8
Bulumba bwa mulangue
1 Eba, mulangue tezi kulila?
Kumana ni ye tezi kuzanzula lizui lyakue?
2 Pa kifuka kya pa muulu sana pepi ni nzila,
pa masanzyonzila i paimeene.
3 Mumbali mulyango wa kwingililapo mu muzi,
pa nghingililo, aliwasamuna,
4 “Mwe bantu, ndinamikuuta,
ni lizui lyane ni pa mulandu wa bantu.
5 Mwe basimanine kantu, be ni maano,
ni mwe babipuba, be ni mutima wa kumana.
6 Twilizie pantu ndi ni twa kulanda twa mponvu,
ndikwizula milomo yane nande twebo tulungi.
7 Kanua kane kalikulanda kisinka,
pantu bubi kunvwika mu milomo yane ni kibalo.
8 Twebo tonse twa mu kanua kane ni twa nsambu,
tepali kalubile ao kabiipile pa tonse.
9 Tonse tuli sie bwino ku olia amanine,
tulungheeme ku balia bali ni maano.
10 Saakula masambilizio ane kukila mutofue,
ni kumana kukila oro isambikile.
11 Pantu mulangue i aweme kukila mabue a mutengo,
ni bintu byonse bitonekele tebivinda kulinghaniwa nakue.
12 “Nene, ne mulangue, ngikeele pamo ni bukengezi,
kwinika ni kumana ndi nabo.
13 Kutiina Yawe, kusuula bubi.
Nsuulile kiitoni, ni kwitasia, ni mibeele ibi,
pamo ni bulanzi bubi.
14 Nsokezi ni yane pamo ni bukengezi bwa kiine,
kumana ni maka ndi nabio.
15 Mubukwasi bwane, makolo aliateeka,
ni kupingula mu nsambu.
16 Mubukwasi bwane, bena makolo balibateeka,
ni babiloolo balibalombola bwino pa kyalo.
17 Ntonene balia bantonene,
ni bonse balibankeba na mute, baliban'mona.
18 Bunonsi ni mukinzi bili kuli nene,
bunonsi bulibwalunduluka pamo ni nsambu.
19 Mazabo ane akindeeme kukila oro,
ni kibwezia kyane kikilile mutofue usambikile.
20 Ndinaenda mu nzila ya bulunghami,
mu tusansaila twa nsambu,
21 Ndinanonsia balia bantonene,
ndinaizuzia kipao kyabo.
22 “Yawe waanengele wa mambo mu miilo yakue,
ntanzi ya miilo yakue ya kale.
23 Nene kundi kutula ku mambo,
kyalo lukyaali tekinabeko.
24 Biponga lubyaali tebinabeko, naali nasyavyelue,
tusulo twizwilemo menda lutwaali tetunabeko.
25 Mpili luyaali teinabeko,
ntanzi ya tupili naali nasyavyelue.
26 Lu-aali tanalenge kyalo, ao makaba,
ni ntendeko ya lufunko lwa mu kyalo.
27 Naali nalipo lu-aali wabiika myulu,
lu-aali wabiika mupaka wa lyulu ni menda.
28 Lu-aali wabiika malezi a mu muulu,
ni lu-aali walumia tusulo twa menda,
29 Lu-aali wabiika mupaka wa lyezi,
evi menda tekuti apule mafunde akue,
ni lu-aakitile biputa bya kyalo.
30 Naali pamo nakue nga kituemambo wa miilo.
Naali nsansa yakue kubalua busiku.
Naali ni nsansa kubalua busiku ku menso akue.
31 Naali nasansamukila kyalo kikeeluemo na bantu,
ni nsansa yane yaali yali pamo ni bena bantu.
32 “Ni pakako, ntwilizie mwe baana bane,
pantu lisyuko lili na balia balibakonka nzila yane.
33 Unvue masambilizio ane mube ni mulangue,
kabili tekukaane.
34 Lisyuko ku olia aliwantwilizia,
aliwapempa kubalua busiku ku milyango yane,
wapembeele mumbali milyango yane.
35 Pantu olia wansanga, wasanga bukose
ni kupokelela buwame kuli Yawe.
36 Inzi olia aliwa-andua kunsanga, aliwakisia mutima wakue mwine,
balia bonse bansuulile, batonene lufu.”