25
1 Vetsahnan mihem tutanna a akiheh lhon leh, thutan ho chun khat chu adih in khat amo e tin aphondoh uvin ahi.
2 Chule athemmo pa chu voh ding alhah khah tah a ahileh, thutanpa chun athemmo pa chu alupsah ding, them changpa mitmua chu athemmona jat dungjuiya avoh ding ahi.
3 Ahinlah somli kal navoh theilou diu ahi; hiche kal achu thoh thei louding ahi. Ajeh chu amapa chu miho masang'in kijep jep jing tahen lang hileh, aki neosah behseh jeh achu muset a naum thei diu ahi.
4 Chang chil a pang bongchal chun aneh theilouna dinga amuh nasom lou diu ahi.
5 Chule insunga pasal ni chengkhom teni chu khat joh sang chu chapa beiya thina ato khah tah a ahileh, athipa jinu chu pasal dang angsunga chea jinei thei louding ahi. Amavang, numei nu jipa sopipan akichenpi a akitimatpi ding asopi pa kin chu abulhitpeh ding ahi.
6 Hichea chapa ahin masat pen chu asopipa chapa a kisim ding, Israel insunga ama min chu suhmanga um louding ahi.
7 Ahinlah adam nalaiya sopipa chun athipa jinu chu deilouva, ji dinga akipui nom tah louva ahileh, asopipa jinu jong che ding kelkot phung lama thutan vaihom ho henga 'Ka jipa sopipan athisa asopipa hi Israel insunga amin ajop nompon eikichenpi poi,' tia agasei ding ahi.
8 Chuteng hiche khopi sunga upa chengse chun amapa kouna anei diu akihoupi diu ahi. Amavang hichan nunga jong ‘Keiman hichenu hi kaji dinga ka kipui louding ahi’ tia asei nah laiya,
9 chule asopi jinun jong upa masanga chu anailut ding, amapa kengchot asut peh ding, amai changa chil aset den ding ahi. Chutengleh amanun aphondoh ding, ‘Pasal koi hijongleh asopipa khela insung khat sem doh nomlou chu hitia hi kibol ding ahi,’ tia asei ding ahi.
10 Hiche jou kalse leh Israel insunga 'akengchot kisut lhah peh pa' insung tia kihe ding ahi!
11 Pasal khat leh khat chu akinah a pasal khatpa jinu chun khatpa a konna chu ajipa chu huhdoh ding gotna a khatpa chu atilchang a amat a ahileh,
12 numei chu akhut natan peh diu ahi. Khotona nanei lou diu ahi.
13 Sumkolveina a thil gih tena dihlou naman lou diu,
14 chule nang hon tena lhingset le kitahna naman diu ahi.
15 Ahi, phat jousea kitahna a thil nate diu, chuti henlang hileh Pakai na Pathen'un napeh nau gamsunga nahin sot diu ahi.
16 Jou leh kitahna beiya thil teho chu Pakai na Pathen dinga thet umtah ahi.
17 Egypt a konna nahung potdoh uva Amalek miten nabol nau chu na suhmil louhel diu ahi.
18 Ama hon thabei le lhasam'a naum laitah uvin nalonkhom uvin, chule nung langa cheh chaova umho ajeplhu uvin ahi. Ama hon Pathen ginna anei pouve.
19 Hijeh chun, Pakai na Pathen'un gouupen napeh nau gam'a nagal miteu jousea konna na kikcholdo sah teng ule, nang hon jong vannoi leiset a Amalek mite chenna jouse chu na suhmang hel diu ahi. Hiche hi sumil hihbeh uvin!