23
Hou chungchanga chon dan ho
1 Pasal khat chu til lahsa leh hinpi kitansa ahileh, amapa chu Pakaiya kikhopna mun'a pang theilou ding ahi.
2 Nalah uva danngai louva peng aum'a ahileh, ama ahilouleh achilhah chu khang som chan Pakaiya kikhopna mun'a pang theilou diu ahi.
3 Ammon mite ahilouleh Moab mite ahilouleh koipen hijongleh achilhah teu chu khang som chan Pakaiya kikhopna mun'a pang theilou diu ahi.
4 Hiche nam mite hon Egypt gamsunga konna nahung potdoh uchun an le twijin nana lamto pouvin ahi. Chusangin. Aram-naharaim gam Pethor a Beor chapa Balaam chu na gaosap diuvin athalah uvin ahi.
5 Ahinlah Pakai na Pathen'un Balaam thusei chu anahsah poi. Ama'n gaosapna chu phatthei nan aheidoh e ajeh chu Pakai na Pathen'un na ngailu uvin ahi.
6 Na hinlai chan uva nang hon Ammon mite ahilouleh Moab mite cham lenna ding leh ahaosatna diuva lampi ima nasem doh peh theilou diu ahi.
7 Amavang Edom mite ahilouleh Egypt mite nanol theilou diu ahi, ajeh chu Edom mite chu na kinaipiu Egypt te lah a gamdang mi na khosah khompi teu ahiuve.
8 Edom le Egypt mite chengse vang khang thum alhin tengleh Pakaiya kikhopna mun'a lha thei diu ahi.
Dan dang ho
9 Chule na melmateu toh gal kisat dinga na kondoh tengu leh, nangho jong thil boh kiti phot a naki kangse diu ahi.
10 Pasal khat chu jankhang laijin apasal hina thisan pot tahen lang hileh houlam dol'a aboh ahitan ama chun nilhum'a ngahmun adalhah ding ahi.
11 Nilhah lam tengleh vang ama chu twiya kisutheng ding, nilhum lam teng ngahmun sunga hung lut thei ding ahi.
12 Ngahmun polama chu mun kicheh khat nanei diu hiche a chu na kisuh navah thei diu ahi.
13 Nang hon na thil nei lah uva tupheng hi nanei cheh diu ahi. Nangma cheh na kisuh navah jouteng uleh tupheng a lei nalai uva navuh diu ahi.
14 Ngahmun chu theng ding ahi, ajeh chu Pakai na Pathen uvin nang ho ventupna le na galmi teu sat dinga ngahmun avelkol ke ahi. Aman nalah uva jachat um thil amudoh louding, achuti louleh nangho a konna kiheimang ding ahi.
15 Aneipa a konna hung jamdoh soh chu, nang hon aneipa chu namoh peh jeng theilou diu ahi.
16 Ama toh chun na chenkhom jing diu, hoilai mun'a hijongleh na khopi sung uva chu aman adeilhenna mun pen a chu nachen sah jeng diu ahi. Chule hiche soh chu nang hon jong achunga gimna ima nalhun sah theilou diu ahi.
17 Israel mite numei hihen pasal hijongleh noti um theilou ding ahi.
18 Kitepna suh bulhitna dinga thilto nachoi ding tengleh, numei hihen pasal hijongleh noti hina a kimu sum chu Pakai na Pathen in'a nachoi theilou diu ahi, ajeh chu hiche teni hi Pakai na Pathen uva dinga thet umtah ahi.
19 Na Israel mi chanpi henga sumpa, anneh, ipi hijongleh napeh teng akan um'a napeh theilou ding ahi.
20 Amavang hitobang chu gamchom miho chunga nabol thei diu, ahinlah nasopi kiti pou chunga athoi neiya napeh theilou diu ahi. Athoi nalah lou uva ahileh tua na chenlutna diu mun'a khu Pakai na Pathen'un phatthei naboh diu ahi.
21 Pakai na Pathen uva dia thil khat peh ding natiuva ahileh hichu napeh ding tengu leh lungkihna ima nanei louhel diu ahi. Ajeh chu Pakai na Pathen'un nangho chunga ahin del khum jeng ding, napeh lou uva ahileh hichu nangho dinga chonset a kisim ding ahi.
22 A ipi chu hitaleh, kitepna nanei lou uva ahileh hichu chonset a kisim lou ahi.
23 Ahinlah kiphalthehg tah a na kitem nahi tah a ahileh, Pakai na Pathen'u kom'a chingtheijin bulhit un.
24 Naheng nakom lengpi leiya nalut tengu leh nadei chanin neuvin, ahin na paipeh uva na pohdoh lou diu ahi.
25 Chule naheng nakom loulaiya nache lut tengu leh, avui chu na kisi theiyu ahi, amavang, koite a na-at theilou diu ahi.