ꠀꠟ-ꠎꠛꠥꠞ ৩৬
ꠄꠛꠣꠖꠔ-ꠛꠘ꠆ꠖꠦꠉꠤ ꠙꠞꠤꠌꠣꠟꠇꠞ ꠟꠣꠉꠤ: ꠝꠣꠛꠥꠖꠞ ꠛꠘ꠆ꠖꠣ ꠢꠎꠞꠔ ꠖꠣꠃꠖꠞ ꠝꠤꠎꠝꠞ।
1 ꠘꠣꠚꠞꠝꠣꠘꠞ ꠈꠣꠞꠣꠙꠤꠞ ꠛꠦꠙꠣꠞꠦ,
ꠝꠣꠛꠥꠖꠞ ꠇꠣꠟꠣꠝ ꠙꠣꠁꠍꠦ ꠀꠝꠣꠞ ꠖꠤꠟꠦ,
ꠔꠣꠞꠣꠞ ꠌꠈꠥꠔ ꠀꠟ꠆ꠟꠣꠞ ꠒꠞ-ꠈꠚ ꠘꠣꠁꠞꠦ।
2 ꠔꠣꠞꠣ ꠘꠤꠎꠞ ꠌꠃꠈꠦ ꠖꠦꠈꠦ ꠘꠤꠎꠞ ꠛꠣꠢꠣꠖꠥꠞꠤ,
ꠘꠤꠎꠞꠦ ꠊꠤꠘ꠆ꠘꠣꠄ ꠘꠣ ꠅꠙꠞꠣꠗ ꠇꠣꠝ ꠇꠞꠤ।
3 ꠍꠟ-ꠌꠔꠥꠞꠤ ꠈꠣꠞꠣꠙꠤꠄ ꠜꠞꠣ ꠔꠣꠞꠣꠞ ꠝꠥꠈꠞ ꠇꠕꠣ,
ꠀꠈꠟ ꠈꠣꠐꠣꠁ ꠌꠟꠣ, ꠘꠦꠇ ꠇꠣꠝ ꠕꠣꠇꠤ ꠞꠄ ꠢꠞꠤꠀ।
4 ꠛꠤꠍꠘꠣꠔ ꠢꠥꠔꠤꠀ ꠔꠣꠞꠣ ꠇꠥ-ꠇꠣꠝꠞ ꠗꠣꠘ꠆ꠖꠣ ꠇꠞꠦ,
ꠛꠖ ꠇꠣꠝ ꠘꠣ ꠍꠣꠠꠤꠀ ꠝꠘ꠆ꠖ ꠙꠕꠦ ꠌꠟꠦ।
5 ꠅꠉ ꠝꠣꠛꠥꠖ ꠔꠥꠝꠣꠞ ꠖꠄꠀ-ꠝꠣꠄꠀꠄ ꠀꠍꠝꠣꠘ ꠍꠁꠟꠣꠁꠍꠦ,
ꠔꠥꠝꠣꠞ ꠢꠇ-ꠢꠣꠟꠣꠟꠤ ꠝꠦꠊꠞ ꠇꠣꠟꠘꠤꠔ ꠟꠣꠉꠤ ꠉꠦꠍꠦ।
6 ꠙꠣꠠ-ꠙꠞꠛꠔꠞ ꠟꠣꠈꠣꠘ ꠃꠌꠣ ꠙꠞꠦꠎꠉꠣꠞꠤ ꠔꠥꠝꠣꠞ,
ꠉꠁꠘ ꠖꠞꠤꠀꠞ ꠟꠣꠈꠣꠘ ꠔꠥꠝꠣꠞ ꠢꠇ ꠛꠤꠌꠣꠞ,
ꠝꠣꠛꠥꠖꠦꠃ ꠛꠣꠌꠣꠅ ꠔ ꠡꠛ ꠝꠣꠘꠥꠡ ꠀꠞ ꠎꠣꠘꠥꠀꠞ।
7 ꠅꠉ ꠀꠟ꠆ꠟꠣ ꠔꠥꠝꠣꠞ ꠝꠣꠄꠀ-ꠝꠝꠔꠣ ꠝꠢꠣ ꠝꠥꠁꠟ꠆ꠟꠛꠣꠘ,
ꠀꠖꠝ ꠎꠣꠔꠤꠄ ꠀꠡꠞꠄ ꠙꠣꠄ ꠔꠥꠝꠣꠞ ꠒꠣꠈꠘꠣꠞ ꠍꠣꠄꠀꠔ।
8 ꠔꠥꠝꠣꠞ ꠊꠞꠞ ꠗꠘ-ꠍꠣꠝꠣꠘꠣꠄ ꠔꠣꠞꠣꠞ ꠙꠦꠐ ꠜꠞꠤ ꠎꠣꠄ,
ꠔꠥꠝꠣꠞ ꠅꠝ꠆ꠞꠤꠔ ꠙꠣꠘꠤꠄ ꠔꠣꠞꠣꠞ ꠔꠤꠞꠣꠡ ꠝꠤꠐꠣꠄ।
9 ꠔꠥꠝꠣꠞ ꠝꠣꠎꠦ ꠀꠍꠦ ꠎꠤꠘ꠆ꠖꠦꠉꠤ-ꠙꠣꠘꠤꠞ ꠁꠘ꠆ꠖꠣꠞꠣ,
ꠔꠥꠝꠣꠞ ꠘꠥꠞꠦꠃ ꠔ ꠖꠦꠈꠤ ꠘꠥꠞ ꠀꠝꠞꠣ।
10 ꠔꠥꠝꠣꠞꠦ ꠎꠣꠞꠣ ꠌꠤꠘꠦ ꠔꠣꠞꠣꠞꠦ ꠔꠥꠝꠤ ꠛꠤꠟꠣꠁ ꠖꠦꠅ ꠔꠥꠝꠣꠞ ꠖꠄꠀ-ꠝꠣꠄꠀ,
ꠡꠞꠟ ꠖꠤꠟꠞ ꠝꠣꠘꠡꠦ ꠙꠣꠄ ꠔꠥꠝꠣꠞ ꠝꠣꠄꠀ-ꠝꠝꠔꠣ।
11 ꠅꠢꠋꠇꠣꠞꠤ ꠎꠘꠦ ꠎꠣꠘꠥ ꠙꠣꠅ ꠘꠣ ꠛꠣꠠꠣꠄ ꠀꠝꠣꠞ ꠛꠣꠄ,
ꠘꠣꠚꠞꠝꠣꠘꠞ ꠀꠔꠦ ꠎꠣꠘꠥ ꠀꠝꠣꠞꠦ ꠘꠣ ꠈꠦꠖꠣꠄ।
12 ꠖꠦꠈꠞꠣꠄ ꠘꠤ ꠘꠣꠚꠞꠝꠣꠘꠤ ꠎꠦꠔꠣꠄ ꠇꠞꠍꠦ ꠁꠔꠣ ꠔ ꠟꠦꠐꠤ ꠉꠦꠍꠦ,
ꠃꠑꠤꠔ ꠙꠣꠞꠦꠞ ꠘꠣ ꠔꠣꠞꠣ, ꠚꠣꠟꠣꠁ ꠖꠤꠍꠂꠘ ꠁꠔꠣꠞꠦ॥