ꠀꠟ-ꠎꠛꠥꠞ ৩৫
ꠢꠎꠞꠔ ꠖꠣꠃꠖꠞ ꠝꠤꠎꠝꠞ।
1 ꠀꠝꠣꠞ ꠛꠤꠞꠥꠗꠤꠔꠣ ꠇꠞꠦꠞ ꠎꠣꠞꠣ,
ꠔꠥꠝꠤ ꠝꠣꠛꠥꠖꠦ ꠇꠞꠅ ꠔꠣꠞꠣꠞ ꠛꠤꠞꠥꠗꠤꠔꠣ,
ꠟꠣꠠꠣꠁ ꠇꠞꠦꠞ ꠎꠣꠞꠣ ꠀꠝꠣꠞ ꠟꠉꠦ,
ꠔꠥꠝꠤꠅ ꠟꠣꠠꠣꠁ ꠇꠞꠅ ꠔꠣꠞꠣꠞ ꠟꠉꠦ।
2 ꠎꠣꠘ ꠛꠣꠌꠣꠘꠤꠞ ꠀꠔꠤꠀꠞ ꠟꠅ ꠔꠥꠝꠣꠞ ꠀꠔꠅ,
ꠀꠝꠣꠞ ꠡꠣꠁꠎ꠆ꠎꠞ ꠟꠣꠉꠤ ꠎꠟꠖꠤ ꠀꠅ ꠉ।
3 ꠀꠝꠣꠞꠦ ꠈꠦꠖꠣꠅꠞꠣꠞ ꠟꠣꠉꠤ ꠀꠔꠅ ꠟꠅ ꠍꠥꠟꠚꠤ-ꠇꠥꠌꠣ,
ꠀꠝꠣꠞ ꠎꠣꠘꠞꠦ ꠇꠅ ꠉ, “ꠀꠝꠤꠃ ꠔꠥꠝꠣꠞ ꠛꠣꠌꠣꠘꠦꠀꠟꠣ।”
4 ꠀꠝꠣꠞꠦ ꠈꠥꠘ ꠇꠞꠔ ꠌꠣꠄ ꠎꠣꠞꠣ,
ꠛꠦꠁꠎ꠆ꠎꠔ-ꠡꠞꠝꠤꠘ꠆ꠖꠣ ꠅꠃꠇ ꠔꠣꠞꠣ,
ꠀꠝꠣꠞ ꠈꠦꠔꠤ ꠇꠞꠔ ꠌꠣꠄ ꠎꠣꠞꠣ,
ꠜꠣꠉꠤꠀ ꠎꠣꠃꠇ ꠔꠣꠞꠣ ꠝꠣꠕꠣ ꠘꠥꠀꠁꠀ।
5 ꠗꠣꠘꠞ ꠍꠥꠍꠣꠞꠦ ꠎꠦꠟꠣ ꠔꠥꠚꠣꠘꠦ ꠘꠦꠄ ꠃꠠꠣꠁꠀ,
ꠝꠣꠛꠥꠖꠞ ꠚꠤꠞꠤꠡ꠆ꠔꠣꠄ ꠅꠟꠣ ꠔꠣꠞꠣꠞꠦ ꠖꠦꠃꠇ꠆ꠇꠣ ꠈꠦꠖꠣꠁꠀ।
6 ꠔꠣꠞꠣꠞ ꠙꠕ ꠅꠃꠇ ꠀꠘ꠆ꠖꠣꠁꠞ ꠀꠞ ꠙꠤꠍꠟꠣ,
ꠈꠦꠖꠣꠁꠀ ꠘꠦꠃꠇ꠆ꠇꠣ ꠔꠣꠞꠣꠞꠦ ꠝꠣꠛꠥꠖꠞ ꠚꠤꠞꠤꠡ꠆ꠔꠣ।
7 ꠝꠞꠦ ꠗꠞꠣꠞ ꠟꠣꠉꠤ ꠔꠣꠞꠣ ꠙꠣꠔꠤꠍꠦ ꠎꠣꠟ ꠟꠥꠇꠣꠁꠀ,
ꠀꠝꠣꠞ ꠎꠣꠘ ꠘꠤꠛꠣꠞ ꠟꠣꠉꠤ ꠈꠥꠖꠤꠍꠦ ꠉꠣꠔ ꠈꠣꠝꠈꠣ।
8 ꠀꠈꠔꠣ ꠇꠞꠤ ꠔꠣꠞꠣꠞ ꠃꠙꠞꠦ ꠡꠞ꠆ꠛꠘꠣꠡ ꠟꠣꠝꠃꠇ,
ꠔꠣꠞꠣꠞ ꠙꠣꠔꠣꠁꠟ ꠎꠣꠟꠅ ꠔꠣꠞꠣꠃ ꠢꠣꠝꠣꠃꠇ।
9 ꠔꠦꠃꠉꠤ ꠀꠝꠣꠞ ꠖꠤꠟꠦ ꠉꠣꠁꠛ ꠝꠣꠛꠥꠖꠞ ꠈꠥꠡꠤꠞ ꠉꠣꠘ,
ꠔꠣꠁꠘ ꠀꠝꠣꠞ ꠎꠣꠘ ꠛꠣꠌꠣꠘꠤꠄ ꠉꠣꠁꠝꠥ ꠔꠣꠘ ꠡꠣꠘ।
10 ꠀꠝꠣꠞ ꠝꠘꠦ-ꠔꠘꠦ ꠇꠃꠇ,
“ꠅ ꠀꠟ꠆ꠟꠣ, ꠔꠥꠝꠣꠞ ꠢꠝꠣꠘ ꠀꠞ ꠇꠦ ꠀꠍꠦ ꠎꠉꠔꠦ?
ꠛꠟꠛꠣꠘꠞ ꠀꠔ ꠕꠣꠇꠤ ꠃꠖ꠆ꠖꠣꠞ ꠇꠞꠅ ꠘꠤꠞꠣꠡ꠆ꠞꠄꠞꠦ,
ꠟꠥꠐꠇꠣꠞꠤꠞ ꠉꠦꠍ ꠕꠣꠇꠤ ꠔꠥꠝꠤ ꠛꠣꠌꠣꠁꠞꠣꠄ ꠖꠥꠈꠤ-ꠇꠣꠋꠉꠣꠟꠞꠦ।”
11 ꠁꠋꠡꠣꠈꠥꠞ ꠝꠤꠍꠣ ꠡꠣꠇ꠆ꠇꠤꠞ ꠖꠟ ꠟꠣꠉꠍꠤꠟ ꠀꠝꠣꠞ ꠛꠤꠞꠥꠖ꠆ꠖꠦ,
ꠀꠝꠤ ꠎꠦꠔꠣ ꠎꠣꠘꠤ ꠘꠣ ꠅꠔꠣ ꠛꠤꠡꠄ ꠝꠞꠦ ꠎꠤꠇꠣꠁꠍꠦ।
12 ꠃꠙꠇꠣꠞꠞ ꠛꠖꠟꠣ ꠔꠣꠞꠣ ꠇꠞꠍꠦ ꠀꠝꠣꠞ ꠈꠦꠔꠤ,
ꠇꠔ ꠇꠙꠣꠟ ꠙꠥꠠꠣ ꠀꠝꠤ, ꠢꠣꠄ-ꠢꠥꠔꠣꠡ ꠇꠞꠤ।
13 ꠛꠦꠝꠣꠞ-ꠀꠎꠣꠞ ꠅꠁꠟꠦ ꠔꠣꠞꠣꠞ ꠍꠟꠣꠞ ꠌꠐ ꠚꠤꠘ꠆ꠖꠤꠔꠣꠝ,
ꠇꠡ꠆ꠐ ꠇꠞꠤ ꠞꠥꠎꠣ ꠞꠣꠈꠤꠀ ꠖꠤꠟꠦ-ꠎꠣꠘꠦ ꠖꠥꠀ ꠇꠞꠔꠣꠝ।
14 ꠜꠣꠁ-ꠛꠤꠞꠣꠖꠞ ꠖꠥꠡ꠆ꠔ ꠝꠞꠟꠦ ꠝꠣꠘꠡꠦ ꠇꠣꠘ꠆ꠖꠦ ꠎꠦꠟꠣ,
ꠔꠣꠞꠣꠞ ꠟꠣꠉꠤ ꠀꠝꠤꠅ ꠔ ꠇꠣꠘ꠆ꠖꠤꠔꠣꠝ ꠅꠟꠣ,
ꠝꠣ ꠝꠞꠟꠦ ꠇꠣꠘ꠆ꠖꠤ ꠇꠣꠘ꠆ꠖꠤ ꠝꠣꠕꠣ ꠎꠦꠟꠣ ꠅꠁꠎꠣꠄ ꠘꠤꠌꠣ।
15 ꠀꠝꠤ ꠇꠥꠘꠥ ꠃꠡ꠆ꠐꠣ ꠈꠣꠁꠟꠦ ꠈꠥꠡꠤꠞ ꠑꠦꠟꠣꠄ ꠔꠣꠞꠣ ꠎꠝꠦ,
ꠅꠌꠤꠘꠣ ꠝꠣꠘꠡꠦ ꠝꠞ ꠛꠖꠘꠣꠝ ꠉꠣꠁꠔꠦ ꠀꠞ ꠝꠣꠁꠞ-ꠗꠁꠞ ꠇꠞꠔꠦ ꠘꠣ ꠕꠣꠝꠦ।
16 ꠛꠦꠁꠝꠣꠘꠞ ꠖꠟꠦ ꠝꠤꠟꠤ ꠀꠡꠤ-ꠔꠣꠝꠡꠣ ꠇꠞꠟ ꠝꠞꠦ,
ꠖꠣꠔ ꠇꠤꠠꠤꠝꠤꠠꠤ ꠈꠣꠁꠟ ꠔꠣꠞꠣ ꠀꠝꠣꠞ ꠛꠤꠞꠥꠖ꠆ꠖꠦ।
17 ꠌꠣꠁꠀ ꠌꠣꠁꠀ ꠇꠔꠖꠤꠘ ꠖꠦꠈꠔꠣꠄ ꠝꠣꠛꠥꠖ ꠔꠣꠞꠣꠞ ꠁꠋꠡꠣ-ꠊꠤꠘ꠆ꠘꠣ?
ꠡꠤꠋꠢꠞ ꠖꠣꠔꠅ ꠕꠣꠇꠤ ꠀꠝꠣꠞ ꠎꠣꠘꠈꠣꠘ ꠔꠥꠝꠤ ꠛꠣꠌꠣꠅ ꠘꠣ।
18 ꠝꠢꠣ ꠝꠎꠟꠤꠍꠅ ꠀꠝꠤ ꠀꠖꠣꠄ ꠇꠞꠝꠥ ꠡꠥꠇꠞꠤꠀ,
ꠔꠥꠝꠣꠞ ꠔꠣꠞꠤꠚ ꠉꠣꠁꠝꠥ ꠀꠝꠤ ꠛꠃꠔ ꠝꠣꠘꠡꠞ ꠍꠣꠝꠘꠦ ꠖꠤꠀ।
19 ꠝꠤꠍꠣ ꠝꠣꠔꠞꠣ ꠖꠥꠡꠝꠘ ꠙꠣꠟꠦ ꠘꠣ ꠇꠞꠃꠇ ꠈꠥꠡꠤ-ꠛꠣꠡꠤ ꠝꠞꠦ ꠟꠁꠀ,
ꠈꠣꠝꠈꠣ ꠊꠤꠘ꠆ꠘꠣꠄ ꠝꠞꠦ ꠎꠣꠞꠣ ꠌꠃꠈ ꠐꠤꠙꠣꠐꠤꠙꠤ ꠇꠞꠤꠀ,
20 ꠔꠣꠞꠣ ꠔ ꠡꠣꠘ꠆ꠔꠤꠞ ꠝꠣꠔ ꠝꠣꠔꠦ ꠘꠣ,
ꠖꠦꠡꠞ ꠘꠤ-ꠅꠙꠞꠣꠗꠤ ꠝꠣꠘꠡꠞ ꠟꠉꠦ ꠇꠞꠦ ꠍꠟꠘꠣ।
21 ꠝꠥꠈ ꠜꠦꠋꠉꠣꠁꠀ ꠀꠝꠣꠞ ꠛꠣꠄ ꠔꠣꠝꠡꠣ ꠇꠞꠤ ꠇꠄ ꠔꠣꠞꠣ,
“ꠇꠔ ꠝꠎꠣ, ꠇꠔ ꠝꠎꠣ, ꠘꠤꠎꠞ ꠌꠃꠈꠦ ꠖꠦꠈꠟꠣꠝ ꠀꠝꠞꠣ।”
22 ꠘꠤꠞꠣꠁ ꠞꠁꠅ ꠘꠣ ꠝꠣꠛꠥꠖ ꠉ ꠖꠦꠈꠞꠣꠄ ꠔ ꠢꠇꠟꠔꠣ,
ꠀꠝꠣꠞꠦ ꠍꠣꠠꠤꠀ ꠝꠣꠛꠥꠖ ꠢꠞꠤꠀ ꠞꠁꠅ ꠘꠣ।
23 ꠎꠟꠖꠤ ꠇꠞꠤ ꠀꠉꠥꠀꠁ ꠀꠅ ꠇꠞꠅ ꠀꠝꠣꠞ ꠢꠇ ꠛꠤꠌꠣꠞ,
ꠀꠝꠣꠞ ꠙꠇ꠆ꠇꠦ ꠞꠅ ꠉ ꠀꠟ꠆ꠟꠣ ꠔꠥꠝꠤꠃ ꠝꠣꠛꠥꠖ ꠀꠝꠣꠞ।
24 ꠀꠝꠣꠞ ꠛꠤꠌꠣꠞ ꠇꠞꠅ ꠀꠟ꠆ꠟꠣ ꠘꠤꠎꠞ ꠙꠣꠇ ꠙꠞꠦꠎꠉꠣꠞꠤꠄ,
ꠅꠉ ꠀꠝꠣꠞ ꠀꠟ꠆ꠟꠣ ꠝꠣꠛꠥꠖ, ꠝꠞꠦ ꠟꠁꠀ ꠔꠣꠞꠣ ꠎꠣꠘꠥ ꠈꠥꠡꠤ-ꠚꠥꠞ꠆ꠔꠤ ꠘꠣ ꠇꠞꠦ।
25 ꠔꠣꠞꠣꠞ ꠖꠤꠅ ꠘꠣ ꠝꠘꠦ ꠝꠘꠦ ꠇꠁꠔꠦ,
“ꠀꠝꠞꠣ ꠎꠦꠔꠣ ꠌꠣꠁꠍꠤ ꠅꠔꠣꠃ ꠔ ꠅꠁꠍꠦ।”
ꠄꠅꠈꠣꠘ ꠇꠁꠔꠦ ꠖꠤꠅ ꠘꠣ ꠔꠥꠝꠤ ꠔꠣꠞꠣꠞꠦ,
“ꠎꠤꠘ꠆ꠖꠣ ꠉꠤꠟꠤꠀ ꠢꠣꠞꠣꠁꠍꠤ ꠅꠉꠥꠞꠦ ꠙꠦꠐꠞ ꠜꠤꠔꠞꠦ।”
26 ꠝꠍꠤꠛꠔ ꠖꠦꠈꠤꠀ ꠀꠝꠣꠞ ꠇꠞꠂꠘ ꠎꠦꠔꠣꠄ ꠈꠥꠡꠤ-ꠚꠥꠞ꠆ꠔꠤ,
ꠡꠞꠝꠤꠘ꠆ꠖꠣ ꠛꠘꠤꠀ ꠔꠣꠞꠣ ꠅꠃꠇ ꠘꠤꠌꠣ ꠝꠥꠈꠤ,
ꠀꠝꠣꠞ ꠃꠙꠞꠦ ꠎꠦꠔꠣꠄ ꠇꠞꠦ ꠛꠠꠣꠁ-ꠛꠦꠐꠣꠉꠤꠞꠤ,
ꠡꠞꠝ ꠀꠞ ꠛꠦꠁꠎ꠆ꠎꠔꠤꠔ ꠒꠥꠛꠃꠇ ꠁꠔꠣ ꠢꠇ꠆ꠇꠟꠐꠤ।
27 ꠙꠣꠇ-ꠙꠞꠦꠎꠉꠣꠞꠤ ꠖꠦꠈꠤꠀ ꠝꠞ ꠅꠄ ꠎꠣꠞꠣ ꠈꠥꠡ-ꠛꠣꠡ,
ꠈꠥꠡꠤꠞ ꠌꠥꠐꠦ ꠔꠣꠞꠣ ꠇꠞꠃꠇ ꠀꠘꠘ꠆ꠖ-ꠃꠟ꠆ꠟꠣꠡ।
ꠢꠞ-ꠢꠣꠝꠦꠡꠣ ꠇꠃꠇ ꠔꠣꠞꠣ ꠀꠟꠢꠣꠝꠖꠥꠟꠤꠟ꠆ꠟꠣ,
ꠘꠤꠎꠞ ꠛꠘ꠆ꠖꠣꠞ ꠡꠣꠘ꠆ꠔꠤ ꠖꠦꠈꠤꠀ ꠈꠥꠡꠤ ꠅꠁꠘ ꠔ ꠀꠟ꠆ꠟꠣ।
28 ꠔꠥꠝꠣꠞ ꠢꠇ ꠛꠤꠌꠣꠞꠞ ꠉꠥꠘ ꠉꠣꠁꠝꠥ ꠀꠝꠣꠞ ꠎꠤꠚꠞꠣꠖꠤ,
ꠉꠥꠘꠉꠣꠘ ꠉꠣꠁꠝꠥ ꠔꠥꠝꠣꠞ ꠖꠤꠘ-ꠞꠣꠁꠔ ꠜꠞꠤ॥