21
Toltha jeh a dan
1 Pakai na Pathen'un napeh nau gamsunga chu thise khat tou auma, ahivanga hiche thise chu koitha pen ham ti kihedoh theilou ahi.
2 Chutobang dinmun chu aum khah tah a ahileh, na upateu leh vaihom natong chengse chu hung diu, na khopiu leh akimvel'a khopi chengse chu phatah a atetoh sohkei diu ahi.
3 Hitia chu abol diu thina tohpa umna a konna chu, khopi akinaipi pen chu mo kichan ding ahi. Bong ala khat lou natong khaloulai hichu agakai diu ahi.
4 Hiche mochanga khopi sung mite chun, bongla chu phaicham lah khat a ahin kai diu, hiche phaicham chu lou natohna a kimang khalou hi ding, phaicham mun'a chu bongla gol chu angong chang aheboh diu ahi.
5 Chuteng Levi thempuho abonchauva amasang lama hung masa diu ahi. Ajeh chu Pakai na Pathen'un amaho chu akin natong dinga alhendohsa ahin, Levi thempu ho thusah bang banga kinopmona leh kinah baotam jouse aboncha thuchaina um ding ahi.
6 Thisepa umna toh kinaina mun'a bongla kithana mun'a chu, khopi sunga upaho jousen twiya akhut akisop cheh diu ahi.
7 Hichu amaho dinga hettohsahna a pang ding, “Keiho khut a konna hiche thise hi thisan kiso ahipoi, thisan kiso pet jeng jong kamu hih hel uve,” tia asei diu ahi.
8 O Pakai, nangman nahuhdohsa nami Israel mite hi ngaidam tan, hiche themmona thisan kisona ho jal'in nami Israel te chunga lethuhna neihih helin, thisan kiso jal'a amaho chunga lethuhna achan nalou dinga, taona anei peh teitei diu ahi.
9 Hitia chu nangman jong mona beihel'a thisan kisona chung changa konna Pakai, mitmua adih a natohna chu nabol tengu leh suhthengna jong nanei diu ahi.
Numei kimanho thu
10 Na melma teu toh gal kisat dinga na kondoh tengu leh Paka na Pathen'un na melma teu chu nangho henga ahin pehdoh khah tah uva ahileh, nangman jong amaho chu gal hinga nahin kai ding ahi.
11 Chule hiche gal hing lah a konna chu numei mel-hoitah na kimudoh uvin, naji diuvin nadeiyun ahi.
12 Hichu ahitah leh, inlam'a nahin pui diu, alu avotol ding, atin akitan ding,
13 gal hinga akivonna von chu akikhel ding ahi. Na insunga chu cheng ding, ahinlah lha lhungkeiya anu leh apa pul adou ding ahi. Chuteng amanu chu na kichenpi ding, amanu najinu hi a chule nangma amanu jipa nahi ding ahi.
14 Ahin amanu naki chenpia amanun na lunglhaisah louva ahileh, amanu chu man beiya nasol ding ahitai. Amanu chu najoh ahilouleh soh banga nabol louding ahi, ajeh chu amanu chu na suhchulsa ahitai.
Chapa tah ho goulo
15 Koitobang pasal khat chun numei ji ni akop in, khatnu alungset in khatnu vang chu alungset poi, ahivangin chapa ahing cheh lhon tan ahi. Chule tekah in chapa apen masa chu adeimo nun ahin ahi.
16 Mipa chun khonunga achapa te thil leh lo ahin hoppeh nikho tengleh, adeimo johnu chapa sanga chu adeinu chapa chu gelkhohna aneiya langneina jong anei thei louding, apeng masa chu apeng masa bang banga abol thou thou ding ahi.
17 Adeimo johnu chapa chu achapa lah a atah pen ahi tia aphondoh ding, anei agou jouse lah a chan nia tam joa apeh ding ahi. Ajeh chu ama dia chapa masapen ahin, mi-upa chan ding chu achansah thou thou ding ahi.
Sei ngailou chapa
18 Tekah khat in mipa khat in chapa louchal, thunun tei agot vangun anu apa jalouvin aumtai.
19 Chutobang dinmun a chu, achapa chu anu leh apan jong khopi kelkot lama, thutan vaihom ho henga ahin puilut jeng lhon ding ahi.
20 Chuteng anu leh apan jong khopi vaihom ho jah a, 'Hiche ka chapa hi doumah jeng aboldoh tan chule kathu lhon jong angai hih hel in, milop tah le phatseh a jukhamna a hinkho mang jeng ahitai,' ati lhon ding ahi.
21 Chutengleh hitobang miphalou chu khopi sunga cheng mipi ho chun songa aselih jeng diu ahi. Hiche hi Israel pumpin amu sohkei uva, kichaa um diu ahi.
Dan dang dang ho
22 Mihem khat touvin thina chan gotna pehna thei chonset a alhah khah tah a, amapa chu tha teitei ding ahi tah leh, ama chu thing chunga konna na khailih jeng theiyu ahi,'
23 amavang hiche na khailih pau chu khovah chana na khaiden theilou diu, anikho mama a navuidoh diu ahi, ajeh chu koi hileh akikhailih chu Pathen mitmu a gaosapna ahi. Pakai na Pathen'un goulo dinga napeh nau gamsung chu gaosapna a konna hitia chu naven diu ahi.