26
Lhosoh thilto ho le hopsom ho
1 Nangho Pakai na Pathen'un goulutah napeh nau gamsung najo uva na chenlut tengu leh,
2 na lhosoh-gau masa a konna phabep khat na pucha sung uva nakoi khom diu, chuteng ama houna dia Pakai na Pathen'un amin kijabolna dia adeilhenna mun a chu nahin pohlut diu ahi.
3 Hiche laimun'a thempu natongpa kom'a chu nache uva, 'Hiche thilpeh a hi Pakai na Pathen henga ipu ipateu khanga akihahselna gamsunga keima ka hunglhung tai,' tia ahenga nasei diu ahi.
4 Thempu pan jong na pucha uchu nalu uva pat na doplhah peh diu Pakai na Pathen'u maicham maiya nakoi peh diu ahi.
5 Nang hon Pakai na Pathen'u henga hitia hi nasei diu, 'Kapuluiyu Jacob chu Aramea kholjinmi Egypt gam'a gamdang mi banga ana cheng ahi. Ahunglhun uchun a insung mijat jong lhomcha bou ahi, hinlah Egypt gamsunga nam lentah le thahattah ahung hidoh tauvin ahi.
6 Egypt miten soh a suhgim le engbolna einei tengu leh,
7 Pakai kapu kapa teu Pathen henga kakap uvin ahi. Aman kakanau ajatan chule ka hahsatnau, ka thoh gimnau jouse amu sohkei tan ahi.
8 Chutah chun Pakaijin aban thahat apantan, kichat umtah leh melchihna kidang tamtah toh thon Egypt gamsunga kon chun Pathen'in eihin puidoh tauvin ahi.
9 Hichea kon chun eihin pui galkai uvin ahileh, khoiju le bongnoi lonna gamsunga chun kahung lhung tauvin ahi!
10 Chule tun, Vo Pakai, leiset a konna gamasa nangin neipeh chu naheng kahin lhut tai. Chutengleh Pakai na Pathen'u angsunga hi natun doh diu, a angsunga dilsua chibai naboh diu ahi.
11 Hiche jouleh na che uva Pakai na Pathen'un nang leh na insung mite thilpha napeh hou jeh a kipa golnop nabol diu ahi. Kipa golnop a chu Levi te le kholjin miho jaosah ding hi na suhmil lou diu ahi.
12 Kum thum lhin seh leh na anche louhing uva konna achombeh a hopsom napeh diu ahi. Hiche kum chuleh na hopsom uchu Levi te, kholjin miho, naochaga ho le meithai ho napeh diu na khopi houva amahon anneh ninglhinga anei diu ahi.
13 Chutengleh Pakai na Pathen'u angsunga na phondoh diu, 'Keiman nei thupeh bangin ka in'a konin thilpeh theng chu kalan chule hichu Levi te, kholjin miho, naocha ho le meithai ho kapeuvin ahi. Keiman na thupeh ho kasuhmil ahilouleh ka nahsahlou imacha aumpoi.
14 Ka lunghem pet in hiche ho chu imacha kanepoi; theng louva kaum laiyin jong ka tham poi; chule mithi opnan a jong thilpeh a imacha kamang khapouve. Pakai ka Pathen thupeh chu ka jabolin chule kabol dia eithupeh abon chan kabolin ahi.
15 Tun na mi Israel te leh kapu kapa teu henga peh dinga na kihahselna gam—khoiju leh bongnoi lonna gam chu na chenna van muntheng'a kon chun hin ven chule phatthei nei boh tauvin.
Pakai thupeh jabol dia kouna
16 Tunin Pakai na Pathen'un hiche thupeh chondan ho hi na jabol diuvin nape tauve. Hijeh chun na lungthim pumpiuva jabol dingin chingtheiyun.
17 Tunin Pakai chu ka Pathen'u ahi tin na phongdoh tauvin ahi. Chule alampia lamlha ding, achondan le adan thupeh ho jabol ding le asei jouse bol dinga nakitep u ahitai.
18 Tunin nang ho hi akitepna banga ama mite, ama goulu mong mong nahiu Pakaijin aphongdoh in, chule nang hon athupeh jouse na jabol diu ahiye.
19 Chule chutia chu nabol uva ahile, aman asemsa nam jouse lah a na dopsang diu ahi. Chuteng nang hon choiatna, jabolna le minthanna nanei diu ahi. Akitepna banga nang ho Pakai na Pathen uva dinga nam theng nahi diu ahi.