3
Bayuda bakuula paakale kitale
1 Mwezi wa kilooba luwaakumeene, ni Baizraeli bonse lubaali basyali mu mizi yabo, bonse baakolongheene mu Yeruzalemu bali mu kimo.
2 Kupwako, Yoshua mwina Yozadaki wabuuka pamo ni ba kwakue babitambua ni Zerubabeli mwina Shealtieli pamo ni ba kwakue, ni kutendeka kukuula paakale kitale kyakua Leza wa Baizraeli, evi baye baelelapo ngelelo ya kuziziiwa nga mukilembeelue mu kitabu kya mizilo yakua Musa muntu wakua Leza.
3 Baakuulile paakale kitale palia payaali, anzia baali batiina baeni baali bali mu kyalo, baatendekele kumwelela Yawe ngelelo ya kuzizia ya lukeelekeele ni ya kyungulo.
4 Baakitile nsikunkulu ya mitanda nga mukilembeelue, kubalua busiku baali bafumia ngelelo ya kuzizia mukipaliile.
5 Pa kyamba, baeleele ngelelo ya kuziziiwa lyonse, ni ngelelo ya kubaluka kwa kwezi, ni ya nsikunkulu yonse yakua Yawe yaalandilue kuti izuukiwe, ni ya kubalua muntu waapeele bupe bwakue kuli Yawe na mutima wakue onse.
6 Kutula busiku bwa mambo bwa mwezi wa kilooba, baatendekele kumwelela Yawe ngelelo ya kuziziiwa, inzi kiputa kya Nghanda yakua Yawe Leza kyaali tekinaakuulue.
Kukuula paakale Nghanda yakua Leza kwabamba
7 Bantu baalongiizie nfolanga ya kusazia babaazi ba mabue ni babaazi ba mbao, kabili baalongiizie ni bilio, ni bya kumina, ni mafuta, evi bitwalue ku bantu ba ku Sidona ni ba ku Tiro kuti bakite makabu na bimuti bya mumpelempele kufuma ku Lebanoni. Bebio bimuti byaaleetelue lya pa mendanke mpaka ku Yopa nga mubaapeleelue nsambu na Kiro likolo wa ku Persia.
8 Kupwako, mu mwezi wa bubili wa mu mwaka wa bubili lubaabweleele ku Nghanda yakua Leza ya mu Yeruzalemu, Zerubabeli mwina Shealtieli, ni Yoshua mwina Yozadaki, baabambile kubomba pamo ni ba kwabo, ni babitambua, ni Balawi babaafumine nabo mu buzia ni kubwelela ku Yeruzalemu. Baasaakwile Balawi baali bali na myaka kutendekela pa 20 ni mpuzio kuti baye bali bemanizi ba mwilo wa Nghanda yakua Yawe.
9 Yeshua i lu-aabuukile pamo ni baana bakue ni ba kwakue, ni Kadimieli ni baana bakue, ni baana bena Yuda, ni baana bena Henadadi pamo ni baana ba balupua babo Balawi, bonse pamo baabuukile ni kwimaninako bakuuli ba Nghanda yakua Leza.
10 Bakuuli lubaapwile kukuula kiputa kya Nghanda yakua Yawe, baabiikile babitambua bavwele makanzu a bukitambua koku bakwete ni ntandala, ni Balawi bena Asafu bakwete binsekelembue kuti bamutasie Yawe nga muba-aniinue na Daudi likolo wa Baizraeli.
11 Ni bo baimbile bamutasia Yawe balanda nangue, “Wene aweme, ni ntono yakue ku Baizraeli, ya muyayaya.” Bantu bonse baazanzwile mazui lubaali bamutasia Yawe, pantu kiputa kya Nghanda yakua Yawe kyaali kyasyakuulilue.
12 Inzi babitambua bengi ni Balawi, ni bakulu ba mikowa, pamo ni bamasiiko baamweneko Nghanda ya mambo yakua Yawe, lubaamwene kiputa kya ezi Nghanda kyakuulilue, baalilile bazanzwile mazui, ni bange bengi baasamwine na nsansa.
13 Bantu ba-andilue kwinika mazui a nsansa ni mazui a malilo, pantu bantu baakilile kusamuna ni mazui abo aunvwikile kule.