33
Yakobo wasaakaana ni Esau
1 Yakobo lu-aamumwene Esau walimukwiza pamo ni bantu 400, waalekenkaniizie baana bakue: Lea ni baana bakue, Rakeli ni baana bakue, ni babombi babili banakazi ni baana babo.
2 Waatangiziizie babombi bakue babili pamo ni baana babo, Lea ni baana bakue i baakonkelepo, Rakeli i waali wasyaliile pamo ni Yusufu.
3 Yakobo waabatangiliile koku walimukuya wafwinamina pansi mpaka nghendo kilooba ni kuya kufika mu kyeni kyakua mukuluube.
4 Inzi Esau waile kumusensekela wali lubilo. Lu-aafikile, waamukumbatiile mu mukosi ni kumufyompa, ni bonse babili batendeka kulila.
5 Esau akente evi, wamona banakazi baimeene pamo ni baana babo. Esau waipuzia kale, “Eba, ale baba bauli nabo ni bani?”
Yakobo waalandile evi, “Baba i baana baapeelue mubombi obe na nkumbu yakua Leza.”
6 Babombi banakazi bakua Yakobo pamo ni baana babo baamupalamiine Esau ni kumufwinamina.
7 Lea ni baana bakue ni bo baile kumufwinamina. Pa mpeleezio, Yusufu ni Rakeli ni bo baile kumufwinamina.
8 Esau waamwipuziizie Yakobo, “Ewe, ale belia bisepe binasaakaananga nabio kolia ni byaki?”
Yakobo waamwasukile evi, “Nakituma bebi bisepe pakuti n'mpokelelue na mukuluamwine.”
9 Esau wa-asukile evi, “Sunga sie bebi bisepe byobe, ni nene wenka nkwete sie bingi.”
10 Yakobo waalandile evi, “Napaapaata upokelele pakuti kiye kyali kisininkizio kya kulangisia nangue wan'mpokelela. Kumona kunakumona, ni kukonkana ni viwan'mpokelela, na-aluka nga ne wamona lukebu lwakua Leza.
11 Nakupaapaata upokelele bobu bupe bwane buwaleetelua pantu Leza wakin'mpaala ni kun'mpeela kubalua kantu.” Yakobo waakilile kumupaapaata Esau mpaka wafikiila kupokelela.
12 Esau waalandile evi, “Ale iza twende, ni ne ndikuya nakutangiliile.”
13 Yakobo waalandile evi, “We mukuluamwine, umwene baana vibanakile, kabili nene wenka i alimukusunga mikooko ni mbuzi ilimukonsia twana. Ezi nama yane kine yaenda kukila busiku bumo yonse ilikufua.
14 Ni pakako, wewe tangila sie, ne ozo alimukwiza buke buke kukonkana ni nghendelo ya baana ni bisepe byane. Twakaba kwiza kumonana koko kwenka ku Seiri.”
15 Esau waalandile evi, “Kansi nkusiile baba bantu bandi nabo wize pamo nabo.”
Yakobo waalandile evi, “Ata, ale viwangeleela kale! Wewe endo waya sie.”
16 Kupwako, Esau wamusia ni kubwelela ku Seiri.
17 Yakobo ni ye waile ku Sukoti ku-aakuulile nghanda yakue ni bipata bya nghombe. Ni pakako, pa ezio nkendo i kipalipakuutilua Sukoti.
18 Yakobo lu-aabwelele kufuma ku Padani-Aramu, waabwelele sie bwino mpaka kuya kufika ku Sekemu mu kyalo kya Kanaani ni kwimika liema lyakue ntanzi ya muzi.
19 Ezi nkendo i aimikilepo liema, waasitile ku luvyalo lwakua Hamori se kwa Sekemu na shekeli 100 ya mutofue.
20 Waakuulilepo kitale ni kwi-inika Eli-Elohe-Izraeli.