12
1 Olia atonene masambilizio, atonene bukengezi,
inzi olia asuulile kusasililua, ni kipuba.
2 Muntu aweme aliwasanga buwame bwakua Yawe,
inzi wa nsokezi ibi aliwapingulua na Yawe.
3 Muntu tavinda kwileetela mutende na kukita bubi,
inzi mulunghami takaponiwa na kantu.
4 Mukazi aweme, i ngala ya mulume wakue,
inzi olia aliwamoniania busoni, ali nga keesi kalikabunguzia bikuza bya mulume.
5 Malanga a balunghami alungi,
inzi nsokezi ya babi, ni bupompo.
6 Twebo twa babi, tuli na mapange a kulovia,
inzi kanua ka balunghami kalikabapususia.
7 Babi balibainoonua ni kuloba,
inzi nghanda ya balunghami iliyatwalilila.
8 Muntu aliwatasiiwa kukonkana ni mulangue wakue,
ni wa malanga abi aliwafuupulua.
9 Muntu aliwafuupulua koku waali ni mubombi,
aweme kukila muntu emwene kuba wali wa mponvu inzi tekuba wali na bilio.
10 Mulunghami aliwasakamana bukose bwa nama yakue,
inzi nkumbu ya babi, ni kwemia.
11 Mulimi wa mute, ali na bilio bingi,
inzi olia aliwakonka milandu ya mpuni, tali na maano.
12 Mubi aliwatokamua bunonsi bwa mubi,
inzi mulunghami aliwaimana sinta.
13 Kilubo kya mu kanua, muteo wa muntu mubi,
inzi mulunghami aliwafuma mu maavia.
14 Muntu aliwaikusiiwa na buwame bwa mazabo a mu kanua kakue,
aliwabweziiziwa bikitua bya minue yakue.
15 Nzila ya kipuba iweme ku menso akue mwine,
inzi mulunghami aliwatwilizia nsokezi.
16 Bupuba bwa muntu asili na maano tebwakokola kumanika,
inzi muntu akengeele aliwapuulula matuka.
17 Olia aliwalanda kisinka, aliwasininkizia bya kiine,
inzi musininkizi wa bufi, aliwalanda bufi.
18 Twebo tubi tulitwakisia nga kipanga,
inzi bulanzi bwa mulangue bulibwaleeta bukose.
19 Bukisinka bulibwatwalilila lyonse,
inzi bufi ni bwa pa musita uniini sie.
20 Bupompo buli mu mutima wa balia balibalangakana bubi,
inzi balia bali ni mapange a mutende, bali ni nsansa.
21 Tekuli busanzo bulibwaponena balunghami,
inzi babi balibavuziiziwa maavia.
22 Kanua ka bufi, ni kilubo kuli Yawe,
inzi balia balibakita bulunghami, i nsansa yakue.
23 Muntu akengeele, aliwafiika maano akue,
inzi babipuba balibamania bupuba bwabo.
24 Kuboko kukinkimeene, i kulikwateeka,
inzi bunanghani bulibwaleeta buzia.
25 Kutooboka kwa mutima kulikwapwisia nsansa,
inzi keebo kaweme kalikasansamusia.
26 Mulunghami aliwalanga nzila ku mwinakue,
inzi nzila ya babi iliyabazeezia.
27 Mukumbi munanghani tezi kusanga mabingo akue,
inzi wa mute tezi kubwela tonte.
28 Mu nzila ya bulunghami i muli bukose,
ni mu tusansaila twakue temuli lufu.