12
1 Efraimu aliwailiisia mwela.
Aliwakumba mwela wa ku kabanga koba konse
ni kuvuzia bufi ni bubi.
Aliwaunvwana ni Asuria
ni kutuma mafuta a mizeituni ku Misri.
2 Yawe ali ni mulandu ni Yuda.
Wakaba kumukanda Yakobo kukonkana ni mibeele yakue
ni kumusazia kukonkana ni bikitua byakue.
3 Yakobo lu-aali munda, waamusakatiile mukuluube lya ku kasinghino.
Wene lu-aakulile, waalwile na Leza.
4 Waalwile na malaika ni kumwanzia,
waalilile ni kulomba buwame.
Waamusangile ku Beteli
ni kwambaula ni ye koko kwenka.
5 Yawe Leza wa Maka onse,
Yawe i liina lyakue!
6 Inzi upalile kubwela kuli Leza obe.
Sunga ntono ni bulunghami,
ni kupempa Leza obe lyonse.
7 Musulu aliwabombia tulingo twa bupompo,
aliwatona kukalana.
8 Efraimu aliwaitantamuna,
“Nene ndi munonsi mukata. Nakyaluka munonsi.
Mu bunonsi bwane bonse,
tebakansangamo na lubiibi ao na kibalo.”
9 “Nene ndi Yawe Leza wenu
waamifumiizie ku Misri.
Naakamilengia kwikala paakale mu maema,
nga mu nsiku ya nsikunkulu yenu yaabiikilue.
10 Naalandile na bakabika,
naabapeele bimonua bingi
ni kulandila mu bipalo kupitila muli bene.”
11 Kubako Gileadi te mubi?
Bantu bakue ni ba mpuni!
Eba, balibaeleela nghombe ndume mu Gilgali?
Bitale byabo byaakaba nga milui ya mabue
mu bukaba buliminue.
12 Yakobo waabutukiile mu kyalo kya Aramu,
Izraeli waabombele pakuti apate mukazi,
ni pakuti alipe pa mulandu wa mukazi, waasungile mikooko.
13 Yawe waabombiizie kabika pakuti amufumie Izraeli ku Misri,
kupitila muli kabika waamusungile.
14 Inzi Efraimu waasonseziizie kipuki kyakua Yawe,
Mulopue wakue waakamupenda kuba wa kilubo pa mulandu wa bungipaani bwakue
ni kumukanda pa mulandu wa mufuupula wakue.