27
Ebal Mol a Maicham
1 Chuin Mose le Israel lamkai hon mipi ho hiche thu hi apeuvin: “Tunia kapeh u thupeh ho hi aboncha nanit diu ahi.
2 Jordan Vadung na galkai uva Pakai na Pathen'un napeh nau gamsung nalut tengu leh, song len phabep natun diu hiche ho chu apumpia na suhnam diu ahi.
3 Pakai na Pathen'un vadung galkaija khoiju leh bongnoi lonna gam'a nalut tah jeh uva Pakai, napu napa teu Pathen henga na teppeh nau banga song ho a chu hilchahna thu ho najih diu ahi.
4 Tunia kathupeh bang uva Jordan na galkai tengu leh songho chu Ebal Mol a natun uva nasuhjol diu ahi.
5 “Hiche mun'a chu Pakai na Pathen dinga maicham khat natun doh diu, ama ngaina a um, akitanbong hilou naman diu ahi. Song ho suhtohna thih khutchoi naman lou diu ahi.
6 Akitantoh lou song ho a maicham mun nasem uva Pakai na Pathen uva dia pumgo thiltona a naman diu ahi.
7 Chule hiche maicham chunga chu chamna thilto jong natodoh diu, Pakai na Pathen'u angsunga kipa golnop nabolkhom diu ahi.
8 Song kisunam ho a chu hilchahna thu ho kichehsel'a najih diu ahi.”
9 Hiti chun Mose le Levi thempu hon aban ban chan Israel jouse heng'ah: “Vo Israel, thipkhen'un chule ngaiyun! Tunin Pakai na Pathen mite nahi tauve.
10 Hijeh chun Pakai na Pathen'u jabolna a tunia kapeh u thupeh ho leh thulhuh ho hi nanit diu ahi.”
Ebal mol a kon gaosapna ho
11 Hiche nikho ma-ma chun Mosen jong mipi ho chu hiche mopohnna hi apen ahi:
12 Jordan vadung na galkai tengu leh, Gerizim Mol'a mipi phatthei bohna samphonga ding ding chu phung ho lah a Simeon, Levi, Judah, Issachar, Joseph chule Benjamin hi diu ahi.
13 Chule Ebal Mol'a gaosapna sam dia ding ding chu phung ho lah a Reuben, Gad, Asher, Zebulun, Dan chule Naphtali hi diu ahi.
14 Chutengleh Levi miten Israel mipi ho jah a asap diu:
15 'Koi hileh lim semthu sem'a guhthim'a tungdoh a chu gaosap chang hen. Hiche khutthem ho lim semthu chu Pakai dia thet um ahi.'
Chuteng leh mijousen, 'Amen' tia adonbut diu ahi.
16 'Koi hileh anu le apa jabol lou mihem chu gaosap na chang jeng hen.'
Chuteng leh mijousen, 'Amen' tia adonbut diu ahi.
17 'Koi hileh aheng akom agamgi sukeh a thil gu a chu gaosapna chang hen.'
Chuteng leh mijousen, 'Amen' tia adonbut diu ahi.
18 'Koi hileh lampia mitcho elbai pui chavai a chu gaosapna chang hen.'
Chuteng leh mijousen, 'Amen' tia adonbut diu ahi.
19 'Koi hileh kholjin ho, chaga ho, ahilouleh meithai ho chunga adih louva thutan a chu gaosapna chang hen.'
Chuteng leh mijousen, 'Amen' tia adonbut diu ahi.
20 'Koi hileh apa jite lah a khat pen kitimatpi a chun apa chon dan lamlhah asuhkeh ahin gaosapna chang hen.'
Chuteng leh mijousen, 'Amen' tia adonbut diu ahi.
21 'Koi hileh gancha kitimatpi a chu gaosapna chang hen.'
Chuteng leh mijousen, 'Amen' tia adonbut diu ahi.
22 'Koi hileh asopinu, apa chanu ahilouleh anu chanu kitimatpi a chu gaosapna chang hen.'
Chuteng leh mijousen, 'Amen' tia adonbut diu ahi.
23 'Koi hileh ajinu-nu kitimatpi a chu gaosapna chang hen.'
Chuteng leh mijousen, 'Amen' tia adonbut diu ahi.
24 'Koi hileh a inheng te guhthim'a delkhum a chu gaosapna chang hen.'
Chuteng leh mijousen, 'Amen' tia adonbut diu ahi.
25 'Koi hileh themmona bei mi thana dinga sum kilah a chu gaosapna chang hen.'
Chuteng leh mijousen, 'Amen' tia adonbut diu ahi.
26 'Koi hileh hiche hilchahna thu ho hi pha salouva jabol lou chu gaosapna chang hen.'
Chuteng leh mijousen, 'Amen' tia adonbut diu ahi.