16
Hagari wavyala Isimaeli
1 Sarai muka Abramu waali wali nghumba. Inzi abanga wali ni mubombi umo mukazyana Mumisri liina lyakue Hagari.
2 Sarai waamwanine Abramu nangue, “Unvua, Yawe tan'mpeele luvyalo lwa kuvyala baana, kansi laala sie na ozu mubombi wane pantu pange waakanvyalila mwana.” Abramu waitabiile.
3 Sarai muka Abramu waabuulile mubombi wakue Hagari wa ku Misri ni kumupeela Abramu kuti aye wali mukazi mwanike. Bebi bintu byaakitikile Abramu lu-aali wasyaikeele myaka lyanondo mu Kanaani.
4 Abramu waaleele na Hagari, ni ye waimita. Hagari lu-ainikile nangue waimita, Sarai waamwenekele wa mpuni kuli Hagari.
5 Sarai waamwanine Abramu, “Bubi bwane bube pali wewe. Nene naakupeele mubombi wane mu nkulo yobe. Inzi lu-akimona nangue waimita, wakin'mona wampuni. Yawe atupingule, nene ni wewe!”
6 Abramu ni ye waamwanine Sarai, “Mona mubombi obe ali mu minue yobe, mukitile muutoneene.” Sarai waamwemizie, ni ye mpaka wamubutuka.
7 Malaika wakua Yawe waamusangile Hagari mu kaseeba pa kasulo ka menda, kasulo kaali mumbali nzila yaali yaile ku Suri
8 ni kumwana nangue, “We Hagari mubombi wakua Sarai, ulimukufuma pi? Kabili ulimukuya pi?”
Wene wa-asukile evi, “N'mbutukile yangulenzi Sarai.”
9 Malaika wakua Yawe waamwanine evi, “Bwela uye umunakile nokolenzi.”
10 Kabili malaika wakua Yawe waamwanine evi, “Naakasandulula nvyalo yobe, ni yo teikapendeka kukonkana ni viyaakaba yavulile.”
11 Malaika wakua Yawe waamwanine evi, “Mona wewe wimisi, wakaba kuvyala mwana mwalalume, kabili wakaba kumwinika liina lyakue Isimaeli pantu Yawe wakyunvua malilo a maavia obe.
12 Ni ye waakaba nga punda wa mu kisonso pakati ka bantu. Waakaba mulwani wa bantu bonse, ni bantu bonse baakaba balwani bakue, ni bwikazi bwakue bwaakaba bwa bulwani ku lupwa lwakue lonse.”
13 Hagari waakuutile Liina lyakua Yawe u aalandile nakue. “Wewe uli Leza Aliwan'mona.” (Mu Kiebrania ni El-Roi) Pantu waalandile evi, “Na mumona aliwan'mona.”
14 Ni pakako, keki kiina kya menda i kikilikyakuutilua Beer-Lahai-Roi, ni kyo kili pa bukata bwa Kadesi ni Beredi.
15 Hagari waamuvyaliile Abramu mwana mwalalume, Abramu waamwinikile Isimaeli olia mwana waavyelue na Hagari.
16 Abramu waali na myaka 86 lu-aavyaliilue Isimaeli na Hagari.