24
1 Vetsahnan pasal khat in numei khat akichenpi'n numei nun alunglhai sah pon ahi. Amanu chunga thil dihlou amudoh in, ama pan dana lekha ajih in, amanu khut a apen, chule a in'a konin amanu asoldoh tai.
2 Amanun in adalhah chun, hiche pa a konna chamlhat ahitan pasal dang khat toh kicheng thei ahitai.
3 Ahin pasal anina pa jong chun dana lekha apen, amanu khut a apen, asoldoh in, ahilouleh amapa chu athi khah tah leh,
4 aji masapa chun akichenpi kit thei tah louding ahi, ajeh chu akisuboh ahitai. Hitobang thil ho hi Pakaiya dia thet umtah ahi. Pakai na Pathen'un napeh nau gamsunga hitobang thil dihlou ho hi na pohlut lou diu ahi.
5 Pasal khat chu ajinei thah ahileh, amapa chu galsat mia panda hen chule natoh dang jong bolsah louding ahi. Kum khat lhingset a inmun'a um ding, alungdei pennu chutoh nom'a um khom ding ahi.
6 Thil bat a kiphaldoh hung kisah kah a umden dia chang goina song teni ahilouleh achungnung pa hijongleh lah ding hi adihpoi, ajeh chu aneipan hinna a anei ahi.
7 Koi hileh asopi Israel mi khat tou aguh a soh banga abol a, ahilouleh akijoh mang jenga ahileh agupa chu thi ding ahi. Hitia hi, nalah uva chona phalou ho chu na suhtheng diu ahi.
8 Vun natna khoh tah jouse thudol hi, Levi thempu hon nahilna bang uvin chingtheiyun, thupeh kapeh jouseu abonchan nit uvin.
9 Egypt gam'a konna nahung potdoh uva Pakai na Pathen'un Miriam abolna chu geldoh un.
10 Ipi thil hitaleh naheng nakom thil bat a napeh tengleh, ahin sahkit kah a umden dia thil nahin peh chu la dingin lut jeng hih in.
11 Ama insunga lut a na henga ahin choidoh kah a pam langa na nga ding ahi.
12 Naheng nakompa chu mi vaicha ahi a chule bat hinsah kah a umden dia asangkhol chol ahin peh leh, jan khovah a jong asangkhol chol chu nakoi louding ahi.
13 Nilhum tengleh sangkhol chol neipa chu na nungpeh ding hiche jal a chu aman jan khovah a lum asah a phatthei naboh ding, chule Pakai na Pathenin chonpha a nasim ding ahi.
14 Na khopi uva na Israel chanpi hihen gamdang mi hijongleh, mi vaicha le lengvaiya natong mi chunga phatchomna nahol louhel diu ahi.
15 Atohman uchu anikho kho a nilhum masang napeh diu ahi ajeh chu vaicha leh hiche a chu kingai ahiuve. Achuti louva ahileh, amaho jong Pakai anga kap uva nangho douna soh thei ahin, chule hichu nang ho dinga chonset a kisim ding ahi.
16 Minu le mipa ho chu achate chonset jal'a thina ki chansah lou diu, achate chonset jal'a jong anu apate thina ki chansah louding ahi. Amavang koi hileh ama ama chonset jal'a bou chu thina kichan sah ding ahi.
17 Nalah uva cheng gamdang miho leh chagaho chunga adih a thutanna nabol diu, meithai ho ponsil jong thilbat khel a koiden ding thil a na lahpeh thei louhel diu ahi.
18 Egypt gamsunga soh nana hiu ahin Pakai na Pathen'un nasoh channa uva konna na na lhatdoh u chu geldoh jing jengun. Hijeh a chu hiche thupeh hi kapeh nahiuve.
19 Loulaiya chang at a nakon uva chule na changpal chop hai aum tengleh, hiche chomtup dinga na nungche kit lou diu ahi. Hiche ho chu chaga gamdang mi, chaga le meithai ho dingin dalhan. Chuteng Pakai na Pathen'un nabol natohna jouseuva phatthei naboh diu ahi.
20 Olive thing na vohlhah tengu leh, nivei kal vohih un. Aumden cheng chu gamdang miho, chagaho, methai ho dingin dalha peh un.
21 Lengpi leiya lengpiga naki chopkhom tengu leh, na dalhah nung uva akhai chengse chu na donlou diu ahi. Ajeh chu gamdang miho, chagaho, methai ho dingin dalha peh un.
22 Egypt gamsunga ana soh changsa nahiu geldoh jingun. Hijeh a chu hiche thupeh hi kapeh nahiuve.