4
Mordekai wamulomba Esta amukwasie
1 Mordekai lu-aunvwile byonse byaakitikile, waakaatile ngubo yakue, wavwala masaaka ni kwipuupa mito. Waabambile kupita mu muzi wa-angwile walimukulila na kikonko.
2 Waile kufika mpaka pa mulyango wa nghanda yakua likolo, pantu muntu avwele maasaka taali waitabiziiziwe kwingila mwa likolo.
3 Kubalua kiputu kya kyalo mwaatwelue mpunda ya mizilo yakua likolo, Bayuda baalimo baingiile mu malilo akata ni kuizilika bilio. Bengi pakati kabo baalosiizie ni kulila, baaleele pa masaaka baipuupile mito.
4 Babombi banakazi ni balalume, bamasai bakua Esta, lubaile kumubwila Esta palwakua Mordekai, Esta waamunvwiliile nkumbu. Waabapeele ngubo bamutwalile Mordekai evi avuule masaaka, inzi wene waakeene.
5 Kupwako, Esta wamukuuta Hataki umo wa pa babombi bamasai bakua likolo waali wamubombela Esta, wamutuma kuli Mordekai aye amwipuzie kine kuli bwaviaki, ni kilengiizie ni kiki.
6 Ni Hataki waile kumonana ni Mordekai pa musolo wa muzi pa nghingililo ya nghanda yakua likolo.
7 Mordekai waamwanine byonse byaamukitikiile, ni kipendo kya nfolanga yaalaile Hamani ya kubiika mu kipao kyakua likolo kuti Bayuda baloviiwe.
8 Kabili waamupeele ni lwambu lwa mpapulo ya mizilo lulembeluepo mpunda ya kulovia Bayuda, ezio yaapundilue ku Susani, muzi ukata wa kyalo, evi aye amulange Esta, ni kumubwila bi ayanga kumona. Kabili amwane Esta aye kuli likolo apaapaatileko bantu bakue.
9 Kupwako, Hataki waya kumwana Esta mwa-aninwanga na Mordekai.
10 Kabili Esta waatumine Hataki aye amwane Mordekai nangue,
11 “Babiloolo bonse bakua likolo ni bantu bonse bekeele mu biputu bya kyalo bamanine nangue kukonkana ni mizilo, kubalua muntu, mwalalume ao mwanakazi waakengila mu musolo wa mukati wa nghanda yakua likolo tekuba wakuutilue, waakeepawa, inga sie olia waakoolwelua kabango ka oro, i waakasyala wakosele. Ni nene wenka nsisyapwile nsiku anondo atatu pasili kukuutuako.”
12 Mordekai lu-aabwililue mpunda yakua Esta,
13 waabweziizie kapingu kuli Esta wamwana nangue, “Tekulangakana nangue we ulikupusuka pa Bayuda bonse pantu uli mu nghanda mwa likolo.
14 Kine wewe teubalandiileko Bayuda pa ono musita, wakaba kuloba pamo ni lupua lwakua so, pantu tekuli amanine nangue pange i kyubeeleele nabeeza pa mulandu wa musita nga ono, inzi Bayuda bene kuti bapusuka mu nzila inge.”
15 Hataki lu-aapwile kulanda na Esta, Esta ni ye waamubweziizie kuli Mordekai aye amwane nangue,
16 “Endo ukolonghanie Bayuda bonse bali ku Susani ni kubaana bezilike pa mulandu wane. Bezilike nsiku itatu busiku ni koba pasili kulia ni kumina, ni nene pamo ni babombi bane tulikuizilika evelia vyenka. Pa kyamba, mane ngie nghingile kuli likolo anzia kine nsipeelue nsambu, kine kufua, nfue.”
17 Kupwako, Mordekai waya kukita nga mwa-aniinue na Esta.