26
Izaaki wapaalua na Leza
1 Kabili pa kyalo paali kimina kya nzala kukila kimina kya nzala kyaali mu nsiku yakua Abrahamu. Izaaki waile kuli Abimeleki Likolo wa Bafilistini mpaka ku Gerari.
2 Yawe waamumonekeele Izaaki. Waamwanine evi, “Tekuya ku Misri, inzi nakaba kukulangisia kwa kuti ukabe kuya kwikala.
3 Ikala sie mu keki kyalo kya bweni, naakaba pamo nobe ni kukupaala pantu wewe pamo ni nvyalo yobe yonse nakaba kumipeela keki kyalo kyonse, kabili naakafikilizia kilapo kinaalapiile so Abrahamu.
4 Naakasandulula nvyalo yobe nga ntanda ya mu lyulu, kabili naakaipeela bebi byalo byonse. Ntundu yonse ya pa kyalo yaakapaalilua mu luvyalo lobe,
5 pantu Abrahamu waunvwiliile lizui lyane ni kusunga milao yane, ni mafunde ane, ni bupinguzi bwane pamo ni mizilo yane.”
6 Ni pakako, Izaaki waikeele mu Gerari.
7 Bantu ba mu Gerari lubaamwipuziizie palua mukazi wakue, waalandile nangue, “Ni nkazyamwine.” Taitabiile nangue waali mukazi wakue pantu waali watiina nangue pange bantu kuti bamwipaya ni kumutwama Rebeka, pantu Rebeka waali wa lukebu luweme.
8 Izaaki lu-aapwileko nsiku ingi, Abimeleki likolo wa Bafilistini waapuziizie menso pa nzota ni kumona Izaaki walimukusaapa na mukazi wakue Rebeka.
9 Abimeleki waamukuutile Izaaki ni kumwana nangue, “Kisinka nainika nangue Rebeka ni mukazi obe! Ale wakilandilaki nangue ni nkaziizo?”
Izaaki waamwasukile evi, “Nandenge nangue ni mukazi wane, nga nakiipailuapo.”
10 Kabili Abimeleki waamwanine evi, “Wakitubeepelaki? Umo wa mu bantu bane akambulenge na mukazi obe, wewe nga i wakilengia bantu bane kuba ni kilubo.”
11 Ni pakako, Abimeleki waabasokele bantu bakue nangue, “Emwe, onse wakaba kumukitila ozu muntu pamo ni mukazi wakue bibiipile, wakaba kwipaiwa.”
12 Izaaki waabyele mbezu mu kekio kyalo, ni ozo mwaka, waazombwele mbezu ingi nghendo 100 kukila elia i-aabyele, pantu Yawe waamupaalile.
13 Izaaki waanonkele, ni bunonsi bwakue bwaatwaliliile mpaka wa-aluka munonsi mukata.
14 Bafilistini baamunvwiliile bunkua pantu waali ni bisepe bya mikooko, ni bya nghombe, pamo ni babombi bengi.
15 Ni pakako, Bafilistini baabiikiile bulongo mu biina byakue bya menda byaimbilue na babombi bakua se Abrahamu, Abrahamu lu-aali wakikosele.
16 Abimeleki waamwanine Izaaki, “Ewe, fuma pakati ketu pantu wa-aluka ni maka kukila fwefue.”
17 Izaaki waafumine papo, waya kwimika tutanda mu lulambe lwa Gerari, ni kwikala koko.
18 Izaaki waimbulwile biina bya menda byaali byaimbilue pa musita waali wakikosele Abrahamu, pantu Bafilistini baamubiikiilemo bulongo mu bebio biina bya menda Abrahamu lu-aali wasyafwile, kabili waabiinikile meena enka alia a byainikilue na se.
19 Babombi bakua Izaaki baimbile biina bya menda mu lulambe mpaka basanga tusulo twa menda.
20 Basungi ba ku Gerari baakankabwile na basungi bakua Izaaki. Basungi ba ku Gerari baalandile nangue, “Aza menda ni etu.” Ni pakako, keki kiina kya menda Izaaki waakiinikile “Mukanka.” Pantu baakankabwile nakue.
21 Kabili baimbile kinge kiina kya menda, inzi ni kyo baakankabwiliilepo. Ni pakako, Izaaki waakiinikile Sitina.
22 Izaaki waafumine papo ni kuya kwimba kinge kiina kya menda. Pa kekio kyene tebaakankabwiliilepo. Ni pakako, Izaaki waakiinikile Rehoboti. Waalandile evi, “Pantu evi Yawe watupeela nkendo ni fwe twaakavula mu kyalo.”
23 Izaaki waafumine papo ni kusela waya ku Beri-Seba.
24 Bobo busiku musita wa busiku, Yawe waamumonekeele. Waamwanine evi, “Nene ndi Leza wakua so Abrahamu. Tekutiina, pantu ndi pamo nobe. Naakakupaala ni kusandulula nvyalo yobe pa mulandu wa mubombi wane Abrahamu.”
25 Izaaki waakuulilepo kitale ni kukuuta Liina lyakua Yawe. Kabili waimikilepo liema lyakue. Babombi bakue baimbileko ni kinge kiina kya menda.
Izaaki ni Abimeleki baunvwana
26 Abimeleki, ni kibuza wakue Ahuzati, pamo ni Fikoli mukulu wa balukale, baafumine ku Gerari ni kuya kuli Izaaki.
27 Izaaki waabaanine evi, “Mwemue temuntonene, kabili mwankumbile kwenu. Eba, ale mwaiza mwankonkeeleki?”
28 Ba-asukile evi, “Evi i vitwainika nangue Yawe ali pamo nobe, kabili twakimona nangue tupalile kunvwana nobe. Ni pakako, tutonene tupinghane nobe
29 nangue teukatukitila kibiipile pantu ni fwefue tetwaakukitiile kibiipile, inga sie kiweme, pamo ni kukupeela nsambu ya kuti uilepo bwino. Wewe lenu upaalilue na Yawe.”
30 Izaaki waabatebetele, ni bo baaliile ni kumina.
31 Lukeele lwakue paakili lukeelekeele, bonse baunvwene ni kupinghana. Kupwako, Izaaki wabalaya nangue, “Ale ilepo bwino.”
32 Bobo bwenka busiku, babombi bakua Izaaki baizile kumwana palua kiina kya menda kibaali balimukwimba nangue, “Twasanganga menda.”
33 Izaaki waakiinikile, “Siba.” Ni ozo muzi i kiwakuutilua Beri-Seba ni lenu kumo.
Bakazi Bazima bakua Esau
34 Esau lu-aakumaniizie myaka 40, waupile Bahiti babili, Yuditi mwana mwanakazi mwina Beri, ni Basemati mwana mwanakazi mwina Eloni.
35 Babo banakazi baaletele bulanda kuli Izaaki ni Rebeka.