13
1 Mwana wa mulangue aliwatwilizia mafunde akua se,
inzi wa kapuni, tezi kutwilizia nsokezi.
2 Muntu aliwaikusiiwa na buwame bwa mazabo a mu kanua kakue,
inzi mutima wa muntu mubi uliwalia bubi.
3 Olia aliwalabukila kanua kakue, aliwasunga bukose bwakue,
inzi olia aliwaizula milomo yakue ali ni bwavia.
4 Mutima wa munanghani uliwatokamua pasili kusanga kantu,
inzi mutima wa olia akinkimeene, uliwaikuta.
5 Mulunghami tezi kutona kulanda bufi,
inzi muntu mubi aliwakila kuluvia, ni ye aliwamoniiwa busoni.
6 Bulunghami bulibwasunga mulunghami mu nzila yakue,
inzi bubi bulibwalovia wa bibalo.
7 Kuli ni olia aliwailanga kuba munonsi, inzi tekuba wali na kantu.
Kuli ni olia aliwailanga kuba mupabi, inzi wali ni bunonsi bwingi.
8 Bunonsi bwa muntu i bulibwamulubula,
inzi mupabi tali na ka kumupususia.
9 Kisue kya mulunghami kilikyabenghemesia,
inzi musaniko wa mubi uliwazima.
10 Kiitoni, kilikyaleeta mazibo,
inzi mulangue, uli na balia balibaunvua nsokezi.
11 Bunonsi bwa lubilo lubilo bulibwakeepa,
inzi olia aliwanonka bukebuke, aliwavuzia.
12 Maswapi aliakokola, aliakisia mutima,
inzi kelia kintu kipembeelue kine kyafika, ni kimuti kya bukose.
13 Olia aliwafuupula mafunde, aliwaileetela lwinoono,
inzi olia aliwanakila milao, aliwalambulua.
14 Masambilizio a muntu wa mulangue, i kasulo ka bukose,
aliamulengia kuleuka miteo ya lufu.
15 Maano aweme alialengia kutoneka,
inzi nzila ya bapompo ya maavia.
16 Kubalua muntu wa maano aliwabomba wakengeele,
inzi kipuba aliwasalanghania bupuba bwakue.
17 Mukenzi mubi aliwaponiizia bantu mu maavia,
inzi mukenzi wa kisinka, aliwaleeta bukose.
18 Bupabi pamo ni busoni, bili na olia aliwakaana masambilizio,
inzi olia aliwakonka nsokezi, aliwakindikua.
19 Kine kelia kintu kitonekele kyakitika, muntu aliwawaminua,
inzi babipuba kwikeka ku bubi, kilubo.
20 Enda na ba mulangue, ni we uli kuba ni mulangue,
inzi kibuza wa babipuba aliwaema.
21 Bwavia bulibwakonka ba bibalo,
inzi mulunghami aliwalambulua buwame.
22 Muntu aweme aliwasia bupyani ku benzikulu,
ni bunonsi bwa muntu wa bibalo, bukonto bwa mulunghami.
23 Bukaba bwa mupabi kuti bwafumia buzombozi bwingi,
inzi bilibyainoonua pa mulandu wa kubiibikiziiwa.
24 Muntu asiizi kubombia nfimbo, akendele mwana wakue,
inzi olia amutonene, aliwamukanda pa musita upalile.
25 Mulunghami ali ni bilio byamukumeene,
inzi kavumo ka mubi kalikaemooka na nzala.