26
1 Nga evelia vili kibue musita wa likungulu, ni nvula musita wa buzombozi,
ni mukinzi i viusipalile ku kipuba.
2 Nga evelia vili munsole mu kuwayawaya kwakue, nga kamimbili mu kupupuka kwakue,
i vili ni ntiipu ya mpuni isiizi kukwata muntu.
3 Musepe wa kuuminako farasi, kikobelo kya kulombwelako punda,
ni nfimbo ya kuuminako kipuba mu musana.
4 Tekumwasuka kipuba mubeeleele bupuba bwakue,
ukeeza kupalana nakue.
5 Mwasuke kipuba mubeeleele bupuba bwakue,
akeeza kwaluka wa mulangue ku menso akue mwine.
6 Olia aliwalaizia kipuba kutwala mpunda,
aliwaiputula makasa akue, ni kumina bwimba.
7 Nga vilebeele maulu a mulema,
i vili ni mapinda mu kanua ka kipuba.
8 Nga vili libue lya mutengo mu topiito,
i vili ni muntu aliwakindika kipuba.
9 Nga vili musambo wa myunga mu kuboko kwakua kyakolua,
I vili ni mapinda mu kanua ka kipuba.
10 Nga vili muntu aliwalasa mivui ni kukisia bonse,
i vili ni muntu aliwapeela miilo kipuba ao mupitanzila.
11 Nga vili kabua kalikabwelela ku malusi akue,
i vili ni kipuba aliwabweziapo kukita bya bupuba.
12 Ewe, umwene muntu ali ni mulangue ku menso akue mwine?
Kyawama kuswapila kipuba kukila wene.
13 Munanghani aliwalanda nangue, “Mu nzila muli ni nkalamu,
nkalamu asasile ali mu musebo ukata.”
14 Nga vilivyazyungulusiiwa mulyango mu bulato bwakue,
i vilivyaipilibula munanghani pa bulita bwakue.
15 Munanghani aliwabiika kuboko kwakue mu nsaani,
inzi aliwaunvua bunanghani bwa kutwala pa kanua kakue.
16 Munanghani emwene kuba ni mulangue pa menso akue
kukila bantu kilooba baliba-asuka ni maano.
17 Olia aliwaingila mu mazibo asili akue,
ali nga muntu aliwakwata ku matui a kabua kalimukupita.
18 Nga wa luuba vi-aliwapooza bikooko bya mulilo,
ni mivui, bintu bilibyaipaana,
19 i vili ni muntu aliwamubeepa mwinakue,
ni kumwana nangue, “Ne nakiba nakusekia sie!”
20 Mulilo uliwazima pantu tepali nkuni,
ni pasili musongezi, tepali mazibo.
21 Nga vitulitwazukunsia mazekezeke ao kukwikizia nkuni pa mulilo,
i vili ni muntu mubi aliwasomenkezia mazibo.
22 Twebo twa musongezi tuli nga bisoso biweme bya bilio,
kabili tulitwakookela munda.
23 Nga vili twebo twa kwiwaminizia ni mutima ubi,
i vili ni keeso kakupilueko mutofue.
24 Muntu asuulile bange aliwafyamina mu bulanzi bwakue,
inzi aliwateeka bukonto bwa bupoti mu mutima wakue.
25 Lualiwalanda twebo twaweme, tekumuketekela,
pantu kuli bilubo kilooba bili mu mutima wakue.
26 Anzia kukenda kwakue kuya kwafiikilue na bupoti,
bubi bwakue bulibwamoneka pa menso a bantu.
27 Olia aliwaimba kiina, waakaponenamo ye mwine.
Kine wabulunkusia libue, lilikumubwelelela.
28 Lulimi lwa bufi, lusuulile balia bakisiiziwe na lo,
ni kanua ka kwiwaminizia, kalikaleeta lwinoono.