12
Abramu wakuutua na Leza
1 Yawe waamwanine Abramu nangue, “Fuma mu kyalo kyobe, sia bantu bobe pamo ni nghanda yakua so uye waya mu kyalo kindikukulangisia.
2 “Nene naakakukita kuba mutundu ukata,
kabili naakakupaala.
Naakalengia liina lyobe kumanika,
ni we waakaba wali mapaalo.
3 Olia waakakupaala, ni ne naakamupaala.
Inzi olia waakakutiipa, ni ne naakamutiipa.
Kabili ntundu yonse ya pa kyalo
yaakapaalilua muli wewe.”
4 Abramu waafumine mu Harani nga mwaalandiile Yawe. Pa ozo musita, Abramu waali wasyali na myaka 75. Loti ni ye waile pamo nakue.
5 Abramu waile ni mukazi wakue Sarai pamo ni Loti mwana mwalalume mwina mwalawakue Harani, kabili waatweme bunonsi bwabo pamo ni bantu babaanonkele mu Harani, ni kutendeka lwendo, waya kwingila nabo mu kyalo kya Kanaani.
Lubaafikile ku Kanaani,
6 Abramu waile waendooka mu kyalo mpaka waya kufika ku muzi wa kimuti kikata kya More kya ku Sekemu. Pa ozo musita, Bakanaani baali bakikeele sie mwenka momo mu Kanaani.
7 Yawe waamumonekeele Abramu ni kumwana nangue, “We Abramu, keki i kyalo kinaakapeela nvyalo yobe.” Ku ezio nkendo, Abramu i ku-aamukuuliile Yawe kitale.
8 Abramu lu-aafumine papo, waile ku kapili ku kabanga ka muzi wa Beteli ni kuya kwimikako liema lyakue pa bukata bwa Beteli ni Ai. Beteli yaali yali ku mboosi, ni Ai yaali yali ku kabanga. Koko kwenka ku Ai, Abramu i ku-aamukuuliile Yawe kinge kitale ni kumupupa Yawe.
9 Kabili Abramu waatwaliliile kuya. Waile walungi ku Negebu.
Abramu waya ku Misri
10 Nzala luyaakilile mu Kanaani, Abramu waile kwikalanke ku Misri nga mweni.
11 Lu-aali wasyafika ku Misri, waamwanine mukazi wakue Sarai nangue, “N'manine nangue wewe uli mwanakazi aweme lukebu.
12 Bamisri pabaya kukumona ni kwinika nangue uli mukazi wane, baya bangipaye, ni we uye usyale wakosele.
13 Kansi pabaya kukwipuzia, uye ubaasuke nangue uli nkazyamwine pantu kine uye ulande evio, nakaba kusungua bwino.”
14 Abramu waile kufika mu Misri. Bantu ba mu Misri lubaamumwene Sarai, baamwene nangue ozo mwanakazi waali wakilile kuwama.
15 Babiloolo ni bo lubaamumwene, baile kumutasiizia Likolo Farao. Kupwako, bamutwama ni kumutwala ku nghanda yakua Farao.
16 Farao waamukitiile Abramu bintu biweme pa mulandu wakua Sarai, ni pakako waapeelue mikooko ni nghombe, ni punda ndume ni ikota, ni ba bombi balalume ni banakazi, pamo ni nghamia.
17 Inzi Yawe waamulwalikile Farao pamo ni bantu ba mu nghanda yakue, pantu waamutweme Sarai muka Abramu kuti aye wali mukazi wakue.
18 Farao waamukuutile Abramu ni kumwipuzia nangue, “Abramu, ni kiki kiwakinkitila? Ale wakinghaninaki nangue Sarai te mukazi obe?
19 Ale kabili wakilandilaki nangue Sarai ni nkaziizo? Wewe i wakilengia nene n'mutwame ni kumwalula mukazi wane. Ewe, mutwame mukazi obe uye waya.”
20 Farao wa-anine bantu bakue bamuseekezie Abramu ni mukazi wakue pamo ni bintu byonse bi-aali nabio.