27
Izaaki wamupaala Yakobo
1 Izaaki lu-aakotele ni kwaluka mpofu, waakuutile libeli wakue mwalalume Esau, “We mwana wane.”
Mwana wakue waiteebe, “Ne ono pano.”
2 Izaaki waamwanine evi, “Mona nene nakota, nsimanine busiku bwa kufua kwane.
3 Ale iisape utwame bilwilo byobe, buta pamo ni mivui, uye waya mu kisonso evi uye ungipailemo nama,
4 mane wize ungelekele muto mu musango untonene. Pauya kundeetela, ni ne nalia, naya nkupaale ntanzi ya kufua kwane.”
5 Izaaki lu-aali walimukulanda na Esau, Rebeka waali watwiliziizie. Esau lu-aile mu kisonso mu kukumba nama aleete,
6 Rebeka waamwanine Yakobo, “We mwana wane, nene naunvua so walimukulanda na mukuluubo Esau nangue,
7 ‘Ndeetele nama ungelekele muto ndie, mane nkupaale pa menso akua Yawe lunsinafue.’
8 Kabili Rebeka waamwanine evi, ‘Kansi we mwana wane, nakulomba ukite kindikukwana.
9 Endo utwamepo misoka ibili ya mbuzi iweme, evi ngize n'mwelekele so muto mu musango u-atoneenemo.
10 Ni we waya umutwalile so alie, ni kukupaala ntanzi ya kufua kwakue.’ ”
11 Yakobo waamwanine nghina Rebeka, “We yangu, Esau ali ni bunkupili bwingi, inzi nene mubili uteleele.
12 Pange tawe kuti wankumia ni kwinika nangue naibeepezia kuba Esau, ni pakako, kuti naileetelela ntiipu pa kifuka kya mapaalo.”
13 Nghina waamwanine evi, “Ntiipu yobe ibe pali nene. Wewe kita sie munakwanina. Endo undeetele mbuzi.”
14 Yakobo waile kutwama mbuzi ni kumuleetela nghina. Nghina waelekele muto mu musango waali watoneenemo se kwa Yakobo.
15 Nghina waabuulile ngubo iwamiisie yakua Esau mwana mukulu, ngubo i-aali wamusungiile mu nghanda ni kumuvwika Yakobo mwana mwanike.
16 Rebeka waamukupiliile Yakobo mpapa ya mbuzi ku maboko ni mu mukosi.
17 Waamupeele Yakobo muto pamo ni mukate bi aateaniizie.
18 Kupwako, Yakobo waya kumwana se nangue, “We tawe, naiza.”
Se waamwipuziizie evi, “We mwana wane, uli ni?”
19 Yakobo wa-asukile evi, “Ni nene libeli obe Esau. Nateania kale bintu biwanghananga. Ale buuka ulie minofu iwanghananga kuti nkuleetele, evi un'mpaale.”
20 Izaaki waamwipuziizie evi, “We mwana wane! Waipaya kale?”
Waamwasukile, “Yawe Leza obe i wankwasia kuti ndenge ngipaye nama.”
21 Izaaki waamwanine Yakobo, “Ale palama pano nkukumie nghunvue kine uli wenka mwana wane Esau ao abe.”
22 Kupwako, Yakobo wamupalama se, se ni ye wamukumia ni kumwana nangue, “Lizui ni lyakua Yakobo, inzi maboko ni akua Esau.”
23 Izaaki taamwinikile pantu maboko akue aali akupiliilue na mpapa yaali ni masako nga bunkupili bwakua Esau. Kupwako, wamupaala.
24 Izaaki waamwipuziizie Yakobo, “Ati, kubako ni kiine wewe uli mwana wane Esau?”
Yakobo wa-asukile evi, “Ee, i nene wenka.”
25 Izaaki waamwanine evi, “Ale n'mpalamikile minofu ya nama iwaipayanga ndie, evi nkupaale.” Yakobo waamupalamikiile bilio walia, wamuleetela ni bya kumina wamina.
26 Izaaki waamwanine evi, “We mwana wane, ale palama pano unkumbatile.”
27 Yakobo lu-aapaleeme ni kumukumbatila, Izaaki waunvwile bunu bwa ngubo yakue, wamupaala walanda,
“Bunu bwa mwana wane
buli nga bunu bwa kisonso
kipaalilue na Yawe.
28 Leza akupeele lume lwa mwiulu,
ni bunonsi bwa pa kyalo,
bilio ni bya kumina bingi!
29 Ntundu ikubombele,
ni mikowa ifwiname pa ntanzi yobe.
Ube mukulu pa ba kobe,
ni bena noko bafwiname pa ntanzi yobe.
Atiipue kubalua muntu aliwakutiipa,
ni aliwakupaala apaalue.”
Esau walomba mapaalo kuli Izaaki
30 Izaaki lu-aapwile kumupaala Yakobo, mu kufumapo sie, mukuluube Esau wafika wafuma mu kukumba nama.
31 Ni ye waelekele muto ni kumuleetela se walanda nangue, “We tawe, ale buuka ulie munani unakuleetela evi un'mpaale.”
32 Se Izaaki waamwipuziizie evi, “Eba! Ale wewe uli ni?”
Esau wa-asukile evi, “Ni nene libeli obe Esau.”
33 Izaaki waakilile kukwaka walanda nangue, “Emwe! Ale olia muntu wandetelanga munani ni kumuliila byonse nani? Pantu i wenka unapaalanga. Ni azo mapaalo nsivinda ku-apokolola. Mapaalo ni akue.”
34 Esau lu-aunvwile evio, waalilile malilo akata waunvwile bulanda. Waalandile evi, “We tawe, ale ni nene n'mpaale!”
35 Izaaki wa-asukile evi, “Mwalaobe waizanga kun'mbeepa. Wene i wakutwaminanga mapaalo.”
36 Esau waalandile evi, “Kansi i ki-ainikiilue Yakobo pantu Lolu i lwendo lwa bubili kungibila. Lwendo lwa mambo wangibiile nsambu yane ya bubeli, kabili evi wangibila mapaalo ane. Ati we tawe, kubako tewansungilangapo mapaalo?”
37 Izaaki wa-asukile evi, “Unvua, namupeela kale nsambu ya kuba mukuluubo, ni ba kwakue bonse kuti baye bamubombela. Namupaalanga kuti aye wali ni bilio ni bya kumina bingi. Ni evi nsili na mapaalo a kuti nkupaale we mwana wane!”
38 Esau waamwanine se, “We tawe, Tekusyele ata kamo ka kuti un'mpaale ni nene?” Esau waali wapaapaata koku walimukulila.
39 Izaaki waamwanine evi,
“Wewe waakeekala kule ni musili ufukile,
kule ni lume lwa mwiulu.
40 Bwikazi bobe bwaakaba bwa bului,
inzi waakaba wabombela mwalaobe.
Luwaakamona kuti wilubule,
waakatyona mupingo wa mu mukosi obe.”
41 Esau waamusuulile Yakobo pantu i waapaalilue na se. Waalandile evi, “Muleke sie, nsiku ya kumulila tawe ilimukuya yapalama, ni pa kyamba i panaakamwipaya mwalawane Yakobo.”
42 Rebeka lu-aunvwile palua mapange akua Esau, waamwanine Yakobo, “We mwana wane, mukuluubo Esau alimukwiteekia mutima palwakua wewe wakambila kukwipaya.
43 We mwana wane, unvua vindikukwana. Butukila ku Harani kuli ndumyamwine Labani,
44 evi uye wikaleko nsiku iniini mpaka kipuki kyakua mukuluubo kikapue
45 ni kukweleela kiwakimukitila, mane nkakulaizie ukeeze, pantu kuti kyakila kun'mbiipila kufwilua na bantu babili busiku bumo.”
Izaaki wamutuma Yakobo kuli Labani
46 Rebeka waamwanine Izaaki, “Nalwala, kabili napeleelua pa mulandu wa banakazi Bahiti. Kine Yakobo waupa umo wa pa baba banakazi Bahiti ba mu keno kyalo, kyawama sie ni kufua.”