11
Munara wa Babeli
1 Pa ozo musita, bekala kyalo bonse baali balanda sie lulimi lumo ni twebo tumo.
2 Lubaali baya lya ku kabanga, baafikile mu lulambe lwa Sinari, ni momo i mubaikeele.
3 Baalanzyaniizie nangue, “Emwe, ize tukite mabiliki ni ku-azizia bwino.” Pa kifuka kya mabue, baakitile mabiliki, ni kukuulila na kabulimbu.
4 Baalandile nangue, “Tukuule muzi ni munara ufikile mu lyulu pakuti tuye twamanikile evi tekuti tukasalanghanine mwaya kyalo.”
5 Yawe waakookele kuya kumona muzi wa munara waali wakuulua na bena bantu.
6 Yawe waalandile evi, “Baba bantu bali mu mutundu umo, kabili balimukulanda lulimi lumo, ni ezi ikili sie ntendeko ya miilo yabo. Tekuli kyaakabanzia kukita kelia kiboomiine kukita.
7 Ale tukooke tuye tuvulunghanie nandilo yabo, evi tekuti bonvwane.”
8 Ni pakako, Yawe waabasalanghaniizie pa kyalo kyonse. Ni bo baalekeele kukuula muzi.
9 Evi muzi wainikilue Babeli, pantu papo Yawe i pa-aavulunghaniizie lulimi lwa bantu bonse. Kutula papo, Yawe waabasalanghaniizie mwaya kyalo.
Bena Shemu
(1 Milandu Ya Nsiku 1.24-27)
10 Ezi i nvyalo yakua Shemu. Pa kyamba kya kibunda lupaali pasyapitile myaka ibili, Shemu lu-aakumaniizie myaka 100, waavyele mwana mwalalume ni kumwinika Arpakisadi.
11 Pa kyamba kya kuvyala Arpakisadi, Shemu waikeele pa kyalo myaka 500 ni kuvyala bange baana balalume ni banakazi.
12 Arpakisadi lu-aakumaniizie myaka 35, waavyele Sela.
13 Pa kyamba kya kuvyala Sela, Aripakisadi waikeele pa kyalo myaka 403 ni kuvyala bange baana balalume ni banakazi.
14 Sela lu-aakumaniizie myaka 30, waavyele mwana mwalalume ni kumwinika Eberi.
15 Pa kyamba kya kuvyala Eberi, Sela waikeele pa kyalo myaka 403 ni kuvyala bange baana balalume ni banakazi.
16 Eberi lu-aakumaniizie myaka 34, waavyele Pelegi.
17 Pa kyamba kya kuvyala Pelegi, Eberi waikeele pa kyalo myaka 430 ni kuvyala bange baana balalume ni banakazi.
18 Pelegi lu-aakumaniizie myaka 30, waavyele Reu.
19 Pa kyamba kya kuvyala Reu, Pelegi waikeele pa kyalo myaka 209 ni kuvyala bange baana balalume ni banakazi.
20 Reu lu-aakumaniizie myaka 32, waavyele Serugi.
21 Pa kyamba kya kuvyala Serugi, Reu waikeele pa kyalo myaka 207 ni kuvyala bange baana balalume ni banakazi.
22 Serugi lu-aakumaniizie myaka 30, waavyele Nahori.
23 Pa kyamba kya kuvyala Nahori, Serugi waikeele pa kyalo myaka 200 ni kuvyala bange baana balalume ni banakazi.
24 Nahori lu-aakumaniizie myaka 29, waavyele Tera.
25 Pa kyamba kya kuvyala Tera, Nahori waikeele pa kyalo myaka 119 ni kuvyala bange baana balalume ni banakazi.
26 Tera lu-aakumaniizie myaka 70, waavyele Abramu, ni Nahori pamo ni Harani.
Nvyalo yakua Tera
27 Ezi i nvyalo yakua Tera se kwa Abramu, ni se kwa Nahori pamo ni Harani. Harani i waavyele Loti.
28 Harani waafwiliile mu kyalo ki-aavyaliiluemo, mu Uri, muzi wa Bakaldayo. Ozo musita sibo Tera waali wakikosele.
29 Abramu waupile Sarai, Nahori ni ye waupile Milka mwana mwanakazi mwina Harani. Harani i waavyele Milka ni Iska.
30 Sarai muka Abramu taali na mwana pantu waali nghumba.
31 Tera waamutweme mwana wakue Abramu ni mwinzikulu wakue Loti mwana mwalalume mwina Harani, pamo ni Sarai muka mwana wakue Abramu. Tera waafumine nabo mu Uri mu muzi wa Bakaldayo ni kuya nabo mu kyalo kya Kanaani. Inzi lubaafikile ku Harani, baikeele koko.
32 Tera waafwiliile ku Harani wali na myaka 205.