34
Sekemu wamukitila Dina bintu bisipalile
1 Dina, se waali Yakobo, ni nghina waali Lea. Waile kupita wapempula bakazyana nakue ba mu kekio kyalo.
2 Sekemu mwana mwalalume mwina Hamori Muhivi, mukulu wa kyalo, lu-aamumwene Dina walimukupita, waamukwete ni kumupatikizia kukumana nakue.
3 Sekemu waawamiinue sana na ozo mukazyana Dina mwina Yakobo. Sekemu waabambile kumubembia ozo mukazyana na twebo tuweme.
4 Sekemu waamwanine se Hamori amutwamine ozo mukazyana kuti abe mukazi wakue.
5 Yakobo lu-aunvwile nangue mwana wakue Dina wakipatikiziiwa na Sekemu kuti alaale nakue, taalandile kantu pantu baana bakue balalume baali baile ku kusunga nama mu kisonso. Waapembeele mpaka musita ubaabwelele.
6 Hamori se kwa Sekemu waile kuli Yakobo kuti alanzyanie nakue.
7 Baana bena Yakobo lubaunvwile byaakitikile, baabwelele ku muzi, baafiitilue sana pantu Sekemu waakitile bintu bya bulubi mu Izraeli. Bintu bisipalile kukitika.
8 Hamori waamwanine Yakobo ni baana bakue, “Mwana wane Sekemu wamutona sana Dina. Kansi namipaapaata mumupeele nsambu ya kuti abe mukazi wakue.
9 Tunvwane sie kuti tuye twaufyania. Tupeele baana benu banakazi, ni fwe tumipeele baana betu banakazi.
10 Kuti mwaikala pamo ni fwefue mu keno kyalo. Kuti mwaikala konse kumwatona kwikala, ni kusuluzia kyonse kimwatona kusuluzia ni kwikwatila kazonga kenu.”
11 Sekemu waamwanine se kwa Dina ni bakuluube, “Namipaapaata kuti mungitabile, ni nene ndikumikitila kyonse kimulikutona kuti n'mikitile.
12 Anzia munundila mutengo ni bupe, ndikumipeela byonse bimulikun'mpingula, inzi mun'mpeele nsambu ya kuupa ozu mukazyana Dina kuti abe mukazi wane.”
13 Inzi pantu Sekemu waamupatikiizie Dina kukumana nakue, baana bena Yakobo baamwasukile Sekemu pamo ni Hamori mu bukengezi.
14 Baalandile evi, “Fwefue tetuvinda kuufia nkazyetu ku bantu basiteetelue yando. Keki ni kya busoni kuli fwefue.
15 Inzi kine mwaitabila kuya mwateetua yando nga fwefue, kuti twaitabila kuti muye mwaupila kono kwetu.
16 Baana benu kuti baupua na baana betu ni baana betu kuti baupua na baana benu. Kabili kuti twaikala nenu ni kuba mutundu umo.
17 Inzi kine mwakaana kuteetua yando, tulikumutwama Dina ni kukuuka tukuuke pa eno nkendo.”
18 Hamori ni mwana wakue Sekemu baawamiinue na kako kaalandilue.
19 Ni pakako, mulumendo taakokwele kuteetua yando pantu waali wamutoneesie Dina. Sekemu waali wakindikilue sana mu lupua lwakue.
20 Hamori ni mwana wakue baile pa mulyango wa muzi ni kulanzyania ni bantu ba mu muzi wabo nangue,
21 “Emwe, baba bantu ni bantu ba mutende. Kansi baleke bekale pamo ni fwefue mu keno kyalo ni kusuluzia. Keno kyalo ni kikata kuti baikala. Baana betu kuti baupua na baana babo, ni baana babo kuti baupua na baana betu.
22 Inzi tupalile sie kukita kintu kimo pakuti tuye twapwene nabo ni kuya twali mutundu umo. Balalume bonse mu lono lupua lwetu bapalile kuya bateetua yando.
23 Fwe bonse kine twaitabizyania, twaakeekala nabo, ni bunonsi bwabo bonse pamo ni bisepe byabo byonse bya nama ni inge nama, byonse byaakaba byetu.”
24 Bekazi bonse ba mu ozo muzi baitabiziizie bintu byaalandile Hamori ni mwana wakue Sekemu. Balalume bonse baateetelue yando.
25 Lupaapitile nsiku itatu bantu bakilimukukisua na bilonda bya yando i baateetelue, Simeoni ni Lawi bandumeze ba munda mumo ni Dina baatweme bipanga, baya kusakukila muzi mu kafiso ni kwipaya balalume bonse.
26 Hamori ni mwana wakue Sekemu ni bo kumo baipailue. Baamufumiizie Dina ku nghanda yakua Sekemu ni kuya nakue.
27 Pa kyamba kya kwipaiwa kwa babo bantu, baana bena Yakobo baatweme bintu bya babo baipailue, pantu Sekemu waamupatikiizie Dina kukumana nakue.
28 Bintu bibaabatwamiine ni bebi: Mikooko, ni mbuzi, ni punda, pamo ni binge byaali byali mu muzi ni mu makaba.
29 Kubalua nghanda baatwememo bunonsi bwabo bonse, ni baana babo bonse, ni bakazi babo bonse pamo ni bintu byonse bibaali nabio.
30 Yakobo waamwanine Simeoni ni Lawi, “Mwe baana bane, mone vimwakita! Evi mwanghingizia mu bwavia bukata ku bantu ba mu Kanaani ni ku bantu ba mu Perisi bekeele batuzyungulukiile. Evi bantu bonse bakaba kunsuula. Nene nsili na bantu bengi. Kine bakabe kukolonghana ni kwiza kunsakukila, bakaba kungipaya pamo ni bantu bane bonse.”
31 Inzi baana baalandile evi, “Fwefue tetuvinda kulekelela nkazyetu kwalulua nga mukambue.”