13
Bupinguzi bwa mpeleezio pa Baizraeli
1 Efraimu lu-aalandile, bantu baatutumine.
Waalumbilue mu Izraeli.
Inzi waisangile kuba mubi pa mulandu wa kupupa leza Baali, ni ye waafwile.
2 Evi balimukukila kubala.
Balimukwikitila mikisi na mutofue wabo
mu musango ubamaniinemo bo bene,
byonse byaakitilue na bantu bamanine mwilo.
Kilandilue palua baba bantu nangue,
“Balibafumia bantu kuba ngelelo!
Balibakumbatila mukisi wa nghombe musoka!”
3 Ni pakako, baakaba nga fuube wa lukeelekeele,
nga lume lusililwakokola kuzeeza,
nga makapa aliaululua na mwela pa kipuulilo,
nga kyunsi kilikyafumina pa nzota.
4 “Inzi nene ndi Yawe Leza wenu
kutula pa musita umwaafumine ku Misri,
temupalile kukindika unge Leza inga sie nene,
tekuli Mupususi unge inga sie nene.
5 Naakulabukiile mu kaseeba,
mu kyalo kya kyaka.
6 Lunaabaliisiizie, baikutile.
Lubaikutile, ba-alukile ni kiitoni.
I kyaalengele kuti bandabe.
7 Ni pakako, naakaba nali nga nkalamu kuli bene,
nga kanfuma, naakababenza mu nzila.
8 Nga kimbui kiibiilue baana bakue,
naakabasakukila ni kuzanghununa mitima yabo.
Nga nkalamu mukota, naakabazakila.
Nama ya mu kisonso yaakabazanghununa tuputu tuputu.
9 “Wainoonua we Izraeli
pantu wanfunghamina. Wafunghamina mukwasi obe.
10 Ale likolo obe wakuti akupususie alipi?
Bakateeka ba mu mizi yobe yonse bali pi
balia bawaanombele nangue,
‘N'mpeele likolo ni babiloolo?’
11 Mu kipuki kyane naakupeele likolo,
ni mu kikonko kyane naamufumiiziepo.
12 Bubi bwakua Efraimu busungilue,
bibalo byakue bilembelue.
13 Wene misa iliyamwizila nga mwanakazi alimukuvyala mwana,
inzi ozo mwana tali na mulangue.
Musita kine wakumana,
aliwa-anda kufuma munda mwa nghina.”
14 “Naakalubula baba bantu ku maka a kilibu,
naakabapususia ku lufu.
We lufu, lyemo lyobe lili pi?
We kumbo, lwinoono lobe luli pi?
“Nsikaba na nkumbu,
15 anzia kine Efraimu akakitikilua na biweme pa ba kwakue,
mwela wa ku kabanga kufuma kuli Yawe waakeeza
wapuupile kufuma ku kaseeba.
Kasulo kakue tekakasula,
ni kiina kyakue kya menda kyaakakama.
Muluwe wakue waakeenoonua
pamo ni bintu byonse bilimo bya mutengo.
16 Bantu ba mu Samaria bapalile kwisanga bali ni mulandu,
pantu bakimusangukila Leza wabo.
Baakaloviiwa na kipanga.
Baana babo baniini baakafuntwilua pansi na maka,
banakazi bemisi ba mu Samaria baakatumbulua.”