3
Hamani wakambila kulovia Bayuda
1 Pa kyamba kya bebi bintu, likolo Ahasuero waamupeele Hamani mwina Hamedata Muagagi, buvinde bwa pa muulu ni kumwalula mukulu wa babombi nakue.
2 Babiloolo bonse bakua likolo baali pa musolo wa nghanda yakua likolo, baafwineeme ni kumukindika Hamani, pantu i mwaalandiile likolo, inzi Mordekai taafwineeme ni kumukindika.
3 Babiloolo bakua likolo baali pa musolo wa nghanda yakua likolo, baamwipuziizie Mordekai, “Ale we uliwatyonenaki mizilo yakua likolo?”
4 Kubalua busiku lubaali bamwana evio tekuba waunvua, baamubwilile Hamani, evi bamone kine mapange akua Mordekai alikutwalilila, pantu waali wabaana nangue wene ni Muyuda.
5 Ni kiine Hamani lu-aamwene Mordekai tekuba wafwinama ni kumukindika, waunvwile kipuki kikata.
6 Inzi taatonene sie kulovia Mordekai bunke, pantu waali wasyamanine mukowa wakua Mordekai. Ni pakako, Hamani waatonene kulovia Mordekai pamo ni Bayuda bonse baali baikeele mu bukolo bwakua likolo Ahasuero.
7 Mu mwezi wa mambo, i mwezi wa Nisani, mwaka wa lyanondo ni ibili mu kuteeka kwakua likolo Ahasuero, kubalua busiku ni kubalua mwezi, baali bateyamo bubale ntanzi yakua Hamani mpaka mu mwezi wa lyanondo ni ibili, i mwezi wa Adari.
8 Hamani waamwanine likolo Ahasuero nangue, “Kuli mukowa umo wa bantu basalanghaniine mu mikowa ya mu biputu bya kyalo bya mu bukolo bobe, bali ni mibeele yabo ilekenkeene ni mibeele ya kubalua mukowa, kabili baba bantu balimukukaana kunakila mizilo yakua likolo. Ni pakako, likolo tapalile kubonvwila nkumbu.
9 Kine likolo wawaminua, kilembue nangue, ‘Baloviiwe.’ Ni babo baakabalovia naakabapeela talanta ya mutofue nfu lyanondo bakabiike mu kipao kyakua likolo.”
10 Likolo i lu-aavuulile kazele ka kusyusyutilako ka ku munue wakue, ni kumupeela Hamani mwina Hamedata Muagagi, mulwani wa Bayuda.
11 Kupwako, likolo wamwana Hamani nangue, “Sunga nfolanga yobe, kitila bantu bobe nga mu utoneene we mwine.”
12 Pa kyamba kya nsiku lyanondo ni itatu ya mwezi wa mambo, bakalemba bakua likolo baakuutilue na Hamani. Waabanine balembe mpapulo ya kutwala ku ndabukizi ya biputu bya kyalo bya mu bukolo bwakua likolo Ahasuero, ni ku bange bakulu balekenkeene. Kubalua kiputu kya kyalo kyaalembeelue mubeeleele nembelo yabo, ni kubalua bantu baalembeelue mu lulimi lwabo. Kubalua lupapulo lwaasyusyutiluepo kazele kakua likolo Ahasuero.
13 Mikenzi yaatwele mpapulo mu biputu bya kyalo byonse bya mu bukolo bwakua likolo Ahasuero, kuti babenoone Bayuda bonse, babepaye ni kubalovia, balumendo ni bakote, baana lukeke pamo ni banakazi pa busiku bumo, ni kubatwamina bunonsi bwabo bonse. Bobo bwaali busiku bwa lyanondo ni butatu mu mwezi wa lyanondo ni ibili, i mwezi wa Adari.
14 Twebo twaali mu lwambu lwa mpapulo, twaali twaapalile kupundua kuba mizilo mu kubalua kiputu kya kyalo, evi bantu ba ntundu yonse babwilue kuti baye baiteaniizie pa bobo busiku.
15 Mikenzi teyaakokwele kuya nga muya-aniinue na likolo. Mpunda yaatwelue mu Susani, muzi ukata wa kyalo. Likolo Ahasuero pamo ni Hamani baikeele ni kubamba kumina divai. Inzi muzi wa Susani waatoobokele.