30
Pakai heng'a kilekit dinga kouna
1 Khonungleh, nangho dia kagon phattheina ho leh gaosapna ho nahin hetchen uva, chule Pakaijin na Pathen'un na nomang nau namdang ho lah a nachen tengule, hiche hilchahna ho hi abonchan gelkhoh jingun.
2 Chuche laiya chu nangho le nachateu chengse Pakai na Pathen'u henga na hung kile uva, chule tunia ka thupeh chengse hi na lungthim pumpiu le na lhagao pumpi uva najabol uva ahileh,
3 chuteng Pakai na Pathen'un vangphatna ahin kilesah ding ahi. Aman na chung uva lungsetna aumsah ding, Pakaijin muntin'a na thecheh nauva konna nahin suhkhom kit diu ahi.
4 Vannoi tinchenga kithe cheh jong leu chun, hiche mun'a kon chun Pakai na Pathen'un nahin suhkhom uva nahin nungpui kit diu ahi.
5 Pakai na Pathen'un napu napa teu gam'a chu nahin puilut kit diu, hiche mun'a chu nachen kit diu ahi. Chuteng Aman napu napa teu sanga lolhingjo le pungjoa nasem diu ahi!
6 Pakai na Pathen'un nangho leh na chilhah jouseu lungthim akhel ding, chutengleh na lungthim pumpiu le na lhagao pumpiuva ama na ngailut diu chule chutia chu nahin diu ahi!
7 Pakai na Pathen'un hiche gaosapna jouse hi nangho bolgim le vetda na galmi teu chunga athoh sah ding ahi.
8 Chutengleh nang hon avel'a Pakai najabol uva tunia ka thupeh jouseu nanit diu ahi.
9 Pakai na Pathen'in natohna jouseuva na lolhinsah diu ahi. Aman cha tamtah le gancha tamtah napeh diu, chule Aman nalou gaasoh ujong tamtah a apunsah ding, ajeh chu Pakaijin napu napa teu banga nangho jong na kipa thanop sah diu ahi.
10 Nangho Pakai na Pathen'u henga na lungthim ule na lhagao pumpi uva nakihei uva a ogin na ngai uva Hilchahna Lekhabu a kisun Dan ho leh thupeh ho najabol uva ahile na chung uva Pakai na Pathen'u kipah thanom ding ahi.
Thi le Hin Kilhenna
11 Ajeh chu tunia ka thupeh chengseu hi nangho dinga hahsa lom-lom ahipon, na phahlel diu jong ahipoi.
12 Hichu van'a kikoi ahipon, 'Ijah ule ijabol theina diuva koi ham van'a gakal'a hin choilha ding? tia chutia gamla a kidohna ding ahipoi.
13 Hichu dillen gal'a kikoi ahipon, 'Ijah ule ijabol theina diuva koi ham ga galkaiya iheng uva hin polut ding? tia chutia gamla a kidohna ding ahipoi.
14 Ahipoi, hiche thu hi kinaitah a nangho a um ahi bouvin; hichu na jabol theina diuva na nephu uleh na lungthim uva uma ahi bouve.
15 Tun ngaiyun! Tunia thina le hinna, phattheina le hamsetna na kilhen diuva kapeh nahiuve.
16 Hijeh a chu tunia Pakai na Pathen'u na thupeh na ngailut diu chule athupeh ho najui uva ama deilam'a na lamlhah diu ahi. Hitia chu nabol uva ahile, nahin uva napun diu, chule nalut uva nalona diu gam'a chu Pakai na Pathen'un phatthei naboh diu ahi.
17 Hinlah na lungthim'u akiheimang'a thungai ding nada ule, chule pathen dang kin bol ding leh houna dinga na kiteldoh ule,
18 tua hi kagih nahiuve na kisumang tei diu ahi. Jordan galkaiya nalona diu gam'a chu na hinsot lou diu, hinkho pha nanei lou diu ahi.
19 Tunia hinna le thina, phattheina ho leh gaosapna ho na kilhen diuva kapeh nahiuve. Tun na deilhen'u hetoh dinga van le lei kakou ahi. Oh, hinna chu nalhen tei diu ahin, chutia ahileh nangho le na chilhah hou chu nahin tei diu ahi!
20 Pakai, Pathen ngailutna, Ama jabolna, chule Ama a dettah a na kipehlut nau le ngailutna a hiche deilhenna hi nabol theiyu ahi. Hiche hi na hinna diuva phapen chu ahi. Chule Pakai na ngailut uva na jabol uleh, Pakaijin napu napa teu Abraham, Isaac, chule Jacob henga akihahselna gam'a chu na hinsot diu ahi.