28
Thunun jeh a phattheina
1 Pakai na Pathen'u thua nanun uva tuni khoa kapeh athupeh jouse aboncha najui sohkei uva ahileh, Pakai na Pathe'un vannoiya nam jouse lah a na dopsang diu ahi.
2 Pakai na Pathen'u thusei aboncha na ngai uva ahileh a phattheina jouse na chan diu ahi:
3 Na khopi hou leh na lou hou
phattheina chang ding ahi.
4 Na chateu le na anche hou
phattheina chang diu ahi.
Na bonghon le kelcha hon ho chilhah
phattheina chang diu ahi.
5 Na thei paipeh hou leh na changlhah khum hou
phattheina chang ding ahi.
6 Hoiya cheuvin lang ipi bol jong leu chun,
phattheina na chan diu ahi.
7 Na galmi ten nahin lonkhum tengu leh Pakaijin amaho ajo ding ahi. Ama hon lam khat a nahin lonvuh diu, ahin lam sagi a jamcheh diu ahi.
8 Pakaijin natohna lam jouseuva phattheina na honpeh diu chule na thil kholnau nadip peh diu ahi. Pakai na Pathen'un napeh nau gamsunga chu phatthei na chan diu ahi.
9 Pakai na Pathen thupeh chengse aboncha nanit sohkei uva alampi ho a na lamlhah uvleh, na heng uva akitepna banga abol ding ama namtheng mite nahi diu ahi.
10 Chuteng vannoiya nam jousen Pakaijin nam mite ahiuve tichu amu diu ahin, chule nang ho kichatna a ding diu ahi.
11 Pakaijin napu napa teu peh dinga akitepna gam'a chu vangbohna na chan diu, chate tampi a phattheina, gancha tampi, chule muchi chivo thalhingtah a phatthei naboh diu ahi.
12 Pakaijin agou kholna van a konin natohna jouseuva aphat cha gotwi nape uvin tin phatthei naboh diu ahi. Nang hon nam tamtah heng'a thil na phal diu, ahinlah nang hon midanga bat dia na ngaichat lou diu ahi.
13 Tunia kapeh u Pakai na Pathen'u thupeh ho na ngai uva ahileh, chule chingtheiya na jabol uleh, Pakaijin nangho aluchang'a na pansah diu ameiya na pansah lou diu, chule phat jousea achungnungpen a napan uva anoinungpen a napan louhel diu ahi.
14 Tunia ka thupeh chengsea konna hi khatcha a na kihei mang thei lou diu, pathen dang juiya hou nabol lou diu ahi.
Thununlou jeh a sapsetna ho
15 “Ahin Pakai na Pathen'u thu ngai ding nada uva chule tunia kapeh u thupeh ho leh dan ho jabol louva nakoi uleh, hiche gaosapna ho hi hunglhung ding chule na suhgam diu ahi.
16 Na khopi hou leh na lou hou
gaosapna chang ding ahi.
17 Na chateu le na anche hou
gaosapna chang diu ahi.
Na bonghon le kelcha hon ho chilhah
gaosapna chang diu ahi.
18 Na thei paipeh hou leh na changlhah khum hou
gaosapna chang ding ahi.
19 Hoiya cheuvin lang ipi bol jong leu chun,
gaosap nachan diu ahi.
20 “Pakai ama tah in natohna jouseuva gaosapna ho, lung-opkaina, lung lhahna nahin lhutpeh diu, thil phalou nabol jeh uleh keima nei nungsun jeh uva kisumang hel ding nahiuve.
21 Nalut uva nalona diu gamsunga nachen lut kah uva koimacha khen louva Pakaijin nachung uva natna ho a nasuhgim diu ahi.
22 Pakaijin khosih, tipom, nichang sat le twi hah, thing nat le thih ehkai natna chom chom'a na suhgim diu ahi. Bolgimna hijatpi hin nathi masang seuva najui le diu ahi.
23 Na chunga vanthamjol chu sum-eng toh bang ding, nanoiya leiset jong thih banga tah ding ahi.
24 Pakaijin na gamsunga hungju ding go chu vutbong a akhel'a, chule vutvai chu na kisuhmang hel kah a hunglha jing ding ahi.
25 Pakaijin na melma teu jo ding bep a nakoi diu ahi. Na melma teu chu lam khat bouva nalonvuh diu, ahin nang ho lam sagi a najam cheh diu ahi! Nang ho chu leiset a lenggam ho dinga kichat um thil khat nahi diu ahi.
26 Na thilong jouseu chungleng vacha te le gamsa ho an a pang ding, a delmang ding koima um louding ahi.
27 Pakaijin Egypt a uilut, tipom, uithah ho a na suhgim diu hiti ho a chu nadam kit lou diu ahi.
28 Pakaijin ngolna, khomulouna, tijatna a naden diu ahi.
29 Sun jenga jong muthim noiya mitcho banga nakimai le-le diu, hinla na lampi na kimu lou diu ahi. Nang ho na kisugim uva na kichom jing diu, chule koima nahuh diuva hung louding ahi.
30 Jidia numei nakihol ding, hinlah amanu chu pasal dangin aluppi ding ahi. In nasah ding, hinlah koiham khat cheng ding ahi. Lengpi lei bol in natin, ahinlah aga naneh khah lou ding ahi.
31 Na masanga na namit mu'n nabongchal ki that intin, ahinlah asa chu khatcha na pekhah louding ahi. Nanga konin na sangan kila intin, hung kinung thah ponte. Na kelngoi le na kelcha te na melma te kipe ding, chule mikhat jeng jong na kithopi umlou ding ahi.
32 Na chanu te le na chapa te soh dia kikaimang namu ding ahi. Amaho jeh a na lungthim keh ding, hinlah amaho na panpi thei louding ahi.
33 Imatih a najah khah lou nam dangin chol tah a natu nalou gasoh aneh diu ahi. Gimbol jingna le kijen dan phalou nathoh ding ahi.
34 Navel'a lungkhamna ho namu jeh a na ngol loding ahi.
35 Pakaijin nakhup teni le nakeng teni dam theilou uilut a natom ding. Tahbeh a, nalu apat na kengto geiya atom ding ahi.
36 Pakaijin nangho le napu napa te hetkhahlou nam henga nangho le na lengpau na nomang diu ahi. Chuche mun'a chu thing le songa kisem pathen lim nahou diu ahi!
37 Pakaijin nalhut nau mun a chu kichat um thil, jaapi u le nuisat hoh a um bep nahi diu ahi.
38 Tampi natu diu hinlah themcha nalo diu ahi, ajeh chu khaokhopi ten na muchi u aneh chaigam diu ahi.
39 Lengpi lei nalho uva na kisahlelpi diu, hinlah lengpitwi nadon lou diu aga jong naneh lou diu, ajeh chu lungin asuhmang ding ahi.
40 Nagam jouseuva olive thing tampi natu diu, ahinlah olive thao naman louhel diu, ajeh chu amin masanga aga kheding ahi.
41 Chanu chapa nanei diu, ahinlah amaho nachan diu ahi, ajeh chu amaho sohchanga um diu ahi.
42 Lung hon na thing hou leh na muchi hou asuhmang diu ahi.
43 Na heng uva hung cheng kholjin miho chu hat jep-jep diu, nangho vang na kheh suh cheh-cheh diu ahi.
44 Amahon sum nabat sah diu, ahin nang hon amaho nabat sah joulou diu ahi. Amaho chu alu a pang diu, nangho chu ameiya napan diu ahi!
45 Pakai na Pathen'un napeh u thupeh ho leh dan ho jabol ding nada uva ahile, namanhel kah uva hiche gaosapna hon nadel jing diu chule na khaltan diu ahi.
46 Nangho leh nakhang khang uva hiche tijatna ho hi amelchihna le gihna a um jing ding ahi.
47 Phatchomna tampi namu hou jeh a kipah le thanom'a Pakai na Pathen'u kin na bollou uva ahileh,
48 na galmi teu kin bol dia Pakaijin nang ho douna a ahinsol ding ahi. Gilkel a, dangchah a, keova umna a, imalam jousea nahsah louva na kidalha diu ahi. Pakaijin na ngongchang uva thih namkol akoi ding, na suhmanghel kahseuva hatah a na kisugim diu ahi.
49 Hitia chu nangho toh kidou dinga Pakaijin leiset kol ninga kon nam khat ahin puiya, muvanlai banga gangtah a hung lenglut jeng diu ahi. Hiche nam mite pao chu het jong na hetthei lou diu,
50 nam gilou leh lungthim bei, tehse jabolna le khangdong khotona neilou hi diu ahiuve.
51 Hiche sepai ho chun na muchi hou leh na gancha teu anehgam diu, chule suhmanga naum diu ahi. Amahon na chang le mim, ju thah, olive thao, bongnou te, ahilouleh kelngoi ho, chule nangho jeng jong kisuhmang ding nahiuve.
52 Amahon na khopi hou ahin lonvuh uva na gam uva na kulpi bang hou—eivengdoh unte tia na kineppiu bang ho—chu ahochim diu ahi. Pakai na Pathen'un napeh nau gamsunga na khopi hou ahin lonvuh diu ahi.
53 Gal mite lonvuh nasat val a gentheina gimnei behseh jeh a Pakai na Pathen'un napeh u na chanu teule chapa teu sa nahin neh diu ahi.
54 Nalah uva alungnengpen pan jong asopipa, angailut aji, ahinsa achate jeng jong lainatpina ahin neilou ding ahitai.
55 Aman ahinsa acha khat tahsaphe chu—aneh diuva amaho jeng jong ahop nom louding—ajeh chu gal mite jeh a na khopiu jouse gentheina hoiset behseh jal'a aman jong ima dang neh dang aneilou ahi.
56 Chule numei chonnem tah le lungneng nu—achon nem behseh jeh a akeng khotaljum jeng jong tol chotsah nom louhel nu chun—ajipa le achanu leh achapa te jenga jong engsetna anei ding ahi.
57 Amanun ahinjou jouva anaosen chu amaho a konna asel ding, chutileh guhthim'a aneh diu ahi. Amanun gal khoh sunga khopiho a neh ding imacha anei louding ahi.
58 Hijeh chun hiche lekhabua danthu kijih jouse hi aboncha nit ding nada uva, chule Pakai na Pathen'u min loupi le tijat um hi nagin lou uleh,
59 chuteng Pakaijin aseije umlou pul ho a nang leh na chate na suhgam diu ahi. Pul ho chu houise tah le olna umlou hi ding, khoh lheh jeng chule thohjou hoi hilou natna na sempeh diu ahi.
60 Na kichat tah Egypt gamsunga nat thohlelna jouse nachung uva ahin lhunsah ding, chule olna nanei lou diu ahi.
61 Pakaijin natna jouse le gamna hise a na suhgim diu, na kisuhmang kahse uva hiche Hilchahna Lekhabu a kiminpat lou adang jong ahin lhunsah ding ahi.
62 Tam lheh uvin lang van'a ahsi jat phajong leu chun, nangho themcha bou kidalha ding nahiuve ajeh chu nang hon Pakai na Pathen'u thusei na ngailou diu ahi.
63 “Pakaijin nachung uva phattheina leh pun theina amua alung lhaina ahi bang’a, Pakai chu na kisuhmangna diuva lung-oi ding ahi. Nalut uva nalona diu gamsunga konna chu na botel diu ahi.
64 Chutia chu Pakaijin leiset ningkhat apat ning langkhat geiya namdang te lah a nathe cheh diu ahi. Chu a chu nangho nahiuvin napu napa teu jengin jong ahet khah lou thing le songa kisem, namdang ho pathen ho nahou diu ahi!
65 Chumun'a namdang ho lah a chu chamna ahilouleh kicholna mun namulou diu ahi. Chule Pakaijin na lungthim'u kitihot a akoiya, namit uva khomuna aumsah louding, chule na lhagao u kinepna bei aso ding ahi.
66 Na hinkhou chu seithei hilou dinmun a um jing ding ahi. Sun le jan a na kichat jing diu, kihing ding mong hinam tijong na hetthei lou diu ahi.
67 Jingkah leh 'Jan hitaleh!' tia nasei diu ahi. Chule nilhah ahiteng 'Jingkah hitaleh!' tia nasei diu ahi. Chutia chu navel uva tijat um namu houvin na kichat sah diu ahi'
68 Chuteng nanung mukit lou diu ahitai tia kakitepna gam'a chu Pakaijin Egypt lama kong'a na nungtol kit diu ahi. Chumun a nagal mite kom'a chu nangho le nangho soh a nakijoh diu, ahinlah koiman nachoh lou diu ahitai.”