27
1 Tekwitasia pa bya lukeele,
pantu teumanine bilikukitika mu busiku bumo.
2 Lekela muntu unge akutasie, tekuba kanua kobe we mwine,
mweni, tekuba milomo yobe we mwine.
3 Libue lifinine, ni musenga ulemene,
inzi busokozi bwa kipuba bufinine kukila bebi bibili.
4 Kikonko kibiipile, ni kipuki kili nga kibunda.
Ale nani aliwavinda kwimana ku ntanzi ya bunkua?
5 Kyawama kusasililua pa menso a bantu,
kukila ntono ifiikilue.
6 Kibuza kine wakukisia, muketekele,
kukila miifyompo ya mulwani.
7 Muntu ekusi, asuulile kapelo,
inzi olia ali ni nzala, bilulile bilibyasonsa.
8 Nga vili koni kalikawayawaya kule ni kinsua kyakue,
i vili ni muntu aliwawayawaya kule ni nghanda yakue.
9 Nga vili mafuta a bunu buweme ni bubaani, bilibyawamina mutima,
i vili ni makola a bukibuza bwa muntu bulibwafuma mu mapange a mu mutima wakue.
10 Kibuza obe ni kibuza wakua so, tekubalekela,
kabili tekuti ukabe kuya mu nghanda mwa lupua lobe busiku bwa lyemo lyobe.
Kyawamako mwinobe ali pepi kukila lupua luli kule.
11 We mwana wane, ba ni mulangue usansamusie mutima wane,
evi n'mone mwakumwasukila olia aliwansasilila.
12 Mukengezi aliwamona bubi ni kufyama,
inzi babipuba balibaya sie ku ntanzi mpaka baikisia.
13 Muntu kine walaya kulipila mizia ya muntu asimanikile, apokueko ngubo yakue nga kikwatizi,
apokue kikwatizi pa mulandu wa ozo mweni.
14 Olia aliwapaala kibuza wakue wasamwine lukeelekeele pakili,
kyaakamoneka nga kitiipu.
15 Mukazi wa mazibo,
ali nga matooni a nvula aliatoonatoona busiku bwa nvula.
16 Aliwakilikila ozo mukazi, aliwakilikila mwela,
ao kukwata mafuta na kuboko kwakue kwa kulio.
17 Nga kyela vikilikyanoona kyela nakue,
ni muntu i vi-aliwasambiliziiwa na mwinakue.
18 Olia aliwasunga kimuti kya miku aliwaliako mazabo,
ni olia aliwasunga selenzi aliwakindikua.
19 Nga lukebu vilulilwapalana na lukebu mu menda,
ni muntu i vi-aimanine.
20 Kumbo ni lwinoono tebyaikuta ata kaniini,
ni menso a muntu te-ezi kwikuta ata kaniini.
21 Mupika, i wakusungulwilamo mutofue, ni kikuka kya mulilo, i kya kwapikamo oro,
inzi muntu aliwaeziiwa pa mulandu wa bulumba bwakue.
22 Anzia ubuula mwinsi ni kumutua kipuba nga nghano,
bupuba bwakue tebupua.
23 Kita maka umane mibeele ya bisepe byobe,
ni kusunga bwino nghombe yobe.
24 Pantu bukata tebwayayaya,
ni ngala ya bukolo teyatwalilila mu nvyalo yonse.
25 Musita uliwasebua lubambua, palipatutuka lunge,
ni lubamba kufuma mu mpili lulilwakolonghaniiwa.
26 Mikooko iliyakuleetela masako a kukitamo ngubo yobe,
ni mbuzi wakaba kumusisia ni kusitamo makaba.
27 Kabili ulikuya wali ni mabeele engi a mbuzi a kukutuusia pamo ni lupua lobe
pamo ni kuliisia babombi bobe banakazi.