠣ ꠔꠥꠝꠣꠞ ꠃꠙꠞꠦ ꠜꠞꠡꠣ ꠇꠞꠣꠄ ꠔꠥꠝꠤꠅ ꠔꠣꠞꠣꠞꠦ ꠛꠣꠌꠣꠁꠔꠣꠄ।
5 ꠔꠥꠝꠣꠞ ꠖꠞꠛꠣꠞꠅ ꠚꠞꠤꠀꠖ ꠇꠞꠤꠀ ꠎꠣꠘ-ꠝꠣꠘ ꠛꠣꠌꠣꠁꠔꠣ,
ꠔꠣꠞꠣ ꠜꠞꠡꠣ ꠇꠞꠤꠀ ꠔ ꠡꠞꠝ ꠙꠣꠁꠍꠂꠘ ꠘꠣ।
6 ꠅꠁꠟꠦ ꠀꠝꠤ ꠔ ꠝꠣꠘꠥꠡ ꠘꠣꠄ, ꠈꠣꠟꠤ ꠄꠟꠣꠝꠤꠞ ꠄꠇ ꠇꠤꠠꠣ-ꠙꠥꠇ,
ꠝꠣꠘꠡꠦ ꠀꠝꠣꠞꠦ ꠟꠁꠀ ꠈꠣꠃꠞꠤ ꠈꠣꠄ ꠑꠣꠐ꠆ꠐꠣ ꠇꠞꠤꠀ ꠍꠤꠠꠣꠄ।
7 ꠎꠔ ꠎꠘꠦ ꠀꠝꠣꠞꠦ ꠖꠦꠈꠦ, ꠢꠇ꠆ꠇꠟꠦ
ꠑꠥꠐ ꠛꠦꠇꠣꠁꠀ ꠐꠤꠐꠇꠣꠞꠤ ꠝꠣꠞꠤꠀ ꠇꠄ,
8 “ꠢꠦ ꠎꠦꠛꠟꠣ ꠝꠣꠛꠥꠖꠞ ꠃꠙꠞꠦ ꠇꠞꠦ ꠜꠞꠡꠣ,
ꠔꠦ ꠅꠈꠘ ꠖꠦꠈꠤ ꠔꠣꠁꠘ ꠔꠣꠞꠦ ꠛꠣꠌꠣꠃꠇ꠆ꠇꠣ,
ꠔꠣꠁꠘ ꠎꠦꠛꠟꠣ ꠔꠣꠞ ꠃꠙꠞꠦ ꠈꠥꠡꠤ ꠀꠞ ꠞꠣꠎꠤ,
ꠅꠈꠘ ꠔꠣꠞꠦ ꠞꠇ꠆ꠇꠣ ꠇꠞꠂꠘ ꠘꠤ ꠖꠦꠈꠤ।”
9 ꠝꠣʼꠞ ꠙꠦꠐꠅ ꠕꠣꠇꠤ ꠔꠥꠝꠤꠃ ꠀꠝꠣꠞꠦ ꠎꠉꠔꠅ ꠀꠘꠟꠣꠄ,
ꠝꠣʼꠞ ꠖꠥꠗ ꠈꠣꠅꠀꠞ ꠡꠝꠄꠅ ꠀꠝꠣꠞꠦ ꠜꠞꠡꠣ ꠖꠤꠟꠣꠄ।
10 ꠎꠘꠝ ꠕꠣꠇꠤ ꠀꠝꠣꠞꠦ ꠔꠥꠝꠣꠞ ꠀꠔꠅ ꠡꠙꠤ ꠖꠦꠅꠀ ꠅꠁꠍꠦ,
ꠝꠣʼꠞ ꠙꠦꠐꠅ ꠕꠣꠇꠤꠃ ꠔꠥꠝꠤ ꠀꠝꠣꠞ ꠀꠟ꠆ꠟꠣ।
11 ꠅꠈꠘ ꠀꠝꠣꠞꠦ ꠚꠣꠟꠣꠁꠀ ꠔꠥꠝꠤ ꠢꠞꠤꠀ ꠞꠁꠅ ꠘꠣ,
ꠍꠣꠝꠘꠦ ꠛꠃꠔ ꠛꠠ ꠛꠤꠙꠖ, ꠀꠝꠣꠞꠦ ꠛꠣꠌꠣꠘꠤꠞ ꠖꠥꠍꠞꠣ ꠇꠦꠃ ꠘꠣꠁ।
12 ꠎꠋꠟꠤ ꠛꠤꠍꠣꠟꠞ ꠙꠣꠟꠞ ꠟꠣꠈꠣꠘ ꠔꠣꠞꠣ ꠀꠝꠣꠞꠦ ꠛꠦꠞꠤꠟꠤꠍꠂꠘ,
ꠛꠣꠡꠘ ꠖꠦꠡꠞ ꠙꠄꠟꠥꠀꠘ ꠛꠟꠖ ꠅꠇꠟꠦ ꠀꠝꠣꠞꠦ ꠀꠐꠇꠣꠁꠍꠂꠘ।
13 ꠉꠞ꠆ꠎꠘ ꠇꠞꠞꠣ ꠙꠣꠡꠣꠘ ꠡꠤꠋꠢꠞ ꠟꠣꠈꠣꠘ ꠔꠣꠞꠣ,
ꠀ ꠇꠞꠤꠀ ꠀꠝꠣꠞꠦ ꠉꠤꠟꠤꠟꠤꠔꠣ ꠌꠣꠁꠞꠣ।
14 ꠛꠞꠛꠣꠖ ꠙꠣꠘꠤꠞ ꠟꠣꠈꠣꠘ ꠀꠝꠣꠞꠦ ꠓꠣꠟꠤꠀ ꠚꠣꠟꠣꠁ ꠖꠦꠅꠀ ꠅꠁꠍꠦ,
ꠀꠝꠣꠞ ꠀꠡ꠆ꠔꠣ ꠡꠞꠤꠟꠞ ꠀꠒ꠆ꠒꠤ-ꠉꠥꠒ꠆ꠒꠤꠞ ꠎꠥꠠꠣ ꠍꠥꠐꠤ ꠉꠦꠍꠦ,
ꠀꠝꠣꠞ ꠇꠁꠟꠎꠣ-ꠉꠥꠞ꠆ꠖꠣ ꠝꠝꠞ ꠟꠣꠈꠣꠘ ꠉꠟꠤꠀ,
ꠙꠦꠐꠞ ꠀꠔ-ꠜꠠꠅ ꠢꠣꠝꠣꠁꠍꠦ।
15 ꠀꠝꠣꠞ ꠛꠟ-ꠡꠇ꠆ꠔꠤ ꠢꠥꠇꠣꠁꠀ ꠝꠣꠐꠤꠞ ꠍꠣꠠꠞ ꠟꠣꠈꠣꠘ ꠅꠁꠍꠦ,
ꠀꠞ ꠎꠤꠚꠞꠣ ꠢꠥꠇꠣꠁꠀ ꠔꠣꠟꠥꠔ ꠟꠣꠉꠤꠉꠦꠍꠦ,
ꠔꠥꠝꠤ ꠀꠝꠣꠞꠦ ꠗꠥꠟꠣ-ꠛꠣꠟꠥꠞ ꠇꠄꠛꠞꠅ ꠢꠣꠞꠣꠁ ꠕꠁꠍ।
16 ꠈꠛꠤꠍ ꠅꠇꠟꠦ ꠀꠝꠣꠞꠦ ꠇꠥꠔ꠆ꠔꠣꠞ ꠙꠣꠟꠞ ꠟꠣꠈꠣꠘ ꠛꠦꠞꠤꠟꠤꠍꠂꠘ,
ꠀꠝꠣꠞ ꠀꠔ-ꠙꠣꠅꠞꠦ ꠉꠣꠕꠤꠟꠤꠍꠂꠘ।
17 ꠀꠝꠤ ꠔ ꠀꠝꠣꠞ ꠢꠇ꠆ꠇꠟ ꠀꠒ꠆ꠒꠤ ꠉꠘꠤꠔꠣꠝ ꠙꠣꠞꠤ,
ꠅꠔꠣꠄ ꠀꠝꠣꠞ ꠛꠣꠄ ꠌꠃꠈ ꠝꠦꠟꠤꠀ ꠌꠣꠁ ꠞꠁꠍꠂꠘ।
18 ꠔꠣꠞꠣ ꠘꠤꠎꠞ ꠝꠣꠎꠦ ꠀꠝꠣꠞ ꠇꠣꠙꠠ-ꠌꠥꠙꠠ ꠛꠣꠐꠣ-ꠛꠣꠐꠤ ꠇꠞꠍꠦ,
ꠀꠝꠣꠞ ꠇꠥꠞ꠆ꠔꠣꠞ ꠟꠣꠉꠤ ꠔꠣꠞꠣ ꠟꠐꠣꠞꠤꠅ ꠝꠣꠞꠍꠦ।
19 ꠅꠁꠟꠦ ꠅ ꠝꠣꠛꠥꠖ, ꠔꠥꠝꠤ ꠖꠥꠞꠁ ꠢꠞꠤꠀ ꠞꠁꠅ ꠘꠣ,
ꠅ ꠀꠝꠣꠞ ꠇꠣꠘ꠆ꠒꠣꠞꠤ, ꠀꠝꠣꠞꠦ ꠡꠣꠁꠎ꠆ꠎꠞ ꠟꠣꠉꠤ ꠎꠟꠖꠤ ꠀꠉꠥꠀꠁ ꠀꠅ।
20 ꠔꠟꠥꠀꠞꠞ ꠔꠟ ꠕꠣꠇꠤ ꠛꠣꠌꠣꠅ ꠀꠝꠣꠞ ꠎꠣꠘ,
ꠅꠔꠣ ꠇꠥꠇꠞꠞ ꠝꠥꠈ ꠕꠣꠇꠤ ꠛꠣꠌꠣꠅ ꠝꠞ ꠙꠞꠣꠘ।
21 ꠡꠤꠋꠢ ꠙꠣꠟꠞ ꠝꠥꠈ ꠕꠣꠇꠤ ꠞꠇ꠆ꠇꠣ ꠇꠞꠅ ꠝꠞꠦ,
ꠎꠋꠟꠤ ꠛꠤꠍꠣꠟꠞ ꠗꠣꠞꠣꠁꠟ ꠢꠤꠋꠉꠞꠦ ꠢꠞꠣꠅ ꠛꠃꠔ ꠖꠥꠞꠦ!
ꠅꠃ ꠚꠞꠤꠀꠖ ꠢꠥꠘꠤꠀ ꠔꠥꠝꠤ ꠀꠝꠣꠞ ꠎꠣꠘ ꠛꠣꠌꠣꠁꠍ,
22 ꠔꠦ ꠀꠝꠤꠅ ꠀꠝꠣꠞ ꠜꠣꠁꠀꠁꠘ꠆ꠔꠞ ꠉꠦꠍꠦ ꠔꠥꠝꠣꠞ ꠘꠣꠝ ꠔꠛꠟꠤꠉ ꠇꠞꠝꠥ,
ꠡꠝꠣꠎꠞ ꠝꠣꠎꠦ ꠔꠥꠝꠣꠞ ꠔꠣꠞꠤꠚ-ꠉꠎꠟ ꠉꠣꠁꠝꠥ।
23 ꠔꠥꠝꠞꠣ ꠎꠣꠞꠣ ꠝꠣꠛꠥꠖꠞ ꠒꠞ-ꠈꠚꠦ ꠞꠅ,
ꠔꠥꠝꠞꠣ ꠔꠣꠘ ꠔꠣꠞꠤꠚ-ꠉꠎꠟ ꠉꠣꠅ।
ꠅ ꠁꠀꠇꠥꠛꠞ ꠀꠅꠟꠣꠖ ꠅꠇꠟ ꠢꠥꠘꠅ,
ꠝꠣꠛꠥꠖ ꠄꠟꠣꠢꠤꠞꠦ ꠔꠣꠎꠤꠝ ꠇꠞꠅ।
ꠄꠛꠣꠖꠔ-ꠛꠘ꠆ꠖꠦꠉꠤ ꠇꠞꠅ ꠔꠥꠝꠞꠣ ꠢꠇꠟꠦ,
ꠛꠘꠤ ꠁꠍꠞꠣꠁꠟꠞ ꠢꠇꠟ ꠈꠣꠘ꠆ꠖꠣꠘ ꠄꠇꠈꠣꠘꠅ ꠝꠤꠟꠦ।
24 ꠖꠥꠈꠤ ꠎꠘꠞ ꠖꠥꠈ ꠖꠦꠈꠤꠀ ꠔꠣꠁꠘ ꠢꠞꠂꠘ ꠘꠣ,
ꠇꠣꠋꠉꠣꠟꠞꠦ ꠖꠦꠈꠟꠦ ꠔꠣꠁꠘ ꠢꠞꠤꠀ ꠎꠣꠁꠘ ꠘꠣ,
ꠀꠙꠘ ꠙꠣꠇ ꠝꠥꠈ ꠟꠥꠇꠣꠁꠘ ꠘꠣ ꠔꠣꠞꠣꠞꠦ ꠖꠦꠈꠟꠦ,
ꠝꠤꠘꠔ-ꠇꠣꠎ꠆ꠎꠤ ꠢꠥꠘꠤꠀ ꠔꠣꠁꠘ ꠡꠣꠁꠎ꠆ꠎ ꠇꠞꠟꠣ ꠔꠣꠞꠣꠞꠦ।
25 ꠔꠥꠝꠣꠞ ꠘꠣꠝꠦ ꠝꠢꠣ ꠝꠣꠢꠚꠤꠟꠅ ꠎꠔ ꠔꠣꠞꠤꠚ-ꠉꠎꠟ ꠉꠣꠁ,
ꠔꠥꠝꠣꠞꠦ ꠒꠞꠣꠅꠞꠣ ꠎꠘꠞ ꠍꠣꠝꠘꠦ ꠝꠞ ꠝꠣꠘ꠆ꠘꠔ ꠇꠞꠝꠥ ꠀꠖꠣꠄ।
26 ꠙꠦꠐ ꠜꠞꠣ ꠈꠣꠘꠤ ꠈꠣꠁꠛꠣ ꠖꠥꠈꠤ-ꠇꠣꠋꠉꠣꠟ ꠎꠘꠦ,
ꠝꠣꠛꠥꠖ ꠝꠃꠟꠣꠞ ꠔꠣꠞꠤꠚ ꠉꠣꠁꠛꠣ ꠔꠣꠘ ꠀꠡꠤꠇ ꠖꠟꠦ।
ꠌꠤꠞꠇꠣꠟ ꠎꠤꠘ꠆ꠖꠣ ꠞꠃꠇ ꠀꠡꠤꠇꠞ ꠅꠘ꠆ꠔꠞ!
27 ꠎꠉꠔꠞ ꠢꠦꠡ ꠡꠤꠝꠣꠘꠣꠞ ꠝꠣꠘꠡꠦꠅ ꠔꠃꠛꠣ ꠇꠞꠤ ꠚꠤꠞꠤꠀ ꠀꠁꠛꠣ,
ꠎꠣꠔꠤ ꠅꠇꠟꠞ ꠢꠇ꠆ꠇꠟ ꠉꠥꠡ꠆ꠐꠤꠄ ꠝꠣꠛꠥꠖꠞ ꠍꠣꠝꠘꠦ ꠇꠞꠛꠣ ꠍꠁꠎꠖꠣ।
28 ꠞꠣꠎ-ꠡꠤꠋꠢꠣꠡꠘ ꠘꠤꠌ꠆ꠌꠤꠔ ꠝꠣꠛꠥꠖ ꠝꠃꠟꠣꠞꠃ,
ꠔꠣꠁꠘꠃ ꠢꠇꠟ ꠎꠣꠔꠤꠞ ꠃꠙꠞꠦ ꠛꠣꠖꠡꠣꠁ ꠇꠞꠂꠘ।
29 ꠎꠉꠔꠞ ꠛꠟꠛꠣꠘ ꠅꠇꠟꠦ ꠈꠣꠅꠀ-ꠖꠣꠅꠀ ꠇꠞꠛꠣ,
ꠔꠣꠘ ꠍꠣꠝꠘꠦ ꠀꠁꠀ ꠄꠛꠣꠖꠔ ꠇꠞꠛꠣ,
ꠀꠞ ꠎꠣꠞꠣꠞ ꠘꠤꠎꠞ ꠎꠣꠘ ꠛꠣꠌꠣꠘꠤꠞ ꠃꠙꠣꠄ ꠘꠣꠁ,
ꠔꠣꠞꠣꠅ ꠀꠁꠀ ꠘꠔ ꠅꠁꠀ ꠔꠣꠘꠞꠦ ꠍꠁꠎꠖꠣ ꠇꠞꠛꠣ।
30 ꠔꠣꠘ ꠄꠛꠣꠖꠔ-ꠛꠘ꠆ꠖꠦꠉꠤ ꠇꠞꠛꠣ ꠍꠣꠝꠘꠞ ꠎꠥꠉꠞ ꠈꠣꠘ꠆ꠖꠣꠘꠦ,
ꠝꠣꠟꠤꠇ ꠝꠃꠟꠣꠞ ꠈꠛꠞ ꠢꠥꠘꠛꠣ ꠢꠃ ꠎꠝꠣꠘꠣꠞ ꠢꠇꠟꠦ।
31 ꠜꠛꠤꠡꠔꠦ ꠎꠘꠝ ꠅꠁꠛ ꠖꠥꠘꠤꠀꠁꠔ ꠎꠣꠞꠣꠞ,
ꠔꠣꠞꠣꠞ ꠉꠦꠍꠦ ꠎꠣꠘꠣꠁꠟ ꠅꠁꠛ ꠅꠃ ꠇꠥꠖꠞꠔꠤ ꠇꠣꠞꠛꠣꠞ॥