12
Pasaka
1 Baizraeli lubaali bakili mu kyalo kya Misri, Yawe waamwanine Musa ni Haruni nangue,
2 “Ono mwezi waya wali mwezi wa mambo pa myezi kuli mwemue, i kulanda nangue mwezi wa mambo wa mwaka kuli mwemue.
3 Ane libumba lyonse lya Baizraeli nangue pa busiku bwa lyanondo bwa ono mwezi, kubalua lupua lukabe kusaakula musoka umo wa mukooko ao wa mbuzi kukonkana ni bwingi bwa bantu ba mu lupua lwakue.
4 Kine bantu ba mu lolo lupua baisanga bakeepele, bapalile kwilunda na lunge lupua lwa bantu bakeepele babapalameene nabo, kusyali kukasana nama ubalikuvinda kulia ni kupua.
5 Ozo musoka wa mukooko tekuti aye walemeene. Apalile aye wali mpanga wa mwaka umo. Mukabe kubuula pa mikooko ao pa mbuzi.
6 Ozo nama mukabe kumusunga mpaka busiku bwa lyanondo ni buna ya ozo wenka mwezi. Kubalua lupua lwa mu Baizraeli lwakaba kusinza nama wabo musita wa kyungulo.
7 Bakabuule mulopa ni ku-usuba ku miilimiili ibili ya mumbali mulyango, ni ku bulato bwa pa muulu ku ezio nghanda ya kuliilamo munani wa ozo nama.
8 Mu bobo bwenka busiku musita wa busiku, bakabe kwapika bipusa bya ozo nama ni kulia busikunke, bakabe kuliila na kolo pamo ni mukate usiliko ntutumusi.
9 Tekuti mukabe kulia minofu ibisi ao ifulumiiziwe, mupalile sie kwapika byonse, mutue, ni myendo pamo ni bya munda.
10 Tekuti mukabe kusiapo bya kulia lukeele. Inzi kine bikabe kusyalapo mpaka lukeelekeele, mukabe kubizizia.
11 Mafunde a kukonka pa kulia bebio bilio ni aza: Mukabe kuya mwaisapile, mwaikakile misipi mu bitungu byenu, mwavwele ni nkwabilo yenu ku makasa, mwakwete ni tubango mu minue yenu. Kusyali kulia lubilolubilo. Ezi i yaakaba Pasaka imwaakaba mwankitila nsikunkulu.
12 “Bobo busiku musita wa busiku, nakaba kupita mu kyalo kyonse kya Misri ni kwipaya mabeli onse alalume a bantu ni a nama. Kabili nakaba kukanda baleza bonse ba mu Misri, pantu nene ndi Yawe.
13 Mulopa i wakaba kuya wali kalangi kuli mwemue ka kulanga nghanda imwakaba kuya mwalimo. Musita unakaba kumona mulopa, nakaba kupita peulu pasili kumiinoona lunakaba kuya nakanda kyalo kya Misri.
14 Bobu busiku bupalile bukabe bwalangulukua na nvyalo ya ku ntanzi, kabili bukabe bwali busiku bwa nsikunkulu yakua Yawe kubalua mwaka.” Leli i lifunde lya kubalua nsita.
Nsikunkulu ya mukate usiliko ntutumusi
15 Yawe waalandile nangue, “Mu nsiku kilooba mwemue mwakaba kuya mwalia mikate isiliko ntutumusi. Busiku bwa mambo bwa mu ezio nsiku kilooba ya nsikunkulu, mukabe kufumia ntutumusi yonse ili mu nghanda yenu. Onse wakaba kulia mukate uliko ntutumusi mu ezio nsiku kilooba ya nsikunkulu, wakaba kufumiiwa mu libumba lya Baizraeli.
16 Pa busiku bwa mambo bwa nsikunkulu, kabili ni pa busiku bwa kilooba, bantu bonse bapalile kusunga busiku bwa kulonghana kuzuuke. Mu ezio nsiku tekukaba mwilo waakaba wabombua, inga sie mwilo wa kuteania bilio bya kulia kubalua muntu.
17 Mukasunge bobo busiku bwa nsikunkulu ya mikate isiliko ntutumusi, evi mukabe mwalanguluka busiku bunaamifumiizie mwe mabumba a Baizraeli mu kyalo kya Misri. Ezio nsikunkulu ipalile kusungua na nvyalo ya ku ntanzi kuba lifunde lya muyayaya.
18 Pa busiku bwa lyanondo ni ina ya mwezi wa mambo musita wa kyungulo, i pamwaakaba mwatendekela kulia mikate isiliko ntutumusi mpaka kyungulo kya nsiku 21 ya ozo wenka mwezi wa mambo.
19 Mu ezio nsiku kilooba, tekuti kukabe muntu waakaba ni ntutumusi mu nghanda yakue. Ni pakako, namyana nangue kubalua muntu waakalia mukate ututumukile, anzia akaba wali mweni ao avyaliilue mu kyalo, waakafumiiwa mu libumba lya Baizraeli.
20 Mu ezio nsiku kilooba tekuti mukabe mwaliamo kintu kiliko ntutumusi. Konse ku mwaakaba mwaikeele mukabe mwalia sie mukate usiliko ntutumusi.”
Pasaka ya mambo
21 Musa i lu-aakuutile masiiko onse a Baizraeli ni kubaana nangue, “Endo musaakule musoka wa mukooko ao wa mbuzi wa pa bisepe byenu mu kubalua lupua, evi musinze ni kukita nsikunkulu ya Pasaka kubalua muntu ni lupua lwakue.
22 Muye mubuule misambo ya hisopo, mutubie mu mulopa uli mu kibakuli ni kusuba ku bulato bwa pa muulu, ni ku miilimiili ibili ya mu milyango ya nghanda yenu. Busiku bonse mpaka lukeelekeele tekuti kuye kwali muntu wakufuma mu nghanda,
23 pantu Yawe alikupita mu kyalo kyonse walimukwipaya Bamisri. Inzi musita u-alikumona mulopa ku bulato bwa pa muulu ni ku miilimiili, alikupita peulu, kabili tavinda kwitabizia malaika ngipaani kwingila mu nghanda yenu ni kumiipaya.
24 Mwemue pamo ni baana benu bonse, mupalile kulanguluka ni kunakila leli lifunde muyayaya.
25 Musita umwaakengila mu kekio kyalo kimwaakapeelua na Yawe nga vi-aamilaile, mupalile mukabe mwatwaliliile kukita musango wa ezi mbeela.
26 Kine baana benu bakamiipuzie ndubulwilo ya keki kimulimukukita,
27 mukaba-asuke evi, ‘Ezi i ngelelo ya Pasaka yakua Yawe lu-aapitile peulu nghanda ya Baizraeli mu kyalo kya Misri ni kutupususia fwefue lu-aali walimukwipaya Bamisri.’ ”
Musa lu-aapwile kulanda, Baizraeli baakontamikile mitue ni kumupupa Yawe.
28 Kupwako, Baizraeli bakita nga muba-aniinue na Musa ni Haruni kukonkana ni mulao wakua Yawe.
Busanzo bwa lyanondo: Mabeli alalume a Bamisri aipawa
29 Lubwaali bwasyali pakati busiku Yawe waipaile mabeli onse alalume a mu kyalo kya Misri, kubambila ku mwana libeli mwalalume wakua Farao waali wapalile kumupyana se pa kitebe kyakue kya bukolo, mpaka ku mwana mwalalume libeli wakua muntu waali wakakilue mu buloko, pamo ni ku mabeli onse a biteekua.
30 Farao ni babombi bakue pamo ni Bamisri baabuukile musita wa busiku, ni mizowa ikata yaunvwikile mwaya kyalo kyonse kya Misri pantu tekwaali nghanda yaasyele pasili kufwamo muntu.
31 Farao i lu-aakuutile Musa ni Haruni busikunke ni kubaana nangue, “Mwemue pamo ni Baizraeli fume mu bantu bane muye mumupupe Yawe nga mumwakilandila.
32 Twame bisepe byenu bya mikooko ni bya nghombe muye nga vimwakilanda. Ni nene muye mun'mpepeleko Leza an'mpaale.”
33 Bamisri baapimpiliziizie Baizraeli balenge bafume mu kyalo ni kubaana nangue, “Kine temufumine, fwe Bamisri tulikufua bonse.”
34 Baizraeli baatweme bunga bwa mikate bwaali bwakandiilue mu bipe lubwaali tebunaabiikueko ntutumusi. Baakakile mu ngubo yabo ni kupinga pa nkombe.
35 Baizraeli baakitile nga mwaalandiile Musa. Baalombele bifwanizio bya mutofue ni bya oro pamo ni ngubo ku Bamisri.
36 Yawe waalengiizie Baizraeli kutonua na Bamisri. Baizraeli baapeelue kubalua kantu kabaalombele. Evio i vibaatweme bunonsi bwa Bamisri.
Baizraeli bafuma ku Misri
37 Baizraeli baafumine paakili ku Ramese ni kuya lwa pansi mpaka ku Sukoti. Mpendua yabo yaali mupepi bantu 600,000 pasili kupendako banakazi ni baana.
38 Kwaali ni Bazima baisanziiziepo ni kuya nabo, pamo ni bisepe bya mbuzi, ni bya mikooko ni nghombe.
39 Kukonkana ni vibaafumine lubilo lubilo mu Misri, ba-andilue kuteania mpao ya mu nzila. Ni pakako, ba-apikile mikate isiliko ntutumusi ya bunga bwali bwakandiilue bubaafumine nabo mu Misri.
40 Baizraeli baikeele mu kyalo kya Misri myaka 430.
41 Ku mpeleezio ya mwaka wa 430, mu bobo bwenka busiku, mabumba a mikowa yonse ya bantu bakua Yawe aafumine mu kyalo kya Misri.
42 Bobo busiku musita wa busiku Yawe waapungile pa mulandu wa kufumia Baizraeli mu kyalo kya Misri. Ni pakako, bobo busiku bwapungile Yawe bupalile kuya bwalangulukua kubalua mwaka na nvyalo ya Baizraeli ni kuya bapunga mu kumukindika Yawe.
Mafunde palua Pasaka
43 Yawe waamwanine Musa ni Haruni nangue, “Mafunde palua Pasaka ni aza: Kubalua mweni tapalile kuliako bilio bya Pasaka.
44 Kubalua muzia asitilue na nfolanga kine wateetua yando, apalile kuliako bilio bya Pasaka.
45 Inzi mweni ni kubalua mubombi aliwasaziiwa tapalile kuliako bilio bya Pasaka.
46 Kubalua mwana mukooko wa Pasaka apalile luliilua sie mu nghanda imo. Temupalile kutwama minofu kufuma mu ezio nghanda. Kabili temupalile kutyona kikuza kya ku ozo nama.
47 Libumba lyonse lya Baizraeli lipalile kuya lyakita ezio nsikunkulu ya Pasaka.
48 Kubalua mweni ali pakati kenu kine watona kwampana nenu ku nsikunkulu ya Pasaka mu kumukindika Yawe, balalume bonse ba mu lupua lwakue bapalile kuteetuanke yando, mane bapalame ku ezio nsikunkulu. Ni ozo muntu alikupendua kuba nga muntu avyaliilue mu kekio kyalo. Ni ye alikuba ni nsambu ya kuliako. Inzi olia asiteetelue yando tapalile kuliako bilio bya Pasaka.
49 Ozo wenka muzilo i waakaba wali ku Muizraeli avyaliilue mu kyalo ni ku mweni ekeele pakati kenu.”
50 Baizraeli bonse baakitile nga mwa-aniinue Musa ni Haruni na Yawe.
51 Ni mu bobo bwenka busiku, Yawe waafumiizie Baizraeli mabumba mabumba mu kyalo kya Misri.