4
Miilo ya kukuula paakale Nghanda yakua Leza yakilinghaniiwa
1 Balwani ba Bayuda ni ba mu mukowa wakua Benyamina lubaunvwile nangue, balia baafumine mu buzia balimukukuula paakale Nghanda yakua Yawe Leza wa Baizraeli,
2 baile kuli Zerubabeli, ni ku bakulu ba mikowa. Baabaanine nangue, “Twatona tumikwasie kukuula paakale, pantu ni fwefue benka tulitwamupupa Leza wenu nga mwemue, kabili tulitwaelela ngelelo kutula pa musita wakua Esari-Hadoni, likolo wa ku Asuria waatuleetele pano.”
3 Inzi Zerubabeli ni Yoshua, ni bakulu ba mikowa ya Baizraeli pamo ni bange ba-asukile nangue, “Mwemue temulipo na kantu ka kutukwasiizia kukuula paakale Nghanda yakua Leza wetu, inzi fwe bene twakaba kumukuulila Nghanda Yawe Leza wa Baizraeli, nga mutwa-aniinue na Kiro likolo wa ku Persia.”
4 Bekala kyalo baatoobwele mitima ya Bayuda ni kubatiinia sana evi tekuti batwalilile kukuula paakale.
5 Baapeele ni bituulilo ku babiloolo kuti banzie mapange a Bayuda mu nsiku yonse yakua Kiro likolo wa ku Persia, mpaka pa musita wa kuteeka kwakua Dario likolo wa ku Persia.
Likolo Artasasta walembelua lupapulo
6 Ni mu buteeko bwakua Ahasuero, ku ntendeko ya buteeko bwakue, bantu baalembele lupapulo lwa kusongela bekazi ba mu Yudea ni ba mu Yeruzalemu.
7 Kabili mu nsiku yakua Artasasta, Bisilamu, ni Mitiredati, ni Tabeli, pamo ni benakue bonse, baamulembeele Artasasta likolo wa ku Persia. Lolo lupapulo lwaalembelue mu lulimi lwa Kishami, ni kubelengua mu lulimi lwa Kishami.
8 Kiloolo Rehumu, ni Simusai kalemba, baamulembeele likolo Artasasta lupapulo lwa busongezi palua Yeruzalemu nangue,
9 “Lupapulo kufuma kuli ndabukizi Rehumu kiloolo wa balukale, ni kalemba Simusai, ni ba mu mukowa wakue, ni bapinguzi, ni bange babiloolo baali bafumine ku mizi ya Ereki, ni ku Babeli, ni ku Susani, ni ku kyalo kya Elamu,
10 ni ntundu yonse yaasyeelepo, yaakumbilue na Osinapari mukulu mukindami, ni kubatwala mu muzi wa Samaria, ni mu nkendo ya kyalo yaali yasyele ku bwala mwenzi wa Efrati.”
11 Lupapulo lwaatumiinue likolo Artasasta lwaali lwalembelue evi,
“Fwe babombi bobe bali ku bwala mwenzi wa Efrati twakupozia.
12 We Likolo, twalomba umane nangue, balia Bayuda baafumine kwenu ni kwiza kono kwetu ku Yeruzalemu, balimukukuula paakale muzi wa bukisanguka ni wa bubi, evi lenu balimukupwililila kibumba ni kukuula paakale kiputa.
13 Ni pakako we likolo upalile kumana nangue kine ozu muzi wakuulua ni bibumba byakue byapua, baba bantu tebakaba basonka musonko ni kulambula mulambu pamo ni kusonkela musebo, ni ku mpeleezio bukolo tebukaba na kibwezia.
14 Kabili ni fwefue benka pantu tuli ba kisinka ku nghanda ya bukolo, tetupapile kumona likolo wafuupulua. Ni pakako i kitwatumina lupapulo, evi likolo amane nangue
15 kipalile kukebelezia mu kitabu kya malanguluzi a babikolue bobe, momo i muulikumona ni kusanga nangue, ozu muzi, kisinka ni muzi wa bukisanguka, ni wa busanzo ku makolo ni ku biputu bya kyalo. Ezio nkendo, ni nkendo ya bwavia kutula pa kale, kabili i kyaalengele ozu muzi winoonue.
16 Twakubwila we likolo nangue kine ozu muzi wakuulua paakale ni bibumba byakue kine byapua, kisinka teukaba na nsempu ku bwala mwenzi wa Efrati.”
17 Likolo waamwasukile kiloolo Rehumu ni kalemba Simusai, ni benabo bange bonse baali baikele mu Samaria, pamo ni bonse baali baikeele ku bwala mwenzi wa Efrati nangue, “Namipozia.
18 Lupapulo lumwakitutumina bakilwalula mu lulimi lwetu ni kun'mbelengela,
19 ni nene nakibeetabizia, ni bo bakikebelezia, ni kusanga nangue ozu muzi, kisinka ni muzi wa bukisanguka, ni wa busanzo.
20 Bamakolo ba buvinde baali ku Yeruzalemu ni bo baali bateeka kyalo kyonse mpaka ku bwala mwenzi wa Efrati, kabili baali basonkia musonko ni kusonkia mulambu pamo ni kusonkia musebo, ni binge bintu byaali byafuma mu nkendo inge.
21 Kansi, biike lifunde lya kubalekezia baba bantu tekuti bakuule paakale ozu muzi mpaka pankaba kubapeela nsambu.
22 Kabili kengele tekulekelele ezi milandu inamyana, evi busanzo bukeeza kutwalilila kwemia makolo.”
23 Lupapulo lwakua likolo Artasasta pa lwaabelengelue pa menso akua Rehumu, ni Samusai kalemba, ni benabo, baile lubilo ku Bayuda ku Yeruzalemu kuya kubakaania na maka ni buvinde kuti balekele kukuula paakale.
24 Evi i vyaimeene miilo ya kukuula paakale Nghanda yakua Leza mu Yerualemu mpaka mu mwaka wa bubili wa kuteeka kwakua Dario likolo wa ku Persia.