31
Israel te lamkaiya Joshua ahung pan
1 Mose’n Israel mipi jouse henga gahna ho apeh jouvin
2 aman aseijin, 'Tun keima kum 120 a upa kahitan, chule keiman nangho na lamkai jou tapoving'e.' Pakaijin kaheng'a aseijin, 'Nangma Jordan Vadung na galkai louding ahitai.'
3 Ahinlah Pakai na Pathen'u tah chu galkaiya na lamkai uva pang ding ahi. Aman chumun'a namdang cheng ho chu asuhmang ding, chule nanghon agam uchu nalo diu ahi. Pakai kitepna banga Joshua in vadung galkaina a na lamkai diu ahi.
4 Pakaijin Amor mite leng Sihon leh Og asuhmang banga chugam'a cheng nam dang ho jong asuhmang ding ahi.
5 Pakaijin amaho jouse khu nangho khut a ahin pehdoh ding, chuteng keiman ka thupeh banga hi nabol diu ahi.
6 Hijeh chun hat unlang chule hangsan'un! Na kichat lou diu chule amaho ang'a natijat lou diu ahi. Ajeh chu Pakai na Pathen'u chu atahsa tah a na masang uva che ding ahi. Ama chu thon ngailou ding na dalhah lou diu ahi.
7 Chuin Mose’n jong Joshua akouvin, Israel mite jouse mitmun, aheng’a aseijin, “Hat inlang hangsan'in! Ajeh chu hiche mipi hohi nangin na lamkai ding Pakaijin apu apateu peh dinga akitepna gam'a dinga na lamkai ding ahi. Nangma hi nahi agam diuva hin hoppeh dinga chu.
8 Kicha hih in lunglha hih in, ajeh chu Pakai ama tah in amasa dia na lhonpi ding ahi. Ama nang toh lhon ding ahin, Ama chu thon louding na lhakaang louding ahi.
Hilchahna Lekhabu mipi dia sim ding
9 Chuin Mose’n hiche hilchahna jouse chu lekhabua ajihlut in chule thempu ho, Pakai kitepna Thingkhong puho le Israel upaho chu apen ahi.
10 Chuti chun Mosen hiche thupeh hi amaho apeuvin: “Kum sagi lhin tengleh, Kilhadohna Kum, Lhambuh Kut lai leh,
11 Pakai na Pathen'un alhenna mun'a Israel mipi jouse kikhopna masanga nang hon Hilchahna Lekhabu hi na simdoh diu ahi.
12 Pasal, numei, chapang, le gamdang mi khopia chengho—aboncha na koukhom sohkei diu—chuteng Hilchahna Lekhabu a thu chu ajah uva chule Pakai na Pathen'u genje kijil diu chingthei tah a hiche hilchahna ho chu ajabol diu ahi.
13 Hiche hi bol'un chutileh hilchahna heloulai na chateu chun ajah uva Pakai na Pathen'u ginje kijil diu ahi. Jordan na galkai uva nalona diu gam'a nachen laise uvin bol uvin.
Israel te thunun louna kimasei
14 Chuin Pakaijin Mose henga aseijin, “Na thina ding phat chu ahung lhung'e. Joshua henga seiyin lang Houbuh sunga hung lut lhon'in, chutengleh keiman chuche mun a chu Joshua ngansena kapeh ding ahi.” Hiti chun Mose leh Joshua jong achelhon'in Houbuh sunga chun agalut lhon tan ahi.
15 Chutah chun Pakai chu ponbuh theng sunga meibang khom bangin ahung kilah tan ahi.
16 Pakaijin Mose henga aseijin, “Nangma nathi a napu napate toh na lupkhomna ding phat ahung naitai. Nangma na chenung tengleh, mipi ho hin achena chan uva lei pathen ho, gamdang pathen ho ahin houpan diu ahi. Keima eidalhah uva amaho toh kitepna asuhkeh diu ahitai.
17 Chutengleh ka lunghanna achung uva hung soudoh jeng ding ahi. keiman amaho ka dalhah ding, amao a konna kamai kasel ding, chule amaho vallhum'a um diu ahi. Achung uva lungkhamna nasatah hung lhung ding, chule hiche nikho chuleh, 'Hiche hahsatna ho hi ichung uva ahunglhung tai ajeh chu Pathenin eiumpi tapouve! tia asei diu ahi.
18 Hiche phat lechun pathen dang ahou uva thil phalou bol dia akipehlut tahjeh uva amaho a konna keiman kamai kasel ding ahi.
19 Hijeh chun hiche lacheng ho hi jihdoh un, chule Israel mite hil'un. Ajilna uva kithopi uvin, chutileh amaho douna a hiche kibol chu keiya dia hettohsah a pang ding ahi.
20 Ajeh chu Keiman apu apateu peh dinga kakitepna—khoiju le bongnoi lonna gam'a kapuilut dingu ahitan. Chumun'a chu amaho phattheina chang diu, adu-du aneh diu, chule hung thao diu ahi. Hinlah pathen dang houna ahin pat diu; amahon einuse uva kitepna asuhkeh diu ahi.
21 Chule hahsatna lentah ahunglhun tengleh, hiche la chu ahetoh a pang ding, achilhah ten ahin suhmil louhel diu ahi. Peh dinga kakihahselna gam'a alut masangu tujenga jong hiche mite lungput hi kahet ahi.
22 Hijeh chun hiche nikho mama chun Mose’n la chu asundoh in, Israel mite ahil tan ahi.
23 Chuin Pakaijin Nun chapa Joshua chu hiche thucheng ho hin ngensena aneitai: “Hat inlang chule hangsan'in, ajeh chu nangman Israel mipi ho hi peh dinga ka kihahselna gamsung'a nahin puilut ding ahi. Keiman na lhonpi nang'e” ati.
24 Mose’n hilchahna ho aboncha lekhabua asutdoh jouvin,
25 Aman Pakai kitepna thingkhong pua pang Levi mite henga hiche thupeh hi apen:
26 “Hiche Hilchahna Lekhabu hi la uvinlang chule Pakai kitepna thingkhong panga chun koijun, ajeh chu hiche hi Israel mipi ho dinga ahetoh a umden ding ahi.
27 Ajeh chu ichan'a douna le louchal'a nahiu kahe'n ahi. Tujengin jong, kadam'a nalah kaumpi jeng uvin jong Pakai dounan nakisa uve. Kathi nungleh ichan lom-lom'in douna hinkho nahin neibe tadiuvem!
28 “Tun na phung uva upaho le migun jouse hin kouvun, chutileh amaho kom tah a thu kasei thei ding ahetoh dia van le lei kakou ding ahi.
29 Kathi nungleh nasatah a na chatvai uva najui diuva ka thupeh uva konna jong nakihei mang diu hi kahen ahi. Khonungleh, gim gentheina naheng uva hunglhung ding, hijeh a chu Pakai mitmua thilse nahin bol uva, na chon chan jeh uva nasatah a nahin lunghan sah diu ahi.”
Mose La
30 Chuti chun Mose’n jong ala chu Israel khoppi jouse henga asimlhan ahi: