10
1 Bantu baasyusyutilepo ni kusinsikapo kamanino ni baba:
Ndabukizi Nehemia mwina Hakalia,
ni Zedekia.
Babitambua ni bo ni baba:
2 Seraia, ni Azaria, ni Yeremia,
3 ni Pasuri, ni Amaria, ni Malkia,
4 ni Hatusi, ni Sebania, ni Maluku,
5 ni Harimu, ni Meremoti, ni Obadia,
6 ni Danieli, ni Ginetoni, ni Baruku,
7 ni Mesulamu, ni Abia, ni Miyaminu,
8 ni Maazia, ni Bilgai, ni Semaia.
Balawi ni bo ni baba:
9 Yeshua mwina Azania,
ni Binui wa mu baana bena Henadadi, ni Kadimieli,
10 ni balupua babo ni baba:
Sebania, ni Hodia,
ni Kelita, ni Pelaia, ni Hanani,
11 ni Mika, ni Rehobu, ni Hasabia,
12 ni Zakuri, ni Serebia, ni Sebania,
13 ni Hodia, ni Bani, ni Beninu.
Banombozi ba bantu ni bo ni baba:
14 Parosi, ni Pahati-Moabu,
ni Elamu, ni Zatu, ni Bani,
15 ni Buni, ni Azgadi, ni Bebai,
16 ni Adonia, ni Bigwai, ni Adini,
17 ni Ateri, ni Hezekia, ni Azuri,
18 ni Hodia, ni Hasumu, ni Bezai,
19 ni Harifu, ni Anatoti, ni Nobai,
20 ni Magipiasi, ni Mesulamu, ni Hesiri,
21 ni Mesezabeli, ni Sadoki, ni Yadua,
22 ni Pelatia, ni Hanani, ni Anaia,
23 ni Hosea, ni Hanania, ni Hasubu,
24 ni Halihesi, ni Pileha, ni Sobeki,
25 ni Rehumu, ni Hasabuna, ni Maseia,
26 ni Ahia, ni Hanani, ni Anani,
27 ni Maluku, ni Harimu, ni Bana.
Kwitabizyania
28 Fwefue bonse, Baizraeli, babitambua ni Balawi, ni bakalinda ba pa mulyango, ni bakemba, ni babombi ba mu Nghanda yakua Leza, pamo ni bonse baali baikekele ku Bazima ba mu byalo pa mulandu wa mafunde akua Leza pamo ni bakazi babo, ni baana babo balalume ni banakazi, ni kubalua muntu waali ni buvinde bwa kunvua,
29 Baba bonse ba-ampeene pamo ni Baizraeli nabo, ni masiiko abo, baikakile pamo mu kitiipu ni kilapo kya kukonka milao ibaapeelue na Leza kupitila muli Musa mubombi wakua Leza, pamo ni kunakila bwino mafunde ni milao ni myano yonse yakua Yawe Mulopue wetu.
30 Kabili twaalapile nangue tekuti tukoofie baana betu ku Bazima bali mu kyalo, ni fwe tekuti tukalekelele baana betu kuupilako.
31 Bazima ba mu kyalo kine baleeta makwebo, ao nghano kuti basisie busiku bwa Sabata, fwefue tetukasitako pa bobo busiku ao sie bunge busiku buzuuke, kubalua mwaka wa kilooba tetukalima makaba, ni mizia yonse yaakeeleelua.
32 Kabili twaikitiile milao ya kupeela kimo kya bitatu bya shekeli mu bubombi bwa mu Nghanda yakua Leza wetu kubalua mwaka.
33 Pa mikate ya kilangililo, ni pa ngelelo ya bunga ya lyonse, ni pa ngelelo ya kuziziiwa ya lyonse ya mu nsiku ya Sabata, ni mu nsikunkulu ya kubaluka kwa mwezi, ni nsikunkulu inge ilekenkeene, ni ya pa bintu bizuuke, ni ya pa ngelelo ya bibalo pa mulandu wakupwanika Baizraeli, ni pa miilo yonse ya mu Nghanda yakua Leza wetu.
34 Fwe babitambua, ni Balawi, pamo ni bantu bonse twakiteya bubale, pa mulandu wa nkuni ya kuleetua mu Nghanda yakua Leza wetu, nga mukibeeleele mu nghanda ya basiitue, kuti iye yaleetua pa musita upalile, kubalua mwaka, evi iziziiwe pa bintamba byakua Yawe Leza wetu nga mukilembeelue mu mizilo.
35 Kabili twaikitiile milao ya kupeela ntomono ya buzombozi bwa mazabo mu Nghanda yakua Yawe ni bwa mazabo onse a misango yonse ya bimuti kubalua mwaka.
36 Kukonkana ni vikilembelue mu mizilo, kubalua libeli mwalalume wa muntu ni wa nama, apalile kutwalua mu Nghanda yakua Leza wetu ku babitambua baakaba babomba mu Nghanda yakua Leza wetu, ni kubalua libeli lyalalume lya kaana kena mbuzi ni kena mukooko.
37 Kabili twaakaba twatwala bunga bwetu bwa buzombozi bwa mambo, ngelelo yetu ya mbezu, ni mazabo a misango yonse ya ku bimuti, ni ya bya kumina, ni ya mafuta ku babitambua mu miputule ya mu Nghanda yakua Leza wetu.
Kabili twaakaba twatwala kamo ka pa lyanondo ka mu buzombozi bwetu ku Balawi, pantu Balawi i baali baya kukolonghania kamo ka pa lyanondo mu mizi yetu yonse.
38 Kitambua wa mu luvyalo lwakua Haruni waakaba wali pamo ni Balawi musita ubaakaba baya kukolonghania kamo ka pa lyanondo. Balawi lubalibakolonghania kamo ka pa lyanondo, bapalile bafumia kamo ka pa lyanondo ka pa bebio ni kutwala mu Nghanda yakua Leza wetu mu miputule mu nghanda ya bukonto.
39 Baizraeli ni Balawi bapalile kutwala ngelelo ya nghano, ni ya bya kumina, ni ya mafuta a mizeituni mu miputule mulimwasungua bibombelo bya mu kifuka kizuuke, momo mulimwaikala babitambua, ni bakalinda ba pa mulyango, pamo ni bakemba.
Ni fwefue tetukasia Nghanda yakua Leza wetu.