6
Lisyamo ku bantu beketekeele
1 Lisyamo lyenu mwe bekeele bawamiinue mu Sayuni,
mwe beyunvwile mwali ni mutende pa Lupili lwa Samaria,
mwe bakindami ba mponvu pa ntundu yonse,
mwe baketekeelue na Baizraeli!
2 Endo mwaye mumone muzi wa Kalnehi,
muye mumone ni muzi ukata wa Hamati,
kabili muye mukookele ni ku Gati, muzi wa Bafilistini.
Ati, kubako ezi mizi yaali yawamiisie kukila bukolo bwenu bwa Yuda ni bwa Izraeli? Kubako, kyalo kyabo kyaali kyatanine kukila kyalo kyenu?
3 Mulimwalangakana kusyenia kule busiku bwa masanzo,
inzi mwalimukupalamika buteeko bwa kutiinia.
4 Kyaakamibiipila mwe bali balaala pa malita afwaniiziwe na meno a nzovu,
ni kuya mwaiyolwela pa bitebe bya mutengo.
Mwe balibalia munani wa misoka ya mikooko
pamo ni wa misoka ya nghombe itapukile.
5 Mwemue mulimwalizia binanda nga Daudi,
mulimwatunga nghimbo ni kulizia bilimba bilekenkeene.
6 Mulimwaminina divai mu nsupa,
ni kusuba mafuta a bunu buweme ku mibili yenu.
Inzi temulimwaunvua nkumbu pa mulandu wa kwinoonua kwa luvyalo lwakua Yusufu.
7 Ni pakako, mwaakaba mwali mu bantu ba mambo kuya mu buzia.
Nsikunkulu yenu pamo ni kuwaminua byaakapua.
8 Yawe Kabezya Mpungu, Yawe Leza mwine wa Maka onse walapa walanda nangue,
“Nsuulile kiitoni kyakua Yakobo,
nsuulile byubo byakue.
Muzi ni kubalua kantu kalimo,
naakapeela balwani babo.”
9 Kine mu nghanda imo mwaakasyala bantu lyanondo, ni bo kumo baakafua.
10 Kabili kine muntu wa mu lupua lwa babo bafwile waiza kufumia mibili yabo mu nghanda kuti aye azizie, kine muli muntu wapandanga, wasyele wakosele mu muputule wa nghanda, ozo muntu wa mu lupua lwabo alikumwipuzia nangue, “Ewe, ulimo ni unge muntu akosele?” Kine walanda nangue, “Temuli,” alikumwana evi, “Talala! Fwefue tetupalile kuzimbula Liina lyakua Yawe.”
11 Pantu Yawe wakifumia mwano,
wene wakaba kutuuta nghanda ikata bibazu bibazu,
ni iniini kutuuta tuniini tuniini.
12 Ati, kubako farasi kuti wakunduka pa myalala?
Ati, kubako muntu kuti walima na nghombe pa myalala?
Inzi mwemue mwa-alwile nsambu kuba bwimba,
ni mazabo a bulunghami kuba bwimba bululile.
13 Mwe balibawaminua kwanziwa kwa muzi wa Lo-debari
ni kulanda nangue, “Kubako tetwakikwata muzi wa Karnaimu na maka etu fwe bene?”
14 Pantu Yawe Leza wa Maka onse walanda evi,
“Nakaba kulengia ntundu ikabe kumyalukila mwe nghanda yakua Izraeli.
Ni yo yakaba kumyemia
kutendekela ku Lebo Hamati ku nkungua mpaka ku Lulambe lwa Araba ku mboosi.”