13
Kuzuukiiwa kwa mabeli
1 Yawe waamwanine Musa nangue,
2 “Ale nzuukiizie kubalua mwana mwalalume wa mambo. Libeli mwalalume wa Baizraeli, pamo ni wa nama, waakaba wane.”
Nsikunkulu ya mukate usiliko ntutumusi
3 Musa wa-anine bantu nangue, “Mukabe mwalanguluka lyonse bono busiku bumwafumiiwa mu buzia bumwaali mwateekelue mu Misri, pantu Yawe wamifumiamo na maka a kuboko kwakue. Mu bobu busiku tekuti mukabe mwaliamo mukate uliko ntutumusi.
4 Mwemue mwafuma lelo mu keno kyalo kya Misri kuntendeko ya mwezi wa Abibu.
5 Musita umwaakafikiiwa na Yawe mu kyalo kya Bakanaani, ni kya Bahiti, ni kya Ba-amori, ni kya Bahivi, pamo ni kya Bayebusi, kyalo kyaalailue basinue nangue waakamipeela, kyalo kiizuzimo mabeele ni kapelo, mupalile mukabe mwakita ezi nsikunkulu kubalua mwaka mu ono wenka mwezi wa mambo.
6 Mu nsiku kilooba mwaakaba mwalia mikate isiliko ntutumusi, ni mu busiku bwa kilooba mwaakaba mwakitamo nsikunkulu ya kumukindika Yawe.
7 Mu ezio nsiku kilooba mwaakaba mwalia mikate isiliko ntutumusi, pakati kenu tekuti pakabe kintu kiliko ntutumusi, ni mu mipaka ya kyalo kyenu tekuti mukamoneke ntutumusi.
8 Pa busiku bwa kilooba mupalile kulondolwela baana benu nangue, ‘Tulimukukita nsikunkulu pa mulandu wa belia byaatukitiile Yawe lu-aatufumiizie mu kyalo kya Misri.’
9 Ezio nsikunkulu ya kubalua mwaka ikabe kalangi kuli mwemue ka kulangulukilako, nga kamanino kali ku kuboko kwenu ao pa mpala yenu, ikabe yamilangulusia kutwalilila kusambilila mizilo yakua Yawe, pantu Yawe waamifumiizie mu Misri na maka a kuboko kwakue.
10 Ni pakako, sunge leli lifunde lya ezi nsikunkulu pa musita utantikilue kubalua mwaka.
Bulondolozi palua bavyalua ba mambo
11 “Yawe pa-akaba kumifikia mu kyalo kya Bakanaani ni kumipeela kekio kyalo nga vi-aalapiile basiinue ni mwe benka,
12 mupalile kumupeela Yawe kubalua mwana mwalalume libeli, ni kubalua nama ndume libeli wa pa biteekua byenu pantu byonse ni bunonsi bwakue.
13 Kubalua punda ndume libeli mwaakamulubula na musoka wa mukooko, inzi kine temukamulubula, mwaakatyona mukosi wakue. Ni kubalua libeli mwalalume wa muntu mu baana benu mwaakamulubula.
14 Mu nsiku ilimukwiza baana benu pa bakaba kumiipuzia nangue kitulitwakitila evi ni kiki? Mukabaasuke evi, ‘Tulimukita evi pantu Yawe waatufumiizie mu Misri, mu nghanda ya buzia, na maka akue.
15 Farao lu-aakeene kutwitabizia kuya, Yawe waipaile mabeli onse alalume a bantu ni a nama mu kyalo kya Misri. Ni pakako, i kitulitwamwelela Yawe kubalua libeli ndume wa nama, inzi mabeli alalume a mu baana betu tuli twa-alubula.
16 Leli lifunde mwaakaba mwalilanguluka nga kamanino kali ku kuboko kwenu ao pa mpala yenu. Byaakaba byatulangulusia Yawe vi-aatufumiizie mu Misri na buvinde bwa kuboko kwakue.’ ”
Lipumpu lya lilezi ni lipumpu lya mulilo
17 Farao lu-aitabiizie bantu kuya, Leza taabalombwele kuti baye bapite mu kyalo kya Bafilistini anzia kine i yaali nzila iipipiisie. Leza waalandile nangue, “Kine baba bantu basakukilua, kuti ba-alulula malanga abo ni kubwelela ku Misri.”
18 Inzi Leza waazyungulusiizie bantu mu nzila ipitile ku kaseeba yalungi ku Lyezi lya Kasi. Baizraeli i kibaafumiine ku Misri bali mabumba mabumba nga balukale balimukuya ku bului.
19 Musa waile watweme bikuza byakua Yusufu, nga mwa-aniinue Baizraeli na Yusufu kuti balape ni kukita. Yusufu waalandile evi, “Leza pa-akaba kumipususia, mukatwame ni bikuza byane pa kufuma pa eno nkendo.”
20 Baizraeli lubaafumine ku Sukoti, baakuulile mitanda ku Etamu mumbali kaseeba.
21 Musita wa koba Yawe waali waya wabatangiliile mu lilezi lyaali nga lipumpu pakuti abalangisie nzila, ni musita wa busiku waali waya wabatangiliile mu mulilo waali nga lipumpu pakuti abasanikile, evi baye baendele busiku ni koba.
22 Ni Yawe taafumiiziepo lipumpu lya lilezi musita wa koba, ni lipumpu lya mulilo musita wa busiku pa nkendo yakue ntanzi ya bantu.