29
1 Hiche ho hi Moab gam'a aumlai uva Pakaijin Mose athupeh a Israel mite toh kitepna asem hou chu ahin, aman amaho toh Sinai Mol'a kitepna asem u banjom ahi.
Mose'n Kitepna avelsei
2 Mose’n Israel mite abonchan akou khom'un chule aseijin, “Egypt gamsunga naum laiyuvaPharaoh le asohte chule agamsung pumpi heng'a Pakai thilbol chu na mittah uvin—
3 patepna hattah ho, vetsahna kidang ho, chule datmo umtah tah ho chu namu tauve.
4 Ahinlah Pakayin tuni chanin nangho jouse hetkhen theina lungthim, mutheina mit, khojahna bil nape hihlai uve!
5 Keiman nangho gamthip noiya kum somli sungin kapui leuvin, na ponsil hou leh na kengchut ujong asepon ahi.
6 Nang hon neh ding changlhah, don ding ju ahilouleh khamna thei dang nanei pouvin, ahinlah ama chu Pakai na Pathen'u ahi na hetdoh theina diuvin aman na peuvin ahi.
7 Hilaiya kahung uva hin, Heshbon a Lengpa Sihon leh Bashan a Lengpa Og chu keiho dounan eihung kinahpi uvin, ahinlah keihon kajou uve.
8 Agam'u kalauvin Reuben le Gad phung chule Manasseh phung kehkhat ho gam dingin kapeuvin ahi.
9 Chuti ahijeh chun, hiche kitepna thudol'a kisei thudol ho hi, abonchan bol'un chutileh na lolhin diu ahi.
10 Phung lamkaiho, upaho, migunho, Israel pasal jouse—naboncha uva tunia Pakai na Pathen'u umpina a nadin diu ahi.
11 Na chateu neo cha-cha ho le najiteu chule gamdang mi nalah uva cheng'a thing natanpeh ule twi nathal peh hou chutoh nahiuve.
12 Tunia hilaiya nadin uhi Pakai na Pathen'u toh kitepna neikhom dia hunglut nahiuve. Pakaijin hiche kitepna asem hi gaosapna toh asemtha ahi.
13 Tunia kitepna a nalut uhi, Pakaijin amite hiding Ama chu na Pathen'u ahi chu nangho heng le napu napa teu Abraham, Isaac leh Jacob henga akitepna suhdetna ding ahi.
14 Ahinlah gaosapna ho toh kisemtha kitepna hi keiman nangho toh keima kikah dinga bou kasem ahipoi.
15 Keiman kitepna kasem hi tunia Pakai na Pathen'u umpina a hung ho a dinga bou kasem ahipon, khonunga hunglhung ding khang ho a dinga jong kasem ahi.
16 Egypt gam'a iti ikhosah uva chule ihin dalhah uva igal miteu nam ho gam leiset iti ihin pal'u geldoh uvin.
17 Nanghon thet umtah chonna ho le thing, song, sum-eng, chule sana a kisem lim semthu pathen ho na musoh tauve.
18 Keiman nangho toh kitepna kasem hi nalah uva koimacha—pasal, numei, chilhah, ahilouleh phung—Pakai iPathen uva konna namdang te limsemthu pathen hou dia na kiheimang lou diu, chuti henlang hileh koima junga konna hung gaadoh a chu akha le thina thei gu umlou ding ahi.
19 Hiche gaosap adia gihna jaho chu amaho le amahon kipapitona a gel uva, 'Ka louchalna lungchang deisahna lam kajui jeng vangin keima kabit nai.' Hiche hin paodohna dihlou lam'a eilamkai ding ahi!
20 Hitobang mihem chu Pakaijin angaidam louhel ding ahi. Chuti tah sanga amaho douna a alunghanna leh athangthip nan ahal diu ahi. Lekhabu a kijih gaosapna jouse achung uva hung chuding, chule Pakaijin vannoiya amin'u anoimang ding ahi.
21 Pakaijin amaho chu Israel phung jousea konna achomkhen ding, Hilchahna Lekhabu a gaosapna jousea kitepna kijihlut chu achung uva kisunglha ding ahi.
22 Chutileh khang hunglhung ding ho, nangho chilhah hihen hetphah lou gam'a konna hung kholjin miho hijongleh, Pakaijin leiset asuhset leh natna ho a asuhgim nau hi amu diu ahitai.
23 Amahon, 'Gamsung pumpi hi kath le chi in akisusetai. Hichu imacha kitulou le imacha keh talou, hampa jengjong kehlou pannabei gam ahitai. Sodom le Gomorrah khopi teni toh abangin, Admah le Zeboiim, Pakaijin alunghan pet a asuhmang toh abang'e' tia tijatah a asei diu ahi.
24 Chule akimvel uva namdang hon , 'Ipi jeh pen tah a Pakaijin hiche gamsung hi hitia hi abol jeng hitam? Ipi jeh a hibang loma hi lunghang ahidem? tia adoh diu ahi.
25 Chule adonbutna ding chu, 'Hiche thil sona jeh chu agamsunga mipi hon Egypt gam'a konna ahin puidoh pau Pakai, apu apateu Pathen toh akitep nau adalhah jeh u ahi.
26 Chusangin, amaho akiheimangun tu masanga kihe khalou pathen lim semthu, Pakaiya kon hilou pathen ho kin abol'un chule ahou uve.
27 Hijeh a chu Pakai lunghan nan gamsung akah a, hiche lekhabu a kisun gaosapna ahin sunlhah ahitai.
28 Nasatah a alungsatna le alunghanna jeh in Pakaijin amite chu abehchang uva gam danga atolmang uva, tuni channa hiche a chu khosa ahiuve!'
29 Pakai iPathen uhin koima hetlou thuguh ho aneijin ahi. Hiche ho a chu mopo thei ihi pouve, ahin aphondoh ho a hi eiho le ichate hou hi atonsot adia mopo thei ihiuve, achutia ahileh eihon hiche hilchahna ho hi ijabol sohkei diu dol ahi.