7
Bimonua byakua Amosi
Kimonua kya mambo: Luzie
1 Keki i kintu kinaalangisiiziwe na Yawe Kabezia Mpungu. Naamumwene walimukuteania bisepe bya luzie pa kyamba kya kuzombola buzombozi bwakua likolo pa musita waali wamenenapo binge bilimbua.
2 Luzie palwaali lwalimukulia bilimbua byonse bya mu makaba, na-angwile nalanda nangue, “We Yawe Kabezia Mpungu eleela bantu bobe! Kubako Yakobo alikutwalilila syani kuba mukose? Wene akilile kukeepa!”
3 Ni pakako, Yawe wa-alwile malanga akue.
Yawe waalandile evi, “Keki tekikaba kukitika.”
Kimonua kya bubili: Mulilo
4 Kintu kinaalangisiiziwe na Yawe Kabezia Mpungu ni keki: Yawe Kabezia Mpungu waali wakuuta bupinguzi bwa mulilo, ni ozo mulilo waakamiizie lyezi ni kwinoona kyalo.
5 Kabili wa-angwile, “We Yawe Kabezia Mpungu, napaapaata tekukita evio! Kubako Yakobo alikutwalilila syani kuba mukose? Wene akilile kukeepa!”
6 Ni pakako, Yawe wa-alwile malanga akue.
Yawe Kabezia Mpungu waalandile evi, “Keki tekikaba kukitika.”
Kimonua kya butatu: Kalingo ka kuolwelako
7 Kinaalangisiiziwe na Yawe mu kimonua ni keki: Yawe waali waimeene mumbali kibumba kyaali kyakuulua na kalingo ka kuolwelako, wakwete ni lukamba lwa kalingo ka kuolwelako mu minue yakue.
8 Yawe wangipuziizie nangue, “Ati Amosi, umweneki?”
Naamwasukile, “Lukamba lwa kalingo ka kuolwelako.”
Kabili Yawe waalandile evi, “Mona ndimukubiika kalingo ka kuolwelako pa bantu bane Baizraeli. Nene nsikikaba kubeeleela.
9 “Nkendo ya mukinzi iliyapupilapo ba mu luvyalo lwakua Izaaki yaakeenoonua,
Ni pa bifuka bizuuke bilibyapupilapo Baizraeli paakeenoonua. Naakeepaya ba mu nghanda yakua Yeroboamu.”
Kabika Amosi ni kitambua Amazia.
10 Kupwako, Amazia kitambua wa ku Beteli watuma mpunda kuli Yeroboamu likolo wa Baizraeli walanda nangue, “Amosi alimukukuleetela bukankobenkania mu Baizraeli. Twebo twakue twakaba kwinoona kyalo.”
11 Pantu evi i vilimukulanda Amosi.
“Yeroboamu waakeepawa ku bului.
Kisinka Baizraeli baakatwalua mu buzia,
kule ni kyalo kyabo.”
12 Pa kyamba Amazia waamwanine Amosi nangue, “Fuma papa we mumoni! Bwelela mu kyalo kya Yudea, uye ubikwile koko ni kupeeluako bilio.
13 Tekutwalilila kubikula mu Beteli pantu papa pazuukile, kabili i nkendo iliyapupilapo likolo.”
14 Amosi waamwasukile Amazia nangue, “Nene nsyaalipo kabika ao mwina kabika, inzi naali musungi wa nama ni ndabukizi wa bimuti bya miku.”
15 Inzi Yawe wanfumiizie ku mwilo wa busungi bwa nama ni kunghana nangue, “Endo ubikwile bantu bane, Baizraeli.”
16 Ale kansi unvua keebo kakua Yawe we aliwalanda nangue,
“Tekubikwila Baizraeli,
kabili tekusimikila ba mu luvyalo lwakua Izaaki.”
17 “Ni pakako, Yawe walanda evi,
‘Mukazi obe wakaba kwaluka mukambue mu muzi,
baana bobe, balalume ni banakazi, bakaba kwipawa ku bului.
Bukaba bobe bwakaba kulingua ni kuputulaniiwa.
Ni we wakaba kufwila mu kyalo kya Bazima.
Baizraeli ni bo kisinka bakaba kuya kuteekua buzia mu kyalo kyeni,
kule ni kyalo kyabo.’ ”