15
Leza wakita kipingo ni Abramu
1 Bebio byonse lubyaapitile, Yawe waamwanine Abramu mu kimonua nangue, “Tekutiina pantu nene ndi kisoolelo kyobe ni kilambu kyobe kikata.”
2 Abramu waipuziizie evi, “We Yawe Kabezia Mpungu, waakan'mpeelaki? Pantu nene nsili na mwana. Kubako Eliezeri wa ku Damaski i waakapyana bintu byane?”
3 Abramu waalandile evi, “Mona nene tewan'mpeele luvyalo. Kansi ozu mubombi wa mu nghanda yane i waakaba mupyani wa bintu byane!”
4 Yawe waamwanine Abramu nangue, “Ozu mubombi takaba mupyani wa bintu byobe, inzi mwana obe mwalalume wakwivyalila i waakaba mupyani wa bintu byobe!”
5 Yawe waamufumiiziizie Abramu panze ni kumwana nangue, “Ale kenta mu lyulu upende ntanda kine uli kuvinda kupenda.” Kabili wamwana nangue, “Evi nvyalo yobe i viyaakaba yavulile.”
6 Abramu waamuketekeele Yawe. Ni pakako, Yawe waamumwene wali mulunghami.
7 Kabili waamwanine evi, “Mona nene ndi Yawe waakufumiizie mu Uri mu kyalo kya Bakaldayo ni kukupeela keki kyalo kuti kibe kyobe.”
8 Abramu waipuziizie evi, “We Yawe Kabezia Mpungu! Ale kuti namana syani nangue kyaakaba kyane?”
9 Yawe waamwasukile evi, “Ale n'mpeelepo nghombe musoka wa myaka itatu, ni mbuzi mukota wa myaka itatu, ni mpanga wa myaka itatu, ni kibondo kya nkunda pamo ni kya kipeele.”
10 Abramu waatweme nama, waibazula pa bukata, ni kubiika bibazu byakenteene. Inzi byoni byene taabibazwile.
11 Ni makubi lu-aakookeele pa bibazu bya nama, Abramu wa-akumbile.
12 Koba lukaali kasyazimina, Abramu waonene tulo tukata, kabili waunvwile mwezo wa nfinzi ikata.
13 Yawe waamwanine evi, “Nvyalo yobe yaakaba yeni mu kyalo nghwana, kabili baakaba bazia ba bene kyalo, ni bo baakeemiwa na bene kyalo myaka 400.
14 Naakakanda ntundu yaakabateeka buzia, ni pa kyamba, baakafuma batweme bunonsi bwingi.
15 Inzi wewe waakafua wali ni mutende. Kabili waakaziikua wali ni bukote buweme.
16 Ni luvyalo lwa buna lwaakabwelela pano pantu bubi bwa Ba-amori tebunaakumane.”
17 Koba lukaazimiine, paizile nfinzi ikata. Kyunsi kikata pamo ni libeebe lyaamwenekele lyalimukupita pa bukata bwa bibazu bya nama.
18 Bobo busiku Yawe waakitile kipingo ni Abramu ni kumwana nangue, “Napeela keki kyalo ku nvyalo yobe kutula ku lyezi lya ku Misri mpaka ku mwenzi ukata wa Efrati,
19 pamo ni ku kyalo kya Bakeni, ni kya Bakenesi, ni kya Bakadmoni,
20 ni kya Bahiti, ni kya Baperizi, ni kya Barefaimu,
21 ni kya Ba-amori, ni Kya Bakanaani, ni kya Bagirgasi, pamo ni kya Bayebusi.”