32
1 Ngaiyun, vo vanho, chule Keiman thu hinsei ing'e!
Ja in, vo leiset, Ka thusei ho chu!
2 Ka thuhilna thonggo bangin na chung'a juhen;
ka seidoh hi daitwi bangin cheng hen.
Ka thusei ho thonggo bangin hamnem chunga juhen,
3 Keiman Pakai min samphong ingting;
iPathen'u iti loupi hitam!
4 Pathen hi songpi ahin; athilbol ho achamkim tangeiye.
Athilbol abonchan adih le ahoi jeng ahi.
Ama chu kitah tah adihlou bollou Pathen ahin;
ama iti dih a lungtheng hitam!
5 Ahin amaho ama a din dihlou tah in achon'ui;
amaho louchal tah a achon teng'u,
amaho chu ama chate himong nauvem?
Amaho jouva dim le khang kipei mite ahiuve.
6 Hiche hi Pakai lethuh dan hinam,
nangho mingol le ima hetna neilou miho?
Ama chu nangho sempa na Pau hilou ham?
Ama chun nasem uva natundoh u hilou ham?
7 Nikho masa lai chu geldoh un;
achesa khang masa ho jong chu geldoh un.
Napa chu dingin, chule aman nahetsah ding ahi.
Na upateu dong'un, chule ama hon na seipeh diu ahi.
8 Hatchungnung pen in nampi goulo ahop peh chun,
Aman mihem chate alhen khen chun,
miho din gamgi asekhen peh e
ajat dungjuiyun avan'a konin.
9 Ajeh chu Israel mite hi Pakaiya ahiuvin;
Jacob hi ama goulu ahi.
10 Aman amaho chu nelgam'a amudoh in,
agoh keovin, manmo gam'a peng leiloijin.
Aman amaho aumkim'in avekol'e;
aman angahtup in amittah in avetup e.
11 Muvanlai in anou avil jinga,
anoute chunga akilat le bangin,
hijeh chun aman amaho puitouna dingin alhaving teni ajah in
chule hiche achun bittah in apolei.
12 Pakai ama tah in avekol'un;
amahon gamdang pathen ho ajui pouvin ahi.
13 Aman mun sang ho a akitolsah un
chule louva muchi ho chunga golvah abolsah uvin ahi.
Aman songpi a konna khoiju
le songhum lah a kon'a olive thaovin avah un ahi.
14 Aman amaho chu kel-hon lah a kon'a anoitwi
chule bong hon lah a kon'a bongnoi,
kelngoi ho thao toh kithoa avah u ahi.
Aman amaho deisah Bashan a kelchal ho, chule kelcha ho,
deisahpen suhlouchang toh apeuvin ahi.
Nang hon ju tuipen nadon'un,
Lengpitwi a konna kisem ahi.
15 Hinlah Israel chu gangtah in athaovin chule akhansen;
mipi chu agih lam'ah akhangun, a-uh uvin, chule abingletlut tauve!
Chuti chun amahon asempau Pathen adalha tauve;
amahon ahuhhing diuvin song vah asem'un ahi.
16 Amahon gamdang pathen kin abol jeh un athangset sah uvin,
chondan thet umtah tah abol jeh un Ama alunghang sah tauve.
17 Pathen hilou, thilha ho henga kilhaina asem uvin,
hiche pathen ho chu masang'a ahetphah lou u ahin,
pathen athah ho chu tunaicha a hunglhung ahiuvin,
hiche pathen ho chu apu apa teuvin aginlouhel'u ahi.
18 Nangman pa a nasem Songpi chu na nahsah pon,
na pensahpa Pathen chu na sumil tai.
19 Pakaijin hiche hi amu'n chule anungkih e,
achanu te le achapa te tah in alunghanna din achoh thou uve.
20 Aman aseije, 'Amaho ka donda ding;
ipi hungsoh uvem kive ding ahi.
Ajehchu amaho hi khang lamvai tah ahiuvin,
tahsanna bei chate ahiuve.
21 Pathen hilou thil ho ahou jeh uvin ka thangthipna asuthou uve;
apanna beiyu limsemthu pathen lunghan nan eichoudoh uve.
Tua keiman mipi jong hilou ho chu mipi mangcha a athangthip nau ka suhthou ding;
Chidang namdang ho mangcha a alunghan nau ka suhthou ding ahi.
22 Keima kalunghan a kon'in mei ahung kong doh jengin
chule lhankhuh thuh chanom akalha e.
Hichun leiset leh amuchi jouse avallhum'in
mol hung kipatna bul ho jong akalha tai.
23 Achung uva hahsatna ho kaset dim peh diu
chule ka thalpi a kakap lhah diu ahi.
24 Kel'a, meikah sah a, chule thi natna ho a
kasuh lhahsam diu ahi.
Keiman gamsa aha a gunei ho
le vut lah a kitol gul gunei tah ho ka solpeh diu ahi.
25 Polam'a, chemjam in thina ahin lhut ding,
chule sunglam'a, tijatna in
khangdong pasal ho leh khangdong numei ho,
naosen ho leh tehse ho ajep ding ahi.
26 Keiman amaho ka suhmang diu,
alunggel jengu jong ka thehmang ding ahi.
27 Hinlah ka gin chu Israel ding'a amelma ten totnopna a ahin nei diu,
hetkhel jeh a asei uva,
“Eiho tah thaneina in galjona inei tauve!
Hiche a hin Pakaijin bolding imacha aneipoi!'” ati diu ahi.
28 “Ahinlah Israel hi ima helou nam ahin;
mipi ho jong ima hethei louva ngol ahiuve.
29 Oh, amaho chu ching uva chule hethei tave hileu!
Oh, asuhkhel nau hedoh teiyunte!
30 Mikhat chun mi sangkhat chu iti adeljam'a,
chule mini bouvin mi sangsom iti adeljam ding,
Songpi'n ajohdoh u tilouva,
Pakaijin apehdoh u tilouvin?
31 Ahin igal mite songpi chu eiho Songpi tobang ahipon,
ahetdoh jeng vangun.
32 Alengpi tu uchu Sodom'a lengpi a kon ahin,
Gomorrah lengpi leiya kon ahi.
Hiche lengpiga ho chu thina thei jeng ahin,
agaboh jouse jong akha ngen ahi.
33 Amaho lengpitwi chu gulgu ahin,
thina thei gulsoh ho gu ahi.
34 Pakaijin aseijin, 'Keiman hiche thil ho hi kakhol'a,
ka gou umna a chu mohor kanam khum hilou ham?
35 Keiman phu kalah ding; Keiman ka lethuh ding ahi.
Phat chomkhat jouteng kibalhu diu ahi.
Ahamset nau nikho hunglhung ding,
chule alhunna diu chun akhal tan diu ahi.
36 “Aman ahat nau kichai amu a
chule soh hihen chamlhat hijongleh koima kidalhah lou amu teng,
chule aman asohte chunga alungput akhel ding,
Tahbeh a, Pakaijin amite dihna apeh ding ahi.
37 Chuteng aman adoh diu, 'Kihuhhingna dia akisel nau,
a pathen hou song ho hoiya um hitam?
38 Chuche pathen ho chu tua hoiya um hitam,
athilto u sathao kon aneh hitam
chule athiltou ju kon adon hitam?
Chuche pathen ho chu hungdoh uhenlang na panpi uhen!
Amaho chun gena na gonpeh uhen!
39 Tun veuvin; ama chu Kei kahi!
pathen dang aumpon ahinlah kei kaum'e!
Keiman kathaji a chule hinna jong kapehji ahi;
Keiman kamavo uva chule ka damsah jiu ahi;
koimacha Kaban thahat a konna kihuhdoh louding ahi!
40 Tun Keiman vanlam sang'in ka khut kadom'in,
chule ka phongdoh e, “Keima kahin laisea,
41 Ka chemjam val lah-lah ka kinol hem teng
chule thutah boldoh kapat teng,
Keiman ka gal mite chunga phu kalah ding
chule eithet ho chu ka lethuh ding ahi.
42 Keiman ka thalpi chang chu thisan ka donsah ding,
chule ka chemjam in saphe avallhum ding—
gal hing'a kimanho le akithat ho thisan,
chule gal mite lamkaiho luchang ho chu.”
43 Ama toh kipa thanom'un, nangho van ho,
chule Pathen vantil hon ama houvun.
Ama mite toh kipah thanom'un, nangho Chidan namdang ho,
chule valtil jouse ama a ding chun kisuhat uhen.
Ajehchu aman achate thisan phu alah ding;
aman agal mite phu alah ding ahi.
44 Chuin Mose chu Nun chapa Joshua toh ahung kilhon'in Israel mite jouse henga lacheng chu aseilhan ahi.
45 Mose’n Israel mipi ho jah a hiche thu ho aseilhah jou chun,
46 aman aseiben: “Tunia keiman naheng uva kagih nau jouse hi na lungthim cheh uvah nakoi sohkei diu ahi. Thupeh bangin na chateu heng'a peson'un chutileh amahon gahna thucheng jouse hi anit diu ahi.
47 Hiche gahna ho hi thuhomkeo ahipon—hiche ho chu nahin theina diu ahi. Hiche ho chu nanit uva ahileh Jordan Vadung na galkai uva gamsunga khu na hinkhou sot ding ahi.”
Mose thi ding kimasei
48 Chuche nikho ma-ma chun Pakaijin Mose jah a,
49 “Moab a chen, vadung solam'a mol akhun, chule Nebo Molsang akhun kal'in, Jericho a kon'a kigalsai ahi. Canaan gam khu gaven, Keiman Israel mite agoulo diuva kapehna gam ahi.
50 Chuteng khuche molsang chunga chu nathi ding ahitai. Hor Molsang'a na sopipa Aaron apu apate toh akigopkhom banga napu napate toh nakigop ding ahitai.
51 Ajeh chu Zin gamthip noiya Kadesh mun'a Meribah twiya chun Isarael te lah a nanigel lhon'in nei lhemlha lhon tan ahi.
52 Hijeh a chu gal'a pat agam chu navet ding, hinlah Israel mite kapehna gamsung vangna chotlut louding ahitai.”