9
Mulangue ni bupuba
Mulangue waakuulile nghanda yakue,
waabaazile mapumpu akue kilooba.
Waipaile nama yakue ni kusanziamo divai yakue,
waapanzikile ni meza yakue.
Waatumine mubombi wakue mwanakazi,
pa kifuka kya pa muulu wa muzi kuti akupe.
“Kubalua kipuba eze engile,”
ni olia asimanine kantu, aliwamwana nangue,
“Iza ulie bilio byane,
ni kumina divai inakisanzia.
Mwe babipuba, lekele bupuba mube ni bukose.
Endele mu nzila ya kumana.”
 
Aliwasoka wa kapuni aliwaileetelela kuleebulua.
Ni aliwasasilila mubi aliwaileetelela matuka.
Tekusasilila ali ni mufuupula pantu nga alikukukenda,
sasilila wa mulangue, ni ye alikukutona.
Sambilizia wa mulangue, ni ye alikulunduluka kuba ni mulangue.
Sambilizia mulunghami, ni ye alikulunduluka kumana.
 
10  Kumutiina Yawe, i ntendeko ya mulangue,
ni kumumana Muzuuke, i kuba ni maano.
11 Pantu kupitila mu mulangue nsiku yobe ilikuvuziiwa,
ni myaka ya bwikazi bobe ilikulundua.
12 Kine uli ni mulangue, mulangue obe we mwine.
Kine uli wa kapuni, kwema ni kobe we mwine.
 
13 Mwanakazi kipuba aliwasaamia,
Tamanine kantu, kabili tali na busoni.
14 Aliwaikala mu mulyango wa nghanda yakue,
pa kifuka kya pa muulu wa muzi,
15 Walimukukuuta balia balibapita,
balibapita mu nzila yakue,
16 “Kubalua kipuba eze engile mono!”
Ni olia asimanine kantu aliwamwana nangue,
17 “Menda ebilue aweme,
ni mukate uliwaliiwa mu kafiso uliwawaminina.”
18 Inzi kipuba tamanine nangue momo i muli bafwile,
ni baeni ba ozo mwanakazi nangue bali pansi kumbo.
9:10 Yob 28.28; Mlb 111.10; Map 1.7