22
1 Na sopi bongchal ham khat tou avahmang namu a ahileh, hichu nakimu mosah lou diu, don nahsahmo a na koilou diu, amavang namu chan uchu na sopi henga nahin kailut joh diu ahi.
2 Hiche gancha neipa chu nangma inlam toh kigamla a um ahia, achenna nahet lou uva ahileh agancha chu nang hon na inlam uva nahin kai diu, aneipa na sopi pan ahung hol kahsea na ventup peh diu ahung hol tengleh phate cha a na lepeh diu ahi.
3 A sangan ham, asangkhol ham, ipi hitaleh namu u chu hitima a chu nabol peh diu ahi. Na mopoh nau chu nahsahmo a nabol lou diu ahi.
4 Na sopi khat sangan ham, bongchal ham khat chu lampia alhusa namu khah uva ahileh, hichu napanpi tei diu ahi. Na sopi gancha alhua chu na phohdoh peh diu, na huhdoh diu ahi.
5 Chule nalah uva numeijin pasal chunga kaisa akivonna ponsil chu kivonna a aman thei louhel ding, hitobanga chon chan chu Pakai na Pathen dinga thet umtah ahi.
6 Vabu hamkhat chu na tokhah uva hichu tollham ham thingchung ham khat a um, vabu sunga chu atwi ham anou ham khat chu vapin aop khum lai ahileh, hichu anousen puma namat thauva na suhgam lou diu ahi.
7 Ahinlah vapi chu nadel mang uva ahileh, anou chengse chu nakilo thei diu ahi, achutileh phattheina jong nachan diu chule nangho dinga hinkho sotna a pang ding ahi.
8 Chule nang hon in thah nasah tengu jongleh, bilha nunga konna mi akheh lhahna louding, thisan jal'a themmona achuh louna dinga, bilha gol jousea aki taan denna ding na sempeh diu ahi.
9 Chule na lengpilei laiyuva muchi ni na tukop theilou diu, muchi ni natu kop uva ahileh hichu munthenga todoh dinga kisang thei louding ahi.
10 Bongchal ham sangan ham khat chu, lou kainaa naman kop theilou diu ahi.
11 Tupat kihel leh patchom kihel khom jong mangcha a kisilna a naman theilou diu ahi.
12 Na kivonna diu na sangkhol chol mongu ningli a chu, pat hol khat cheh naba diu ahi.
Jonthanhoina chunga dan kisem
13 Pasal khat chun numei aji dinga akipuija, alup khompia chujou le numeinu chu athet bol jeng louding ahi.
14 Hiche numei nu chu jachatna leh jumna dimset a alha jenga, 'Hiche numei nu chu ka kichenpin ahileh, athenglou ahitai,' tia asei khah ngei ngeiya ahileh,
15 hiche numei nu chu anu leh apan jong khopi sung lam kelkot a thutan vaihom ho henga chu apuilut lhon ding, amanu hi atheng mong mong ahi nai, ti photchetna agabol lhon ding ahi.
16 Chuteng numeinu pan jong hitia hi aphondoh ding, hiche pasalpa toh hin kicheng ding mong monga kana pehdohsa chu ahitai. Ahinlah pasal pan vang muda in solmang ding ago e, tia asei ding ahi.
17 Hiche pan amanu dingin jachatna umtah in achonin, “Hiche na chanu chunga hin nungah thengsel ahina ima ka mudoh tapoi,” tin aseije. Ahin apan jong ka chanu hi nungah theng mong mong ahi, tia photchetna upaho henga alupna ponpha avetsah diu ahi.
18 Chujou tengleh khopi sunga upa hon jong hiche pasalpa chu amat uva gotna apeh diu ahi.
19 Chule pasalpa chu dangka shekel jakhat a aleusah diu, hiche dangka shekel jakhat chu nungahnu hingpa chang ding ahi. Ajeh chu hiche pasalpa chun Israel nungah khat aminset sah jeh ahi. Chule numeinu jong jia anei ding, ahinkho lhum keiya dinga ajia pang ding ahi.
20 Amavang nungahnu chunga chu, atheng'e ti photchetna aum thei tapoi.
21 Amaho chun hiche nungahnu chu apa in kotphunga konna ahin kaidoh diu, chuteng khopi sunga cheng jousen amanu chu songa aselih jeng diu ahi. Ajeh chu hiche numeinu chu chondih louna mangchan aki ngolsah tan, Israel insunga, apa insunga hiti chun ana chon tan ahi. Hitobanga chon chan phalou jouse chu na suhdih jing diu ahi.
22 Chule pasal khat chun pasal dang jikhat chu aluppi khah tah a ahileh, numeinu ahin pasal pa ahin anigel lhonna thina chang lhon ding ahi. Hitobanga chu Israel sunga thil dihlou chonna jouse na suhbei diu ahi.
23 Chule khopi sunga nungah thengsel khat chu pasal khat touvin, kholai dung ham khat a chu aki timatpi jeng tah a ahileh,
24 amani chu khopi sung lam kelkot phunga nahin kaidoh diu, ani lhona songa na selih jeng diu ahi. Ajeh chu min apanpi theina dingin amanu apeng pon ahi. Pasal pa chu thi ding ahi ajeh chu aman midang ji asuh set jeng ahi. Hitobanga chu, nalah uva konna chon chan phalou na suhtheng diu ahi.
25 Hinlah pasal khat in jinei dia khaokhisa nungah khat atokhah a asuhset a ahileh, pasalpa bou chu thi ding ahi.
26 Numeinu chunga hi ima kilo theilou ding ahi; ajeh chu numeinu chunga hin thina chan gotna peh ding aumpoi. Amanu chu khohelou kithat insung tobang ahi.
27 Ajeh chu hiche numeinu chu pasal pan gamlah a adel khum a akitimatpi ahin, numei khangdong nun jong kithopi ding ngaicha in apengin, hinlah koiman ajah pehlou ahi.
28 Tekahnan pasal khat touvin nungahtheng jinei dia khaokhi loulai khat chu akitimatpin ahi. Amaho chu akimat doh a ahileh,
29 hiche pasalpa chun nungahnu pa chu dangka shekel somnga apeh ding ahi. Ajeh chu amapa chun numeinu chu akitimatpia asuhchul ahitan, ahinkho lhum keiya ji dinga akipui ding ahi.
30 Pasal khat chun apa jimasa chu akichenpi theilou ding ahi, ajeh chu hichu pa nahsah louna ahi.