9
Bantu balapila bibalo byabo
1 Mu ozo mwezi pa nsiku 24 Baizraeli baakolongheene ni kuizilika bilio bavwele masaaka, ni kuya baipuupile bulongo ku mitue.
2 Baizraeli baikekele ku baeni bonse, baimeene ni kutendeka kulapila bibalo byabo ni bilubo bya basibo.
3 Baimeene pa kifuka kyabo ni kubelengelua kitabu kya mizilo yakua Yawe Leza wabo mwila wa nsita itatu, ni inge nsita itatu baali balimukulapila bibalo ni kumupupa Yawe Leza wabo.
4 Yeshua, ni Kadimieli, ni Bani, ni Sebania, ni Buni, ni Serebia, ni Bani unge pamo ni Kenani, baimeene mu nkendo ya Balawi balimukupepa Yawe Leza wabo basamwine.
5 Pa kyamba, baba Balawi, Yeshua, ni Kadimieli, ni Bani, ni Hesbunia, ni Serebia, ni Hodia, ni Sebania pamo ni Petahia baalandile nangue,
“Imane mumutasie Yawe Leza wenu wa muyayaya ni muyayaya.”
“Liina lyakue lilumbue, liina likindeeme kukila mapaalo onse ni bulumba bonse.”
Mapepo a bulapilo
6 Ezra waalandile,
“We Yawe, wewe bunke bobe uli Yawe,
Waalengele myulu, ni byonse bilimo,
Kyalo pamo ni byonse bilimo,
Myenzi pamo ni byonse bilimo.
Kubalua kintu ukipeele bukose.
Ni libumba lya mwiulu lililyakupupa.
7 Wewe uli Yawe, Leza waamusaakwile Abramu,
Waamufumiizie mu Uri ya Bakaldayo,
Waamwinikile liina lya Abrahamu.
8 Waamwene vi-aali wa kisinka kuli wewe,
Waakitile nakue kipingo
Waalaile kupeela nvyalo yakue kyalo kya Bakanaani,
Kya Bahiti, ni kya Ba-amori,
Kya Baperizi, ni kya Bayebusi, ni kya Bagirgasi,
Wewe waafikiliizie bulayo bobe pantu wewe uli mulunghami.”
9 “Wewe waamwene bukyuzi bwa babikolue betu lubaali mu Misri,
Kabili waunvwile malilo abo lubaali kumbali Lyezi lya Kasi.
10 Wewe waakitile tupapo pali Farao,
Pa babiloolo bakue bonse, ni pa bantu bonse ba mu kyalo kyakue,
Wewe waali wamanine babikolue betu vibaakitiilue bibiipile na Bamisri.
Wewe waikitiile liina lisyaliliile ni lenu kumo.
11 Waakasaniizie lyezi pa menso a bantu bobe,
Ni bo baapitile mu lyezi pansi paumine.
Balia baali babakonkele waabatibiziizie,
Nga libue mu menda engi, waababunziizie.
12 Wewe waalombwele bantu bobe na lipumpu lya lilezi musita wa koba,
Na lipumpu lya mulilo musita wa busiku, evi baye basanikiilue mu nzila mu baali baya.
13 Wewe waakookeele pa Lupili lwa Sinai.
Wewe waalandile nabo wali mu muulu,
Waabapeele bupinguzi bwa nsambu ni mafunde a kiine ni alungheeme, pamo ni mizilo, ni milao iweme.
14 Waabamaniizie Sabata yobe izuuke,
Ni kubapeela milao ni mafunde pamo ni mizilo kupitila muli Musa mubombi obe.”
15 “Lubaunvwile nzala waabapeele mukate kufuma mwiulu.
Lubaunvwile kyaka, waabapeele menda kufuma mu mwalala.
Wewe waabaanine bakapyane kyalo.
Kyalo kiwaalaile kubapeela.”
16 Inzi babikolue betu baafiiniizie mitima,
Kabili tebaatonene kutwilizia milao yobe.
17 Baakeene kunakila, kabili tebaalangulukile tupapo tuwaakitile pakati kabo,
Inzi baafiniizie mitima yabo,
Ni mu kwisangula kwabo, baibiikile mukulu wa kubalombola,
Evi babwelele mu buzia bwabo.
Inzi wewe uli Leza aliwaeleela,
Wewe uli ni buwame, ni nkumbu ingi, kabili tewizi kulenga kufiitua,
Wewe wizuzi ntono. Ni pakako, tewaabalekeeleele.
18 Ee, musita ubaikitiile musoka wa nghombe wa kusungulula,
Baalandile nangue ozu i leza wenu waamifumiizie ku Misri.
Lubaakitile bintu bikata bya mufuupula,
19 “Wewe kukonkana ni bwingi bwa nkumbu yobe, tewaabalekeeleele mu kaseeba.
Lipumpu lya lilezi telyaalekeele kubalombola musita wa koba,
Lipumpu lya mulilo telyaalekeele kubalombola musita wa busiku, evi liye lyabasanikiile ni kubalangilila nzila ya kuyamo.
20 Wewe waabapeele Mweo obe uweme wakubasambilizia,
Kabili waabapeele maana a kulia ni menda a kutalalika kyaka kyabo.
21 Ee, pa myaka 40, waali wabateekamaniizie mu kaseeba,
Kabili tebaabulilue kantu.
Ngubo yabo teyaazabukile,
Ni makasa abo teavimbile.
22 “Wewe waabapeele bwanzio pa bukolo ni ntundu ya bantu,
Kabili waabapeele byalo byaali byabazyungulukiile.
Ba-anziizie kyalo kya Hesihoni kyaali kyateekelue na Sioni,
Kabili ba-anziizie kyalo kya Basani kyaali kyateekelue na likolo Ogi.
23 Wewe waavuziizie baana babo nga ntanda ya mwiulu,
Ni kubaleeta mu kyalo
Kiwaalaile basibo kuti bengile ni kwikalamo.
24 Baana babo baingiile ni kupyana kyalo, ni we wa-anziizie Bakanaani.
Wewe waabiikile Bakanaani mu maboko a babo baana.
Bantu bobe baakitile mubatoneene,
Ku makolo ni ku bantu ba mu kekio kyalo.
25 Baapokele mizi ili ni byubo ni kyalo kili ni muvundo.
Baapokele mizi ili ni bunonsi, nghanda izuzimo bintu bingi biweme,
Biina bya menda byaali byaimbilue,
Ni makaba a mizabibu, ni makaba a mizeituni, pamo ni bimuti bili ni mazabo engi.
Ni pakako, baaliile ni kwikuta,
Baasambukile ni kwisansamusia mu buwame bobe.”
26 “Anzia kyaali evio tebaakunakiile,
Bene baakusangukiile ni kufunghamina mizilo yobe,
Baipaile bakabika bobe,
Babo baababikwiliile kuti babwelele kuli wewe.
Baakitile bibalo bikata.
27 Ni pakako, waabapeene mu maboko a balwani babo baabakyuziizie,
Inzi lubaali baema, baakuliliile.
Waabonvwile momo mwiulu.
Mu bwingi bwa nkumbu yobe waabapeele banombozi
Baabafumiizie mu maboko a balwani babo.”
28 “Inzi lubaali basyaikeele bwino, kabili baakuluviizie,
Ni we waabalekeleele mu maboko a balwani babo, ni bo baabateekele.
Musita ubaakubweleele ni kukulilila,
Waabonvwile momo mwiulu
Ni kubapususia nghendo ingi pa mulandu wa nkumbu yobe.”
29 “Kabili waabasokele kuti babwelele ku mizilo yobe.
Anzia kyaali evio, kabili baakitile kiitoni, ni milao yobe tebaitwiliziizie,
Inzi baasangukiile milao yobe, i waalandile nangue
Muntu waakanakila ezio milao waakaba ni bukose.
Ba-alukile ni kiitoni, ni kufinia mitima yabo, kabili tebaatonene kunakila.
30 Anzia kyaali evio, waabasipikiziizie myaka ingi,
Ni kubasoka na Mweo obe kupitila mu bakabika,
Inzi tebaakunvwile,
Ni pakako waabalekeleele mu maboko a bekala kyalo.
31 Anzia kyaali evio, mu bwingi bwa nkumbu yobe,
Tewaabaloviizie, ao kubalekelela,
Pantu wewe uli Leza wa buwame ni wa nkumbu.”
32 “Kansi evi we Leza wetu, Leza Mukulu ni wa buvinde,
Leza wakutiinia,
Leza aliwafikilizia kipingo kya ntono,
Izukila lyemo lyaali pali fwefue
Pamo ni makolo etu, ni bakulu betu, ni babitambua betu, pamo ni bakabika betu,
Ni basiitue, pamo ni bantu bobe bonse,
Lyemo litwaemene kutula pa musita wa makolo a ku Asuria mpaka lelo.
33 Inzi wewe uli mulunghami mu milandu yonse yaatukitikiile,
Pantu waakitile mu kisinka, anzia kine fwefue twaaluviizie.
34 Makolo etu, ni banombozi betu, ni babitambua betu, ni babikolue betu
Tebaanakiile mizilo yobe,
Tebaatwiliziizie mizilo pamo ni milao yobe i waapingheene nabo.
35 Anzia baali bali mu bukolo bwabo,
Ni mu buwame bobe bukata buwaabapeele, mu kyalo kikata kilimo nfukeezi kiwabapeele,
Tebaakubombeele, kabili tebaapilibukile kuti balekele bikitua byabo bibiipile.
36 Mona fwefue lelo tuli bazia. Tuli bazia mu kyalo kiwaapeele babikolue betu,
Momo mubaaliile mazabo pamo ni binge bintu biweme.
37 Pa mulandu wa bibalo byetu,
Bunonsi bwa keno kyalo bulibwaya ku bamakolo balibatuteeka.
Balibatuteeka mubatoneene, ni nama yetu balibaikitila mubatoneene,
Tuli mu lyemo likata.”
Bantu baitabizyania
38 Ni pa mulandu wa bebi bintu byonse, twakita kipingo kya kisinka ni kukilemba. Evi bakulu betu, ni Balawi, pamo ni babitambua betu, basyusyuta ni kusinsikapo kamanino kabo.